GENESIS 45
45
Nagpamidbid si Jose sa Saiyang mga Tugang
1Dai na napugolan ni Jose an saiyang sadiri sa atubang kan saiyang mga oripon, kaya pinaluwas niya an mga ini sa kwarto. Mayong nawalat duman kan magpamidbid siya sa saiyang mga tugang. 2Nagtangis siya nin makosog, kaya nadangog ini kan mga Egipcio saka ibinareta sa hade. 3Sinabihan ni Jose an saiyang mga tugang, “Ako si Jose. Buhay pa an sakong ama?” Alagad kan madangog ini kan saiyang mga tugang, nagkatarakot sinda kaya dai nakasimbag. 4Dangan nagsabi si Jose, “Magrani kamo sako.” Nagdolok sinda ki Jose asin sinabihan, “Ako an tugang nindong si Jose na ipinabakal nindo sa Egipto. 5Alagad dai kamo magmondo o magbasol kan saindong sadiri na ipinabakal nindo ako digdi. Enot akong ipinadara nin Dios ki sa saindo tanganing ikaligtas an dakul na buhay. 6Ikaduwang taon pa sana ini kan grabeng gutom sa daga; limang taon pa nin pagtios an maabot na mayo nin pag-aarado o pag-aani. 7Enot akong ipinadara nin Dios ki sa saindo tanganing iligtas kamo sa makangalas na paaging ini, asin buhayon kamo sagkod an saindong kapagarakian. 8Kaya bakong kamo an nagpadara sako digdi, kundi an Dios. Ginibo niya akong ikaduwa sa kapangyarihan sa hade asin parapamahala kan bilog na daga niya; ako an nagpapalakaw kan Egipto.
9“Kaya maghidali kamo sa pagpuli sa sakong ama asin sabihan nindo siyang ini an sinabi kan saiyang aking si Jose: ‘Ginibo ako nin Dios na magin parapamahala kan bilog na Egipto; maghidali ka sa pagdigdi sako. 10Mag-erok ka sa rehiyon kan Goshen, harani sako, ika, an saimong kaakian saka mga makoapo, an saimong mga karnero, kanding asin baka, patin an gabos mong pagsadiri. 11Kun nasa Goshen ka na, maaataman taka. Lima pang taon an grabeng gutom; habo kong magutom kamo—ika, an saimong pamilya saka an saimong mga hayop.’”
12Nagsabi pa si Jose, “Ngunyan nahihiling nindo, asin nahihiling mo man, Benjamin, na ako mananggad si Jose. 13Ibareta nindo sa sakong ama kun siisay ako sa Egipto. Isabi nindo saiya an saindong nahiling dangan maghidali kamo asin ipag-iba nindo siya digdi.”
14Kinugos niya an saiyang tugang na si Benjamin asin naghibi; naghibi man si Benjamin mantang kugos ni Jose. 15Mantang naghihibi, kinugos man niya asin hinadokan an saiyang mga tugang. Pakatapos kaini, saka pa sana nakiolay ki Jose an saiyang mga tugang.
16Kan makaabot sa palasyo an bareta na nag-abot an mga tugang ni Jose, naogma an hade dangan an saiyang mga opisyal. 17Nagboot an hade ki Jose, “Sabihi an saimong mga tugang na kargahan nin pagkakan an saindang mga hayop dangan magbalik sa Canaan. 18Ipakua mo sainda an saindong ama asin an saindang mga pamilya dangan magbalik digdi. Itatao ko sainda an pinakamarahay na daga sa Egipto, na matao sainda nin labi pa kan saindang pangangaipo. 19Sabihi man sinda na magdara nin mga lunadan hale digdi sa Egipto para sa saindang mga agom saka saradit na mga aki, asin ipag-iba ninda digdi an saindong ama. 20Dai sinda dapat mahadit na bayaan duman an saindang mga pagsadiri huli ta mapapasainda an pinakamarahay na daga sa bilog na Egipto.”
21Sinunod kan mga aki ni Jacob an sinabi sainda. Tinawan sinda ni Jose nin mga lunadan sagkod pagkakan para sa saindang paglakaw, siring sa ipinagboot kan hade. 22Tinawan man sinda ni Jose nin sanglean na gubing, alagad tinawan niya si Benjamin nin tres syentos na pedasong plata saka limang sanglean na gubing. 23Pinadarahan man ni Jose an saiyang ama nin sampolong asno na kargado nin mga pinakamarahay na mababakal sa Egipto asin sampolong asno na kargado nin mais, tinapay saka iba pang pagkakan para sa saindang paglakaw. 24Dinespedir ni Jose an saiyang mga tugang asin kan mahale na an mga ini, sinabihan niya sinda, “Dai kamo mag-iriwal sa dalan.”
25Naghale sinda sa Egipto asin nagpuli sa saindang ama na si Jacob sa Canaan. 26“Buhay pa si Jose!” an sabi ninda sa saindang ama. “Siya an nagpapalakaw kan bilog na Egipto!” Nabigla si Jacob asin dai siya nagtubod sainda.
27Alagad kan osipan ninda siya kan sinabi ni Jose, asin kan mahiling an mga lunadan na madara saiya sa Egipto, nagtubod siya. 28Nagsabi si Jacob, “Buhay pa an aki kong si Jose! Dai na akong mahahagad pa! Kaipuhan magduman ako asin hilingon siya bago ako magadan.”
Currently Selected:
GENESIS 45: BPV
Highlight
Share
Copy
Want to have your highlights saved across all your devices? Sign up or sign in
Philippine Bible Society, New Testament © 1981, Bible © 1992
