Luka 23

Yeesu yeeso Pilaatu

(Matta 27:1-2,11-14; Markus 15:1-5; Yuhanna 18:28-38)

1Ɓe ummodi ɓe fuu, ɓe njahri Yeesu haa Pilaatu. 2Ɓe puɗɗi wullaago mo, ɓe mbi'i: “Min tawi gorko oo ɗon ummina tuurtol caka ummaatoore amin, o ɗon haɗa yimɓe yoɓugo garaama haa Kaysara, o ɗon wi'a boo kaŋko woni Almasiihu, laamiiɗo.” 3Pilaatu ƴami mo bana ni'i: “An woni laamiiɗo Yahuudu'en na?” Yeesu jaabi mo: “Nonnon bana mbi'ɗa.” 4Pilaatu wi'i mawɓe liman'en e mooɓre fuu: “Mi tawaay koo ɗume haa gorko oo ngam hiitaago mo.” 5Ammaa ɓe tiinani wi'ugo: “O ɗon tuurtina ummaatoore bee waazingo nder lesdi Yahuuda diga Galiili, haa yotti haa ɗo.”

Yeesu yeeso Hirudus

6Nde Pilaatu nani ɗum, o ƴami to gorko oo o Galiiliijo. 7Nde o nani Yeesu iwi haa maral laamu Hirudus, o neldi mo haa Hirudus, ngam nyalɗe man Hirudus ɗonno haa Urusaliima. 8Nde Hirudus yi'i Yeesu, o seyi seyo maŋngo, ngam duuri o yiɗno yi'ugo mo, ngam o nani ko ɓe mbi'no dow maako, o tammi o yi'anno Yeesu waɗan alaama kaayeefiiha feere. 9O ƴami mo ƴamɗe ɗuuɗɗe, ammaa Yeesu jaabaaki mo koo ɗume. 10Mawɓe liman'en e moodiɓɓe tawreeta ɗonno ton. Ɓe ngulli mo bee semmbe. 11Hirudus e sooje'en muuɗum njanci mo e ɓe njawi mo. Ɓe ɓorni mo mojaare ɗelkannde, ɓe lorni mo haa Pilaatu. 12Nyannde man nden Hirudus e Pilaatu coobiri, ngam aran ɓe narrataano.

Ɓe kiiti Yeesu kiita maayde

(Matta 27:15-26; Markus 15:6-15; Yuhanna 18:39—19:16)

13Pilaatu mooɓti mawɓe liman'en e mawɓe yimɓe e yimɓe fuu. 14O wi'i ɓe: “On ngaddani yam goɗɗo oo bee wi'go o ɗon ummina tuurtol caka ummaatoore. Ndaa, mi ƴami mo yeeso mooɗon, mi tawaay aybewol haa maako nder ko ngullirɗon mo. 15Hirudus boo tawaay, ngam o lorni mo haa meeɗen. Gorko oo waɗaay koo ɗume ko he'i mbarugo mo. 16Ngam maajum mi ɓoccan mo, mi yoofan mo.” 17Ngam kala juulde Paska fuu, doole Pilaatu yoofana ɓe fursinaajo#23:17 Fursinaajo malla kaɓɓaaɗo malla daŋngayjo. gooto. 18Ɓe puɗɗi wookugo bee semmbe, ɓe fuu: “Mbar gorko oo! Yoofan min Barabbas!” 19Gorko oo nastinaama fursina ngam fitina feere nder berniwol e ngam daliila mbar-hoore boo. 20Pilaatu wolwani ɓe fahin ngam o yiɗi yoofugo Yeesu. 21Ɓe kooli bee sawtu: “Ɓil mo haa leggal gaafaaŋgal! Ɓil mo!” 22Pilaatu wi'i ɓe nde tataɓre: “Aybe ɗume o waɗi? Mi tawaay aybe haa maako ko he'i mbareego sam. Mi ɓoccan mo, nden mi yoofa mo.” 23Ammaa ɓe tiinani ɗum, ɓe mbaɗi hoolo maŋngo, ɓe ngiɗi o ɓile haa leggal gaafaaŋgal. Hoolo maɓɓe jaali mo. 24Pilaatu yerdi waɗango ɓe ko ɓe ƴami. 25O yoofi nastinaaɗo fursina ngam fitina e mbar-hoore, mo ɓe ƴami go, o hokki ɓe Yeesu haa ɓe mbaɗa mo ɗum ko ɓe ngiɗi fuu.

Gaafeeki Yeesu

(Matta 27:32-44; Markus 15:21-32; Yuhanna 19:17-27)

26Nde ɓe ɗon njahra Yeesu, ɓe potti bee Simon, goɗɗo Sirene, ɗonno warta ladde. Ɓe naŋngi mo, ɓe ndoondi mo gaafaaŋgal haa o tokko Yeesu ɓaawo.

27Mooɓre ɗuuɗnde tokki mo. Rewɓe piyi biɓɓe muuɗum'en, mboyi mo. 28Yeesu yeesiti gal maɓɓe, wi'i: “Rewɓe Urusaliima, taa mboye ngam am. Ammaa mboyane ko'e mon e ɓiɓɓe mooɗon. 29Ngam ndaa, nyalɗe ngaran ɗe ɓe mbi'an: Seyo laatani rewɓe rimarɓe, ɓen meeɗaay danyugo e musiningo. 30Nden yimɓe mbi'an kooseeje: Ndo'e dow amin! Ɓe mbi'an towndiije boo: Cudde min#Hos 10:8; WY 6:16.! 31Ngam to ɓe ngaɗani leggal keccal bana nii, noy ɗum laatorto ngam joorŋgal boo?”

32Ɓe njahri worɓe halluɓe ɗiɗo, ngam haa ɓe mbarda ɓe bee Yeesu. 33Nde ɓe njotti haa nokkuure wi'eteende Gumbal-hoore, ɓe ɓili mo ton, bee halluɓe ɗiɗo go fuu, gooto haa nyaamo, gooto boo haa nano. 34Yeesu wi'i: “Baabiraawo, yaafa ɓe, ngam ɓe anndaa ko ɓe mbaɗata.” Ɓe cenndi limce maako hakkunde maɓɓe bee fiyugo caaca#Jab 22:19.. 35Ummaatoore ɗonno ndari ton, laara. Mawɓe Yahuudu'en njanci mo, ɓe mbi'i: “O hisni woɗɓe, o hisna hoore maako boo kadi, to o Almasiihu, mo Allah, cuɓaaɗo!” 36Sooje'en boo njanci mo, ɓe ɓaditi mo, ɓe ndokki mo lammuɗam, 37ɓe mbi'i: “To a laamiiɗo Yahuudu'en kam, hisnu hoore ma kadi!” 38Ɓe mbinndi haa dow leggal gaafaaŋgal ngal ɓe ɓili mo: “Oo woni laamiiɗo Yahuudu'en.”

39Gooto nder halluɓe ɓildaaɓe bee maako go, huɗi mo, wi'i: “Naa an woni Almasiihu na? Hisnu hoore ma an e minin boo!” 40Ammaa ɗiɗaɓo feli mo, wi'i: “A hulataa Allah na? An, a kiitaaɗo boo. 41Ngam meeɗen kam kiita ka foti deydey kuuɗe meeɗen, ammaa kaŋko walaa halleende nde o waɗi.” 42Nden o wi'i: “Yeesu, siftoram saa'i ngarata nder laamu maaɗa.” 43Yeesu jaabi mo: “Gooŋga mbi'anmaami, hannde a wondan bee am nder aljanna.”

Maayde Yeesu

(Matta 27:45-56; Markus 15:33-41; Yuhanna 19:28-30)

44-45Yaake man ɗum caka nyalawma, nden nyiɓre waɗi dow lesdi fuu haa yotti saa'a tati. Naaŋge moji. Wiirndallo nder haykaliiru seeki caka cak#Gurt 26:31-33.. 46Yeesu towni sawtu bee semmbe, wi'i: “Yaa Baabiraawo, mi ɗon halfina ruuhu am nder juŋngo maaɗa.” Ɓaawo nde o wolwi bolle ɗe'e, o maayi#Jab 31:6.. 47Nde ardiiɗo dow sooje'en Roma teemerre yi'i ko laati, o teddini Allah, o wi'i: “Fakat, gorko oo o adiliijo.” 48Yimɓe warnooɓe laarugo fuu, nde ɓe ngi'i ko laati, ɓe kuuci, ɓe ɗon piya biɓɓe maɓɓe#23:48 Fiyugo wiɓɓere, ɗum alaama mettamɓeram.. 49Soobiraaɓe maako fuu e rewɓe tokkinooɓe mo diga Galiili, ndari daayiiɗum, ɗon ndaara kuuje ɗe'e#Lk 8:2-3..

Uweeki Yeesu

(Matta 27:57-61; Markus 15:42-47; Yuhanna 19:38-42)

50-51Woodi goɗɗo bi'eteeɗo Yusufu, mo berniwol lesdi Yahuuda, bi'eteeŋgol Arimate. O booɗɗo, adiliijo. O ɗonno reena garoyki laamu Allah. O ɗon caka dawrooɓe, ammaa o hawtanaay woɗɓe nder dabare e kuuɗe maɓɓe. 52O yehi haa Pilaatu, o ƴami ɗum ɓanndu Yeesu. 53O jippini ndu diga gaafaaŋgal, o hasni ndu bee kasa kesa, nden o wallini ndu nder yenaande wasaande nder tapaare, nde goɗɗo meeɗaay wallineego nder muuɗum. 54Ɗum nyannde taaskara siwtorde. Nde ɓadino nastugo.

55Rewɓe wardunooɓe bee Yeesu diga Galiili, njahdi bee Yusufu, ɓe ndaari yenaande e bana noy ɓanndu Yeesu wallinira. 56Ɓe lori, ɓe taaskitini leɗɗe uurɗe e uurdi.

Nden ɓe ciwti nyannde siwtorde fodde tawreeta#Gurt 20:10; TT 5:14..

Currently Selected:

Luka 23: FBDC

Highlight

Copy