MFA' MGHƐ NTHƏM 19

Polo ŋwak Efeso

1Polo lə tsəŋ fɑ m nə gùŋ mkúŋ ŋkhəm Efeso, cwə yə Apolos lə bɑ Korinto a. E lə ko wə jɔ shɑ mghɛ zhi'nwə 2biŋ həŋtə wap gɑ: Po kě ŋkwi Zhwenyə Dɔlɔ̌ cwə yə po kɑ cʉ' mghɛ piŋ a? Da' gɑ wap pa' bi e gɑ̀, pyə lam ju' bɑ pa' pu gɔm nwə nə Zhwenyə Dɔlɔ̌ a. 3Polo həŋtə wap gɑ, pu lə nu' wɔ pɑ nə kɑ? Wap ghɔm gɑ: Pyə lə ŋkwi pɑ shyə Yohane. 4Polo piŋ gɔm gɑ: Yohane lə nu' pɔ shyə pʉɔtʉm, biŋ həŋtə bi pɔmnəŋ gɑ wap piŋ Mo yə e gɔ sɔ' təm jʉ̀m e a; yəŋ la'tə gɑ Yeso. 5Wap lə yu' shwə e, ŋkwishyə nə tsǒ Cyəpɔ Yeso, 6Polo yap bu nə pu, Zhwenyə dɔlɔ̌ sɔ' nə pu. Wap ghɔm mghɔ̀m, gɔm nwə nə tso Si. 7Guŋ yap awɛ lə bɑ pɔ shwɔppʉə mghǎm.

Ghɔm Polo Efeso

8Polo lə́ bɑ gɔ dyə sinagogə guŋ mcwə awɛ, po'o nə mŋwə̀ tà, bɑ gɔm nwə nə Nəfo Si tə pwɔk, ŋkhaktʉɔ nə ghə gɑ pɔ pyə wap lə bɑ si ju' ywə yə é gɔm a piŋ. 9Cwə yə shɑ pɔ lə pɑ̀ sɔksɔk, dɑ nthə nə piŋ, bɑ shap məjyə̀ Si pɑ cəcɑ̌ pɔmnəŋ a, Polo tə́m nə pu, biŋ dɑ mghɛ zhi'nwə nə gɔ jʉ̀m, bɑ gɔm nwə bi pù guŋ mtyɛ'dzʉ awɛ dyə zhi'tə Tirano. 10A lə pɑ̌ pɑ po'o nə gu' pʉ̌ə, tɑ guŋ pɑ Azia, pɑ Yudea ba pɑ Grikia yu' ghɔm Cyəpɔ.

Nwə shɑ pɑ zhəŋ mzhwenyə

11Si lə shyə́ m nə bǔ Polo bɑ́ gə kwa' msya. 12Tə́ pu pɑ dɑ bak dzə myə a kwak nə bəŋ nɑ Polo, jap nə mghɛ ghó, mghò map mi, mzhwenyə cwəpuŋ pɑ nthəm nə pù gɔ̌. 13Shɑ̀ pɑ Yudea, pɑ kəka jəŋ mzhwenyə cwəpuŋ lə to' yap nə pɑ ŋkhe tso Cyəpɔ Yeso nə pɔ pyə mzhwenyə cwəpuŋ lə bɑ̀ nə pu a. Wap lə gɔm gɑ: Gɑ gɔm bu nə tso Yeso yə Polo shyanyə a. 14Pǒ mu' tadyə mkamsi yə Yudea tso tsyə pɑ Seva, pó sɔmbʉə lə fo' yap mghətsə bɔ. 15Zhwenyə cwəpuŋ ghɔm bi pu gɑ: Gɑ zhyə́ Yeso biŋ jyə́ mo yə Polo bɑ yʉ̀ a. Tɑ sɔ' m nə po, pó bɑ̀ pɑ wɑ? 16Bɛ yə zhwenyə cwəpuŋ lə bɑ̀ nə e a lə piŋ deŋ ntham nə pu, shyə̀ wap awɛ, shwɔ wap tə wap nə thə́tə tam pe, dzə lə yɑ dəm sɔmmo, bɑ mfiŋ lo nə pu. 17Guŋ pɑ Efeso awɛ, ba pɑ Yudea pu a pɑ Grikia lə yu' nwə bɔ, pwɔk ko nə guŋ yap awɛ, wap pɑ jwɔp dəŋ pa' a bɑ tso Cyəpɔ Yeso ghú' a.

18Pɑ piŋ kwa' vəŋ e lə sɔ' bɑ biŋ mnwə map tə thə́. 19Bo'gwyə pɔ pyə wap lə bɑ wap ko nə mkɛ a pɑ shu'tə mŋwa'nyə map pfɑ́ e, pɑ cəcɑ̌ pɔmnəŋ ntho. Pu pɑ sɛ dəŋ e jɔ gɑ ŋkhap lə bɑ nə bi a pɑ a twɔk tsə bɛ sha' mghamnthɔ́. 20A pɑ po' o bɑ shyə́ m nə gʉ' Cyəpɔ ghɔm pɑ ŋkwyə gɔ dzə biŋ bɑ gə dəŋ.

Paknyə Efeso

21A lə cyə́ m nə mnwə bɔ, Polo cyə m nthʉm Zhwenyə jap gɑ̀ e gɔ ghɔ Yerusalɛm, nə ghɔ cyə m Makedonya ba m Akaya. E lə piŋ gɔm gɑ: Gɔ tə ŋkho Yerusalɛm bɑ gɑ̌ gɔ piŋ ghɔ Roma. 22E lə təm Timotio pu Erasto pyə wap lə bɑ mkwipu pyə a Makedonya, biŋ na' shwə Azia.

23A lə pɑ̀ cwə o bɔ, kwa' mu' mɑ paknyə təm du nə nwə məjyə. 24Nə pa' Demetrio, mu' gɛfa' və nə mtʉɔ́ gɔl yə e lə dɑ mtʉɔ ŋkhap nthə mfo' pa' dyə Artemis lə shyə m nə və bɔ pu a mghɛ fa' pyə pɑ gə mɑ fʉ' gwyə. 25E lə cu'tə mghɛ fa' pyə pu a pɔ pyə wap lə fa' pɑ nə tsə bɔ a, gɔm bi pu gɑ: Mso pɑ pó zhyə́ gɑ pɑ̌ vɔk pɑ nə fa' tsɔ gɑ tsyə pɑ fa' a. 26A nəŋ bɑ po'o po pɑ̀wə jɔ̀ biŋ jù' pa' pu wə gɔm, tə da' Efeso pɑ̀, ba m nthʉm guŋ Azia awɛ, pa' Polo wə ŋkhenyə la'lǎ' gə gɑ̀ wap zhyə pa' e gɔm a gɑ́ msi pyə wap fɑ nə bu mɔk pɑ á tə bɑ msi pɑ̀. 27A pɑ̀ po'o pu lə pɑ̀wə gwi da' fa' tsɔk pɑ pɑ̀, a pɑwə shʉ' muywə ba mɑ dyəsi Artemis lə piŋ bɑ sɔmywə pɑ́, dəŋ mɑ ghamtə yə guŋ Azia ba gùŋ dzʉ awɛ kɑ nə gamtə a, a mǐ.

28Pɔmnəŋ lə nə yu' ghɔm tsɔ gɑ, luŋ yap sə́, wap cwé pɑ dɔmnyə e gɑ: Artemis Efeso bɑ ě ghu'. 29Va' lə lɑ̌ guŋ tisuŋ awɛ, pu hyànyə̀ gɔ tsʉ' yə la' shu'tə nə a, nə cyə̀ gəm Gayo pu Aristarko pɑ Makedonya mso ghiŋ Polo. 30Polo yap gɑ e gɔ ghɔ tsʉ' cu'tə́, da'gɑ la' mghɛ zhi'nwə piŋ pɑ́. 31Bɑ shɑ́ mso pyə mtadyə Azia tɔk é gɑ e kɑ́ ghɔ tsʉ'u, nə pa' bi a pɑ̀ ywə ghə é.

32Bǎ ya mo lə́ lə́ bɑ̀wə shwé pɑ yə nthi tə la' sɔmmo pɑ́wə ju' yə́ yə mu' mo. Bɑ va' yɔm tə la' shɑ pɔ pɑ́wə jyə̀ ba ywə yə pu shù'tə nə a. 33Shɑ pɔ cəcɑ̌ vəŋ po lə ghɔm gɑ a bɑ nwə Aleksandrə: Pɑ Yudea thə́ e shya dzə. Aleksandrə lə lɑ̌ pu e gə mtiŋ gɑ e gɔ ghɔmnwə dzə cu'tə. 34Pu lə nə yu' gɑ e bɑ yə Yudea, guŋ pɔ awɛ zhwyanyə nə mnam pʉ̌ə bɑ gɔm gɑ: Artemis Efeso bɑ ě ghu'! 35Dwɔ'cam lə ghə̌ tə pɔmnəŋ lɛ́tə, e ghɔm gɑ: Wɔ pɑ Efeso mu' mo wə bɑ e ka zhyə gɑ tisuŋ Efeso bɑ tisuŋ dɔlɔ̌ bi Artemis bɑ bi kətwɔk e yə a lə fɑ kɛbəŋ shʉm a? 36Pa' sɔmmo tə wə ŋkhəŋnyə a pɑ, a puŋ gɑ po lɛ́tə́ bwɔk va'. 37Pɔ pyə po dɑ wap sɔ' a, sɔmmo nə pu kɑ hɔ mcò', e lə̀ nəŋ jəmtə si yɔk pɑ. 38A pɑ gɑ Demetrio ba mghɛ fa' pyə̀ wap jʉm e a pu a mo ghə shɛ́, bɑ tyɛ' nə fyɛ' shɛ́ bɑ wə̀, pɑ ya'shɛ́ piŋ bɑwə, Guŋ yap awɛ ghɔ dyə fyɛ'. 39Bi a shɑ̀ mnwə piŋ jɑ si a, bɑ cu'tə nə gɔ ti nyaptə. 40Pɑ si po'o bi a pɑ̀ pu putə wɔk pɑ nə cu'tə yə̌ŋ gɑ́ pɑ̌ tʉɔthə́ bi pɑ sa' guŋ, nə pa' sɔmywə yə bi a pɑ́ pɑ̀ ghɔm gɑ́ ya nə gə tə pɑ cu'tə tə bɑ mco' zhyə́ biŋ bíŋ a, a tə wə pɑ. 41E lə ghɔm pɔ cwəlɔ, shwɔ' cu'tə.

Currently Selected:

MFA' MGHƐ NTHƏM 19: NTGomala

Highlight

Copy