PEMUYAN 12
12
Parat kuʹo kenap penaru
1Dalau ina un Laja Herudis cuk dulu nai nyakit palai diaʹ neng Mpun diaʹ ngelan Tuhan. 2Kun dulu lematai Yakup, sadin Yaya ne, man bahing. 3Tisen ne ban Herudis, lepoʹ Yahudi ubaʹ neng pemuyan ina, penco ho cuk dulu tai dakep Peterus pelaʹa. (Dalau ina tegoʹ Adet Ruti iaʹ are un lamut, iaʹ kahum neng adet Paska iaʹ menting patai.) 4Lepa re mapo Peterus, kun nte naʹ ia kedalem amin sepin, kun nte cuk puloʹ nem usa sedadu keliwa jagaʹ ia, tahaʹ pat usa, tahaʹ pat usa re. Un kimet Herudis ubaʹ ke ngkin Peterus ngejuma lepoʹ ina tegoʹ ketai kuʹo adet Paska ina. 5Ina ukoʹ Peterus tai peput dalem amin sepin. Naʹ pia pekina, Mpun diaʹ ngelan Tuhan dina abeʹ de un beto dau lemameʹ mia palaʹ Tuhan ngan sanget de.
Peterus pesau cen amin sepin
6Dalau alem kena ketai ke sihoʹ tau iaʹ Herudis ubaʹ ke tai ngkin ia ngejuma dulu, un Peterus ne luntoʹ neng ahang dua usa sedadu, peging ngan dua re beka malat neng ia. Un pe palai sedadu jagaʹ kaʹ lung pamen amin sepin ina. 7Belekaʹ kenai ca usa melikat Tuhan nekejeng kina, ngan ca serema ngedema amin sepin ina. Penco ho nepap liʹip Peterus naga ia kuma: “Nyelarai ne ikoʹ beteʹ.” Beliʹau lero le mung beka ha neng ujoʹ o. 8Un dau melikat ina neng ia: “Mahat ne seketeng ngkoʹ. Un ne kasut coʹ.” Seʹ Peterus bayaʹ dau ue. Un dau melikat ina neng ia pelaʹa: “Un ne sapai hoʹ. Nai ne bayaʹ akeʹ.” 9Nai kun Peterus bayaʹ ia kawang, petem abeʹ e tisen tekaʹ a lan. Kaʹ kimet te, seʹ e ngenupi tuaʹ le. 10Tai re dua pelapa sedadu diaʹ jagaʹ iaʹ ading ading, ngan lapa iaʹ kedua ha, abeʹ ne ida dua kaʹ pamen malat iaʹ sileʹ tahaʹ lepoʹ. Belekaʹ nyahin kenai pamen ina pesik ne. Penco kenai re dua kawang, masat bayaʹ ca janan. Beliʹau abeʹ un ne melikat ina ngan Peterus.
11Uʹo kenai Peterus tisen kaʹ ban neng pemuyan ne, un dau ue: “Naʹkini ketai heʹ tisen lan, atek Tuhan lete iaʹ ban cuk melikat te nai nakau akeʹ cen gaham Herudis, pekina pe cen puyen pengubaʹ lepoʹ Yahudi dina.”
12Uʹo ho tisen neng mung pemuyan ina, tai ie kaʹ amin Mariam ueʹ Yaya, iaʹ ipa ngadan ne Markus. Un kina kadoʹ dulu pempun dalau re lemameʹ Tuhan. 13Kun Peterus megoʹ pamen bioʹ ina, nai ca usa dekiʹit leto, ngadan ne Rude, ubaʹ ke naʹat aheʹ iaʹ megoʹ ina. 14Tisen ne ia dau isiu Peterus. Abeʹ ne ia mesik pamen ina nuʹo moʹ bangen tekaʹ a. Tai ie ngasa kedalem, badaʹ Peterus un nekejeng tahaʹ awang pamen. 15Un dau re neng ia: “Seʹ koʹ ngebuen dau ue.” Di ie un leto ina sebelang lan dau ue neng iaʹ ia badaʹ ina. Kun dau re pelaʹa: “Masaʹ melikat Peterus ina.”
16Naʹ pe pekina, abeʹ Peterus pekenaʹ megoʹ pamen. Ketai re mesik pamen ina neng kebayaʹ a. Tegoʹ re taʹan ia, salam laleʹ tekaʹ de. 17Kun Peterus pekata seʹ man ujoʹ o ke peberinga ida. Penco ho badaʹ mida kumpin ban Tuhan ngkin ia kawang cen amin sepin ina. Kun Peterus cuk ida badaʹ puyan ina me Yakup ngan diaʹ cenganak de diaʹ ca dalem Tuhan ne ʹo. Uʹo ina kun ne mecin ngan tai kaʹ ca te.
18Uʹo kenai dema, maho laleʹ le dau sedadu didai neng puyan ban ketai Peterus ne kelap. 19Un Herudis ia cuk dulu tai mita Peterus, un ʹo abeʹ de taʹan ia. Sulo re petugen ne lemutu mung nte diaʹ jagaʹ Peterus are. Kun Herudis cuk dulu lematai ida nuʹo.
Uʹo ina un Herudis puke cen tanaʹ Yudia tai kaʹ lepoʹ Kaisaria, kun ne ngelineʹ kina.
Herudis matai
20Miʹa laleʹ Herudis neng lepoʹ Tirus ngan lepoʹ Sidun, ina ukoʹ lepoʹ ina peseket nai palaʹ Herudis pedenaʹ dau mia. Ading ading ida mayo kimet Belastus ne, moʹ ia iaʹ ngkang gayeng dalem amin laja ina. Kun nte pekuaʹ tai nyat lesau, uyan tiga saheʹ Herudis ngan nte, moʹ un dale Tirus ngan Sidun nyahaʹ penguman nte neng dale laja ina.
21Un ca tau iaʹ tengangan ida petuket, ukoʹ Herudis ke un gelam paren ne, ketai ie madung neng usun adan paren ne, mentung nge petiraʹ mida dina mung. 22Sulo ngahi dau re: “Ini ne dau tiraʹ ca Allah, abeʹ e dau tiraʹ kelunan,” kun dau re. 23Tegoʹ ina, Herudis sihoʹ kenca melikat Tuhan, moʹ abeʹ e nyelama palaʹ Allah. Ina ukoʹ matai ne ia kuʹun ban kua uman ia.
24Tira Allah tai denga kuʹo ke, ngan un pit un pit ne dulu diaʹ ngelan ne.
25Nai ngeliwet ne Barnabas ngan Saul cen Yerusalim, moʹ sukung ne gayeng nte kina. Mentung nte ngkin Yaya Markus tugung ida.
Currently Selected:
PEMUYAN 12: KNT
Highlight
Share
Copy
Want to have your highlights saved across all your devices? Sign up or sign in
Kenyah New Testament © Bible Society of Malaysia, 1984.
