Luka 22

Dabare naŋngugo Yeesu

(Matta 26:1-5; Markus 14:1-2; Yuhanna 11:45-53)

1Juulde tamseeje ɗe ufnaaka, wi'eteende Paska ɓadake yottaago#Gurt 12:1-27.. 2Mawɓe liman'en e moodiɓɓe tawreeta ɗon ɗaɓɓa dabare haa ɓe mbara Yeesu, ammaa ɓe ɗon kula yimɓe.

Yahuuda zammbi Yeesu

(Matta 26:14-16; Markus 14:10-11)

3Nden Sayɗaanu nasti nder Yahuuda, bi'eteeɗo Iskariyot, gooto nder sappo e ɗiɗo. 4O yehi, o narri bee mawɓe liman'en e mawɓe aynooɓe haykaliiru, dow dabare naŋngugo Yeesu. 5Ɓe ceyi, ɓe narri hokkugo mo ceede. 6Yahuuda jaɓi, o fuɗɗi ɗaɓɓugo dabare no ɓe naŋngira Yeesu bee sirri ngam taa mooɓre yimɓe heɓta.

Taaskara nyaamdu juulde Paska

(Matta 26:17-25; Markus 14:12-21; Yuhanna 13:21-30)

7Nyalaade tamseeje ɗe ufnaaka, nde ɓe kirsata jawgel Paska yottake. 8Yeesu neli Piyer e Yuhanna, o wi'i ɓe: “Njehe, taaskitinane en nyaamdu Paska haa nyaamen” 9Ɓe ƴami: “Toy ngiɗɗa min taaskitina ndu?” 10O jaabi ɓe: “Ndaa, to on nasti berniwol, on pottan bee goɗɗo doondiiɗo mbulku ndiyam. Tokke mo haa saare nde o nastata, 11mbi'e jawmu saare man: Moodibbo wi'i: Toy suudu haa mi nyaama kiirtaari Paska bee pukara'en am? 12O hollan on suudu mawndu, dowru, mo'itinaandu, haa ton on ngaɗata taaskara.” 13Ɓe njehi, ɓe tawi kuuje man bana o wi'i ɓe, ɓe taaskitini kiirtaari Paska.

Kiirtaari ceniindi

(Matta 26:26-30; Markus 14:22-26; 1 Korintu'en 11:23-25)

14Nde wakkati man waɗi, Yeesu fuɗɗi nyaamugo bee nelaaɓe. 15O wi'i ɓe: “Mi yeli masin nyaamugo nyaamdu Paska ndu bee mooɗon hiddeko mi torro. 16Ngam mi ɗon wi'a on, mi meetataa nyaamugo nyaamdu Paska haa to maana maaru waŋginaama nder laamu Allah.” 17Nden o hoo'i jardugel, o yetti Allah, o wi'i: “Koo'e jardugel ngel, cennde hakkunde mooɗon, 18ngam mi ɗon wi'a on, yeeso ɗo mi meetataa yarugo inaboojam sey to laamu Allah wari.” 19Ɓaawoɗon o hoo'i tamseere, o yetti Allah, o yewi nde, o hokki ɓe, o wi'i: “Ɗo ɗum ɓanndu am hokkaandu ngam mooɗon, mbaɗe ɗum ngam haa on ciftorammi.” 20Bana non boo, o hoo'i jardugel ɓaawo nyaamdu, o hokki ɓe ngel, o wi'i: “Jardugel nge'el ɗum alkawal kesal. Allah tabitiniri ngal bee ƴiiƴam am ndufaaɗam ngam mooɗon#Yer 31:31-34..

21Ammaa ndaa zammbotooɗo yam ɗon nyaamda bee am haa ɗo#Jab 41:10.. 22Fakat, Ɓii-neɗɗo maayan bana no Allah tabitiniri ɗum, ammaa bone laatanto neɗɗo zammbotooɗo mo! 23Ɓe puɗɗi ƴamƴamtirgo, moy caka maɓɓe tammiiɗo waɗugo ɗum”.

Moy ɓurdi maŋngu?

24Ngaaba ummi hakkunde nelaaɓe dow moy caka maɓɓe tammiiɗo laataago mawɗo, ɓurduɗo#Mat 18:1; Mk 9:34; Lk 9:46.. 25Yeesu wi'i ɓe: “Laamiiɓe ummaatooje ɗon laamano ɗe, marɓe baawɗe dow maɓɓe boo ɗon ewno ko'e muuɗum'en saahiiɓe. 26Ammaa ngam mooɗon kam, naa bana non. Mo ɓurdi maŋngu caka mooɗon laato mo ɓurdi famɗugo, mo ɗon laamo boo laato bana jaggiiɗo#Mat 20:25-27; 23:11; Mk 9:35.. 27Moy ɓurdi maŋngu, jooɗiiɗo ɗon nyaama naa malla jagganoowo mo? Naa jooɗiiɗo ɗon nyaama na? Ammaa min, mi ɗon caka mooɗon bana jaggoowo#Yuh 13:12-15..

28Onon ngoni wonduɓe bee am tum nder jarribooje am. 29Mi hokki on laamu bana Baabiraawo am hokkiri yam. 30Nden on nyaaman, on njaran haa nyaamrude am nder laamu am, on njooɗoto dow leese laamu ngam hiitaago le'i Isra'iila sappo e ɗiɗi#Mat 19:28..”

Yeesu e Piyer

(Matta 26:31-35; Markus 14:27-31; Yuhanna 13:36-38)

31Jawmiraawo wi'i: “Simon! Simon! Sayɗaanu ƴami duŋayeere ngam dimmbugo on, jaartugo on bana ɓe njaartirta alkamaari ngam senndugo ndi bee nyaande. 32Ammaa mi torake ngam maaɗa, ngam taa nuɗɗinki ma tampa. An, to a tuubi, semmbiɗin deerɗiraaɓe ma.” 33Piyer wi'i mo: “Jawmiraawo, mi ɗon taaski yahugo bee ma, koo haa fursina#22:33 Fursina malla yaŋgada., koo haa maayde boo.” 34Yeesu wi'i: “Piyer, mi ɗon wi'e, hannde hiddeko asgumri#22:34 Asgumri malla agugumri. u'a, a wi'an nde tati a anndaa yam.”

Booro ceede, booro njooɓaari, kaafahi

35Yeesu wi'i ɓe fahin: “Nde mi nelno on bilaa booro ceede, bilaa booro njooɓaari, bilaa paɗe, woodi ko on cooyino na?” Ɓe njaabi mo: “Walaa koo ɗume min cooyi#Mat 10:9-10; Mk 6:8-9; Lk 9:3; 10:4..” 36O wi'i ɓe: “Ammaa jonta naa non. Marɗo booro ceede hoo'a ngo, marɗo booro njooɓaari boo hoo'a ngo. Mo maraay kaafahi, soorra limce muuɗum, sooda kaafahi. 37Ngam mi ɗon wi'a on, sey binndaaɗum dow am gooŋɗa: O limaama caka halluɓe. Ngam ko waajibi dow am ɗon laato.” 38Ɓe mbi'i: “Jawmiraawo, ndaa kaafaaje ɗiɗi.” O wi'i ɓe: “Ɗum he'i#Esa 53:12..”

Yeesu waɗi do'aare haa Gecemane

(Matta 26:36-46; Markus 14:32-42)

39Nden Yeesu wurti, o dilli haa Hooseere Jaytunje bana no o woowi. Pukara'en maako tokki mo. 40Nde o yotti nokkuure man, o wi'i ɓe: “Tore Allah ngam taa on ndo'o nder jarribeeki.” 41Nden o daayti ɓe baakin sakkinannde hayre, o tuggi koppi, o waɗi do'a, 42o wi'i: “Baabiraawo, to a muuyi, ittanam jardugel torra nge'el. Ammaa taa waɗ ko muuyo am yiɗi, sey ko ngo ma yiɗi.” 43Nden malaa'ikaajo waŋgani mo diga asama ngam semmbiɗingo mo. 44Nde ɗum suni mo masin, o waɗi do'a bee tiinaare, wulweende maako laati bana toɓɓe ƴiiƴam dow lesdi.

45Ɓaawo waɗugo do'a, o ummi, o lorti haa pukara'en, o tawi ɓe ɗaani ngam comri suno. 46O wi'i ɓe: “Ngam ɗume ɗaanotooɗon? Umme, tore ngam taa on nasta jarribeeki!”

Naŋngeeki Yeesu

(Matta 26:47-56; Markus 14:43-50; Yuhanna 18:3-11)

47Nde Yeesu ɗon wolwa tawon, yimɓe ngari. Bi'eteeɗo Yahuuda, gooto nder sappo e ɗiɗo go ɗon ardi ɓe. O ɓaditi Yeesu ngam o hebbo ɗum. 48Yeesu wi'i mo: “Yahuuda, bee kebbaaki zammbortooɗa Ɓii-neɗɗo na?” 49Nde wonduɓe bee Yeesu ngi'i ko tammi laataago, ɓe mbi'i: “Jawmiraawo, min coppa ɓe bee kaafahi na?” 50Gooto maɓɓe soppi suka hooreejo liman'en, ta'i mo nofru nyaamru. 51Ammaa Yeesu wi'i: “Acce ɗum!” O meemi nofru gorko go, o yamɗitini mo.

52Ɓaawoɗon Yeesu wi'i mawɓe liman'en e mawɓe aynooɓe haykaliiru e ndotti'en warɓe naŋngugo mo: “Koni on ngari bee kaafaaje e cabbi ngam naŋngugo yam bana mi pasoowo? 53Nyalɗe fuu mi ɗonno bee mooɗon nder haykaliiru, on naŋngaay yam. Ammaa jonta ɗum saa'iire mooɗon e baawɗe nyiɓre#Lk 19:47; 21:37..”

Piyer wi'i o anndaa Yeesu

(Matta 26:57-58,69-75; Markus 14:53-54,66-72; Yuhanna 18:12-18,25-27)

54Ɓe naŋngi Yeesu, ɓe njahri mo haa saare hooreejo liman'en. Piyer ɗonno tokki ɓe daayiiɗum. 55Ɓe kuɓɓi yiite caka daldal saare, ɓe fuu ɓe njooɗodi. Piyer boo jooɗi caka maɓɓe. 56Paanyo debbo, korɗo nder saare man yi'i o ɗon jooɗi kommbi yiite, laari mo, wi'i: “Gorko oo boo ɗonno wondi bee maako.” 57Ammaa Piyer yeddi ɗum, wi'i: “Kay debbo, mi anndaa mo sam.” 58Ɓaawo seɗɗa goɗɗo feere boo yi'i mo, wi'i: “An boo, a gooto maɓɓe.” O wi'i: “Kay! Gorko, mi wonaay nder maɓɓe.” 59Ɓaawo saa'iire woore goɗɗo feere tabitini haala man, wi'i: “Fakat gorko oo ɗonno wondi bee maako, o Galiiliijo maa!” 60Piyer jaabi: “Gorko, mi anndaa ko ngiɗɗa wi'go.” Diga o timminaay wolwugo, asgumri#22:60 Asgumri malla agugumri. u'i. 61Jawmiraawo yeesiti, laari Piyer. Nden Piyer siftori ko Jawmiraawo wi'no mo: “Hiddeko asgumri u'a hannde, a wi'an nde tati a anndaa yam.” 62Piyer wurti haa yaasi, woyi masin.

Jancuki Yeesu

(Matta 26:67-68; Markus 14:65)

63Yimɓe aynooɓe Yeesu njanci mo, ɓe piyi mo. 64Ɓe cuddi gite maako, ɓe ƴami: “Heɓtu, moy fiyi ma?” 65Ɓe mbolwani mo bolle kuɗooje goɗɗe ɗuuɗɗe.

Yeesu yeeso mawɓe

(Matta 26:59-66; Markus 14:55-64; Yuhanna 18:19-24)

66Nde weeti, ndotti'en Yahuudu'en e mawɓe liman'en e moodiɓɓe tawreeta mooɓtotiri, ɓe ngaddi Yeesu haa dawriinde maɓɓe. 67Ɓe mbi'i: “To an woni Almasiihu, wi' min.” Yeesu jaabi ɓe: “To mi wi'i on ɗum, on nuɗɗintaa. 68To mi ƴami on boo on njaabataako. 69Yeeso ɗo Ɓii-neɗɗo jooɗoto haa nyaamo Allah Baawɗo.” 70Ɓe fuu ɓe mbi'i: “An kam a Ɓiɗɗo Allah na?” O jaabi ɓe: “Nonnon bana on mbi'i.” 71Nden ɓe mbi'i: “En ngoodi haaje seedamku fahin na? Enen bee ko'e meeɗen en nani ɗum diga hunnduko maako!”

Currently Selected:

Luka 22: FBDC

Highlight

Copy