GENESIS 46
46
Nagduman sa Egipto si Jacob asin an Saiyang Pamilya
1Kaya dara an gabos niyang pagsadiri, nagduman sa Beer-sheba si Jacob asin nagdolot nin mga atang sa Dios nin saiyang ama na si Isaac. 2Pagkabanggi, inapod siya nin Dios sa sarong bisyon, “Jacob, Jacob!”
“Uya ako,” an simbag niya.
3Nagtaram an Dios saiya, “Ako an Dios, an Dios kan saimong ama. Dai ka matakot na magduman sa Egipto; gigibohon takang sarong dakulang nasyon duman. 4Iibahan taka pasiring sa Egipto, asin ibabalik ko sa dagang ini an saimong kapagarakian. Masasakaibahan mo si Jose sa oras kan saimong pagkagadan.”
5Dangan naghale si Jacob sa Beer-sheba. Siya, an saiyang mga makoapo saka an mga agom kan mga aki niya pinalunad kan saiyang mga aki sa mga lunadan na padara kan hade. 6Dinara ninda sa Egipto an mga hayop sagkod an mga rogaring na napasainda duman sa Canaan. Ipinag-iba ni Jacob an gabos niyang kapagarakian: 7an saiyang mga aking lalaki saka mga makoapong lalaki, an saiyang mga aking babae saka mga makoapong babae.
8An pamilya ni Jacob na kaiba niyang nagpasiring sa Egipto iyo an matua niyang aking si Ruben 9sagkod an mga aki kaining lalaki na si Hanok, Pallu, Hezron, asin Carmi. 10Si Simeon sagkod an mga aki kaining lalaki na si Jemuel, Jamin, Ohad, Jakin, Zohar, asin Shaul na aki nin sarong Cananea. 11Si Levi sagkod an mga aki kaining lalaki na si Gerson, Kohat, asin Merari. 12Si Juda sagkod an mga aki kaining lalaki na si Shela, Perez, asin Zera. (Si Er saka si Onan nagkagaradan sa Canaan.) An mga aki ni Perez na si Hezron asin si Hamul. 13Si Issakar sagkod an mga aki kaining lalaki na si Tola, Pua, Jasub, asin Simron. 14Si Zabulon sagkod an mga aki kaining lalaki na si Sered, Elon, asin Jaleel. 15Ini an mga nagin aki ni Jacob ki Lea duman sa Mesopotamia; dai digdi kabilang an aki niyang babae na si Dina. Treynta y tres an bilang kan kapagarakian ni Jacob ki Lea.
16Si Gad sagkod an mga aki kaining lalaki na si Zefon, Haggi, Suni, Ezbon, Eri, Arod, asin Areli. 17Si Aser sagkod an mga aki kaining lalaki na si Imna, Isva, Isvi, Beria, asin an tugang nindang babae na si Sera. An mga aki ni Beria na si Heber asin Malkiel. 18Dyes y seis an bilang kan kapagarakian ni Jacob ki Zilpa, an oripon na babaeng itinao ni Laban sa aki niyang si Lea.
19An mga aki ni Rachel na agom ni Jacob: si Jose asin si Benjamin. 20An mga aki ni Jose sa Egipto: si Manases asin si Efraim. An mga ini iyo an mga aki ni Jose ki Asenat, an aking babae ni Potifera na sarong padi sa On. 21An mga aki ni Benjamin na si Bela, Beker, Asbel, Gera, Naaman, Ehi, Ros, Muppim, Huppim, asin Ard. 22Katorse an bilang kan kapagarakian ni Jacob ki Rachel.
23Si Dan asin an aki kaining lalaki na si Husim. 24Si Neftali asin an mga aki kaining lalaki na si Jazeel, Guni, Jezer, asin Sillem. 25Pito an bilang kan kapagarakian ni Jacob ki Bilha, an oripon na babaeng itinao ni Laban sa aki niyang si Rachel.
26Sesenta y seis an bilang kan mga aki asin makoapo ni Jacob na nagpasiring sa Egipto; dai digdi kabilang an mga agom kan saiyang mga aking lalaki. 27Duwa an nagin aki ni Jose sa Egipto, kaya setenta an nagin bilang kan gabos na kapagarakian ni Jacob sa Egipto.
Si Jacob asin an Saiyang Pamilya sa Egipto
28Pinaenot ni Jacob si Juda tanganing sabihan si Jose na sabaton siya sa Goshen; dangan nakaabot sinda sa Goshen. 29Nagsakay si Jose sa saiyang karwahe asin sinabat an saiyang ama sa Goshen. Kan magkahilingan sinda, kinugos ni Jose an saiyang ama asin nagparahibi. 30Nagsabi si Jacob ki Jose, “Ngunyan na nahiling taka asin naaraman na buhay pa, andam na akong magadan.”
31Sinabihan ni Jose an saiyang mga tugang saka an iba pang pag-iriba, “Maduman ako sa hade tanganing sabihan siya na nag-abot na an sakong mga tugang asin an gabos na pamilya kan sakong ama na dating nag-erok sa Canaan. 32Sasabihan ko siya na mga pastor kamo asin mga paraataman nin mga hayop; na dinara nindo an saindong mga hayop sagkod an gabos nindong mga pagsadiri. 33Kun apodon kamo kan hade asin hapoton kun ano an saindong trabaho, 34dai nanggad kamo malingaw na magsabi saiya na mga pastor kamo nin mga hayop sa bilog nindong pagkabuhay, siring kan trabaho kan saindong mga ginikanan. Huli kaini, tutugotan niya kamong mag-erok sa rehiyon nin Goshen.” Sinabi ini ni Jose huli ta dai nakikilabot an mga Egipcio sa mga pastor nin hayop.
Currently Selected:
GENESIS 46: BPV
Highlight
Share
Copy
Want to have your highlights saved across all your devices? Sign up or sign in
Philippine Bible Society, New Testament © 1981, Bible © 1992
