GENESIS 47
47
1Kaya ipinag-iba ni Jose an lima sa saiyang mga tugang asin nagduman sinda sa hade. Nagsabi siya sa hade, “Nag-abot na hale sa Canaan an sakong ama asin an sakong mga tugang. Dara ninda an saindang mga hayop sagkod an gabos nindang pagsadiri. Idtoon sinda ngunyan sa rehiyon nin Goshen.” 2Dangan ipinamidbid niya sa hade an lima niyang tugang. 3Naghapot an hade sainda, “Ano an saindong mga trabaho?”
Nagsimbag sinda, “Mga pastor kami siring kan samong mga ginikanan. 4Nagdigdi kami tanganing makihimanwa sa dagang ini, huli ta makuri an gutom sa Canaan asin mayo nin masasabsab duman an samong mga hayop. Nakikimaherak kami na tugotan mong mag-erok kami sa rehiyon nin Goshen.” 5Sinabihan kan hade si Jose, “Ngunyan na nag-abot na an saimong ama saka mga tugang, 6yaon an bilog na daga kan Egipto na pagpipilian mo. Duman mo sinda paerokon sa rehiyon nin Goshen, an pinakamarahay na parte kan daga. Kun igwa sa saindang marahay na magpastor, gibohon mo siyang parapamahala kan sakong mga hayop.”
7Dangan dinara ni Jose an saiyang ama asin ipinamidbid sa hade. Benendisyonan ni Jacob an hade. 8Naghapot an hade, “Pira na an edad mo?”
9Nagsimbag si Jacob, “An mga taon nin sakong pakikihimanwa uminabot na sa syento treynta. Kadikit asin masakit an mga taon na iyan, bakong arog kan halawig na panahon nin pakikihimanwa kan sakong mga ginikanan.” 10Benendisyonan giraray ni Jacob an hade bago siya naghale. 11Dangan pinaerok ni Jose sa Egipto an saiyang ama saka an saiyang mga tugang; tinawan niya sinda kan pinakamarahay na daga na harani sa syudad nin Rameses, siring sa ipinagboot kan hade. 12Tinawan man ni Jose nin pagkakan an saiyang ama, an saiyang mga tugang saka an iba pang myembro kan pamilya kan saiyang ama sagkod an pinakaaki sainda.
An Makuring Gutom
13Mayo nin pagkakan sa gabos na lugar huli ta makuri an gutom minsan saen. Pinanruluya an mga Egipcio asin mga Cananeo huli sa gutom. 14Tinipon ni Jose an kwartang kabakalan kan mais dangan dinara sa palasyo. 15Kan maubos na an kwarta kan bilog na Egipto asin Canaan, nagdolok ki Jose an mga Egipcio asin nagsabi, “Tawe man kami nin pagkakan! Hare man kami pagpabayaeng magadan! Gumibo ka nin paagi! Ubos na an samong kwarta.”
16Nagsimbag si Jose, “Daraha nindo sako an saindong mga hayop asin riribayan ko iyan nin pagkakan kun ubos na an saindong kwarta.” 17Kaya dinara kan mga tawo ki Jose an saindang mga hayop asin tinawan niya sinda kan karibay na pagkakan. Kan taon na iyan, an mga tawo tinawan ni Jose nin pagkakan karibay kan saindang mga hayop.
18Kan sunod na taon, nagduman ki Jose an mga tawo asin nagsabi, “Dai mi tatagoon saimo, kagurangnan, an katotoohan na mayo na kaming mga kwarta asin napasaimo na an samong mga hayop. Mayo na nin natatada sa samo na pwede ming itao saimo kundi an samong mga hawak asin an samong mga daga. 19Hare man kami pabayaeng magadan. Gumibo ka nin paagi! Hare pagtugot na magin sarong desyerto an samong mga daga. Ribaya kami asin an samong mga oma nin pagkakan. Kami na an magigin mga oripon kan hade asin siya na an magigin kagsadiri kan samong mga oma. Alagad tawe kami nin mais tanganing mabuhay kami asin tawe man kami nin banhi na itatanom sa samong mga oma.”
20Kaya binakal ni Jose an gabos na daga sa Egipto para sa hade. Napiritan an gabos na Egipcio na ipabakal an saindang daga huli kan makuring gutom. Kaya an gabos na daga nagin pagsadiri kan hade. 21Ginibong oripon ni Jose an gabos na tawo sa Egipto magpoon sa sarong poro kaini sagkod sa ibong na poro. 22An daga sana kan mga padi an dai binakal ni Jose. Dai kaipuhan na ipabakal kan mga padi an saindang daga huli ta igwa sinda nin permanenteng kahirasan nin pagkakan hale sa hade. 23Sinabihan ni Jose an mga tawo, “Ngunyan na aldaw, binakal ko na kamo asin an saindong mga daga para sa hade. Uya an banhi; itanom nindo. 24Sa tig-anihan, itatao nindo an ikalimang parte kan ani sa hade. An natadang apat na parte, gibohon nindong banhi para sa saindong oma asin pagkakan nindo sagkod kan saindong pamilya.”
25Nagsimbag sinda, “Ilinigtas mo an samong buhay; nagin marahayon ka samo, kagurangnan, kaya magigin oripon kami kan hade.” 26Kaya ginibo ni Jose na sarong pagboot sa daga nin Egipto na an ikalimang parte kan ani itatao sa hade. Sagkod ngunyan sinusunod pa an pagboot na ini. An mga daga sana kan mga padi an dai nasadirihan kan hade.
An Huring Kahagadan ni Jacob
27Nag-erok an mga Israelita sa Egipto, sa rehiyon nin Goshen; nagyaman asin nagdakul sinda duman. 28Nag-erok si Jacob sa Egipto sa laog nin dyes y syeteng taon, sagkod na makaabot siya sa edad na syento kwarenta y syete. 29Kan madali na siyang magadan, inapod niya an aki niyang si Jose asin sinabihan, “Ibugtak mo an saimong kamot sa pagultanan kan sakong mga hita#29 Ibugtak…hita; Hilingon sa 24:2. asin magsumpa ka na dai mo ako ilulubong sa Egipto. 30Gusto kong iluwas mo ako sa Egipto asin ilubong sa lulubngan kan sakong mga magurang.”
Nagsimbag si Jose, “Kukuyogon ko an sinabi mo.”
31Nagsabi si Jacob, “Magsumpa ka na kukuyogon mo ini.” Nagsumpa si Jose, dangan nagduko si Jacob sa may pamayohan kan saiyang higdaan.
Currently Selected:
GENESIS 47: BPV
Highlight
Share
Copy
Want to have your highlights saved across all your devices? Sign up or sign in
Philippine Bible Society, New Testament © 1981, Bible © 1992
