Luka 14

Yeesu yamɗitini nyawɗo

1 Nyannde siwtorde feere, Yeesu yehi saare gooto nder mawɓe Farisa'en, ngam o nyaama ton. Wonɓe ton ayni mo. 2Ndaa goɗɗo mo ɓanndu mum uppi daliila nyawu ɗon ndari yeeso maako. 3Yeesu ƴami moodiɓɓe tawreeta e Farisa'en, wi'i: “Ɗum duŋaaɗum yamɗitingo nyannde siwtorde na?” 4Ɓe njeeɗi. Nden Yeesu jogi nyawɗo go, yamɗitini mo, acci mo o dilla. 5Nden o wi'i ɓe: “Moy caka mooɗon, to ɓiŋngel mum malla ngaari mum yollake nder ɓulndu, wurtintaa ɗum law koo to nyannde siwtorde na#Mat 12:11.?” 6Ɓe mbaawaay jaabaago mo koo ɗume dow maajum.

Suɓugo joole tedduɗe e ewnaago yimɓe haa juulde

7Yeesu yi'i no ewnaaɓe cuɓri joole tedduɗe, o wolwani ɓe, o wi'i: 8“To goɗɗo ewnake ma haa nyaamduuji ɓaŋgal, taa jooɗoya haa babal tedduŋgal. Teema woodi caka ewnaaɓe mo ɓuri ma daraja. 9Taa mo ewni on ɗiɗo fuu wara wi'e: Accan oo ɗo babal nga'al. A semtan jooɗoyaago haa babal ɓaawowal. 10Ammaa to a ewnaama, yah jooɗa haa babal ɓaawowal, haa to ewniiɗo ma wari, wi'i ma: Soobaajo am, war haa joonde ɓurnde wooɗugo nde'e. Ɗum laatante tedduŋgal yeeso ɓe a nyaamdata fuu#Bal 25:6-7.. 11Ngam mo mawnini hoore mum, o leestinteeɗo, mo leestini hoore mum boo, o ɓaŋgteteeɗo#Mat 23:12; Lk 18:14..”

12Nden o wolwani boo ewniiɗo mo go: “To a waɗani yimɓe nyaamduuji koo ndey, taa ewna soobiraaɓe ma malla deerɗiraaɓe ma malla banndiraaɓe ma, koo heeddiɗɗiraaɓe ma riskuɓe, ngam taa ɓe ewne kamɓe boo, ɓe mbarjo ma. 13Ammaa to a waɗi nyaamdu juulde, ewna talaka'en e jiijiiɓe e woosɓe e wumɓe. 14A heɓan barka ngam ɓe mbaawataa warjaago ma. Allah warjoto ma ɗum nyannde ummitineeki adili'en.”

Balndol nyaamdu ɗuuɗndu

(Matta 22:1-10)

15Nde gooto caka nyaamdanɓe bee Yeesu nani bolle ɗe'e, o wi'i: “Barka laatanto nyaamanɗo nyaamdu mum nder laamu Allah.” 16Yeesu jaabi mo: “Goɗɗo feere waɗi nyaamdu ɗuuɗndu, o ewni yimɓe ɗuuɗɓe. 17Wakkati nyaamugo, o neli suka maako o wi'a ewnaaɓe: Ngare, ngam koo ɗume fuu taaskake. 18Ɓe fuu maɓɓe ɓe puɗɗi yelditaago. Arano wi'i suka go: Mi soodi ngesa, sey mi yaha mi laara ka, mi tori ma, yaafam. 19Goɗɗo boo wi'i: Mi soodi ga'i sappo cindaaɗi ɗiɗi ɗiɗi, mi yiɗi laarndaago ɗi, mi tori ma, yaafam. 20Goɗɗo feere boo wi'i: Mi ɓaŋgi neeɓaay, ngam maajum mi heɓataa wargo. 21Suka lorti haa jaagorɗo muuɗum, yecci mo ɗum fuu. Nden jawmu saare ɓerni, wi'i suka muuɗum: Yah law haa dalde wuro e haa laabi, ewna talaka'en e jiijiiɓe e wumɓe e woosɓe. 22Suka yehi, warti, wi'i: Jaagorɗo, ko a umri waɗaama, ammaa babal ɗon lutti fahin. 23Jaagorɗo wi'i suka go: Yah haa buuwi e laabi kommbi gese, doolu yimɓe ɓe a fottata bee muuɗum'en fuu ɓe nasta, ngam haa saare am heewa. 24Mi ɗon wi'a on: Koo gooto haa aartuɓe ewneego mettataa nyaamdu am!”

No goɗɗo laatorto pukaraajo Yeesu

(Matta 10:37-38)

25Mooɓe ɗuuɗɗe ndillidi bee Yeesu. O yeesiti, o wi'i ɓe: 26“To goɗɗo wari haa am e o ɓuraay yiɗugo yam dow baaba maako e daada maako e debbo maako e ɓikkoy maako e deerɗiraaɓe maako worɓe e rewɓe, koo yoŋki maako boo, o waawataa laataago pukaraajo am#Mat 10:37.. 27Koo moy mo roondaaki gaafaaŋgal mum ngam tokkaago yam, waawataa laataago pukaraajo am#Mat 10:38; 16:24; Mk 8:34; Lk 9:23.. 28Moy haa mooɗon, to yiɗi mahugo suudu aynirdu, o jooɗataako, o hiimo ko o majjinta, o laara to o waawan timmingo. 29Ngam taa o wallina caɓɓawal nden o waawaay timmingo, yi'ɓe mo njancan mo, mbi'an: 30Gorko oo fuɗɗi mahugo, o waawaay timmingo. 31Malla laamiiɗo moye, to yiɗi yahugo waɗa konu bee laamiiɗo goɗɗo, o jooɗataako tawon, o hiimo, to o waawan yahugo bee yimɓe ujine sappo, ngam fottugo bee garananɗo mo bee yimɓe ujine noogas? 32To o waawataa, diga laamiiɗo man ɗon daayi tawon, o nelan nelaaɓe ngam ƴamugo no ɓe culhotira. 33Bana non haa mooɗon boo, mo accaay jawdi muuɗum fuu, waawataa laataago pukaraajo am.”

Mannda ɗam nafataa

(Matta 5:13; Markus 9:50)

34“Mannda wooɗi, ammaa to lammeeŋga maajam ittake, noy ɗam heɓtirta lammeeŋga man fahin? 35Ɗam nafataa haa lesdi, ɗam nafataa ngam koonal, ɓe ndufan ɗam yaasi. Mo woodi noppi nanugo, nana!”

Currently Selected:

Luka 14: FBDC

Highlight

Copy