PEMUYAN 13
13
Tuhan lemileʹ Barnabas ngan Saul tai lawa ha
1Neng Mpun diaʹ ngelan Tuhan kaʹ lepoʹ Antiukia, un pe kudaʹ kadoʹ pegawa Tuhan ngan guru, iaʹ ina Barnabas, ngan Simiun (iaʹ dulu naʹ Saleng), ngan Lukius (lepoʹ Kirini), ngan Menahem (cenganak ca ueʹ ngan Laja Herudis iaʹ ngkang ca tulat neng iaʹ kepat dale ina), ngan Saul. 2Dalau re pat lemameʹ Tuhan ngan lemalan abeʹ un uman, un dau Berua Buheʹ neng ida: “Nengen ne Barnabas ngan Saul makeʹ, idi re tai mejo gayeng ngkeʹ neng iaʹ ukoʹ keʹ mengin ida.”
3Kun nte lemameʹ Tuhan ngan lemalan abeʹ un uman laʹa, sulo re napo ujoʹ de neng ida dua Saul ngan Barnabas, penco re cuk ida dua tai puke?
Kaʹ tanaʹ Siperus
4Ban Berua Buheʹ iaʹ cuk ida dua, ina ukoʹ de dua tai kaʹ bahi kaʹ lepoʹ Selukia. Cen ina tai re ngedung neng kapen ia tai kaʹ tanaʹ Siperus. 5Dalau re abeʹ kaʹ lepoʹ Salamis, kun nte badaʹ tiraʹ Allah dalem amin sebayang Yahudi. Un Yaya Markus, ia mepo ida dua.
6Dalau ketai re nipo tanaʹ ina, abeʹ ne ida kaʹ lepoʹ Papus. Kun nte petegoʹ ngan ca laki iaʹ mencam pucau, ina ca usa pegawa palo, lepoʹ Yahudi. Un ngadan Yahudi ie Bar-yesus. 7Ia malai ngan Sergius Paulus, laki bioʹ gebenur tanaʹ ina. Ca laki iaʹ mencam pekimet gebenur ina. Ia mengin Barnabas ngan Saul nai palaʹ ia, moʹ o ubaʹ ke kenahan dau tiraʹ Allah. 8Un laki iaʹ mencam pucau ina, Bar-yesus ne, (Ilimas ngadan ne neng isiu Gerika,) ia nyakat Barnabas ngan Saul, moʹ o ubaʹ ke nyalaʹ laki bioʹ gebenur ne tai coʹ neng pengelan ne neng Tuhan. 9Un Saul, iaʹ ilu kuma Paulus ina, sangan ne kuʹun Berua Buheʹ. Kun ne nekeneng naʹat laki pucau ina. 10Un dau ue: “E anak Bali Jaʹat, ikoʹ iaʹ sangan kuʹun naʹan naʹan aken pelingu ngan palo. Ikoʹ ne iaʹ atek pebunoʹ neng iaʹ teneng. Lemuto-uto hoʹ ngileng janan Tuhan iaʹ telit ini. 11Ke sihoʹ koʹ kuʹun ujoʹ Tuhan naʹkini ʹo. Ke butaʹ pe ikoʹ puʹo kuʹun ne. Abeʹ koʹ ke taʹan dema mata tau ceng kajan uʹo.”
Tegoʹ ina lete Ilimas tai burau ngan mentem mata ha. Sulo ho jagap-jagap ketai mita dulu ke ajak ia. 12Kun laki bioʹ gebenur ina taʹan diseʹ puyan ina, ngelan ne gebenur neng Yesus, mentung nge salam laleʹ tekaʹ a neng katuk Tuhan ne.
Kaʹ lepoʹ Antiukia tanaʹ Pisidia
13Un Paulus ngan ida diaʹ ngan ne kina, ketai re ngedung neng ca kapen iaʹ ketai puke cen Papus, tai kaʹ Perga kaʹ tanaʹ Pampilia. Un Yaya Markus, nai ie mecin ida kina, penco tai ie ngeliwet kaʹ Yerusalim. 14Ketai Paulus ngan Barnabas penco masat cen Perga pa abeʹ kaʹ Antiukia kaʹ tanaʹ Pisidia. Sulo ketai re madung kedalem amin sebayang Yahudi tegoʹ Tau Kelineʹ. 15Uʹo lepa dulu baca Kitap Katuk Adet Musa ngan Kitap Pegawa Tuhan, kun diaʹ tuʹa neng amin sebayang Yahudi ina cuk ca usa tai kata ida dua, kedau re: “Amai, buk un ca katuk ikem dua ke petangen dau neng lepoʹ ini, badaʹ ne mameʹ.” 16Kenai Paulus beteʹ, mentung nge pekata man ujoʹ o, un dau ue:
“Ahaʹ mung ngkem cenganak keʹ lepoʹ Israil, ngan mung ngkem diaʹ tunuk neng Allah, ngeringa ne. 17Ban Allah, Tuhan lepoʹ Israil ini lepa lemileʹ tepun le, ngan cuk lepoʹ ina nai kapan dalau re mudip kena le kaʹ tanaʹ Masir are. Allah iaʹ ngkin ida nai kawang cen Masir ne man puyan nyingan ne. 18Toʹ ban majan nte kihoʹ kihoʹ pat puloʹ uman kaʹ tanaʹ lenga, Allah pedenaʹ tawai ie neng ida. 19Allah ia pesalai tujoʹ naʹan lepoʹ kaʹ tanaʹ Kanaan, moʹ o ke naʹ tanaʹ ina me tepun le. 20Kihoʹ kihoʹ pat ato lema puloʹ uman majan ne ida un tanaʹ ina kena ke un diaʹ pebetep tiraʹ.
“Uʹo ina le Allah uyan palai laki pebetep tiraʹ, pa abeʹ kenai udip pegawa Samuil. 21Lepa ina laʹa, ketai tepun le nyat ca paren bioʹ. Kun Allah cuk Saul anak Kis tai paren bioʹ de. Saul ne ca usa mela cen Benyamin. Pat puloʹ uman pengajan ne paren bioʹ 22Uʹo lepa Tuhan Allah sau Saul, penco ho cuk Daut paren bioʹ mida. Ngan pekini dau Allah badaʹ neng ia: ‘Lepa ne akeʹ tisen Daut anak Isai, ca usa iaʹ sihoʹ neng kimet ceʹ; ia ca laki iaʹ ke bayaʹ mung pengubaʹ keʹ.’ 23Cen mela Daut ne kenai Yesus, ca usa ia atek ban Allah cuk Keniga Udip lepoʹ Israil, bayaʹ ban dau tuket Allah cen naʹaʹ are. 24Kena kenai Yesus nading gayeng nge, un Yaya badaʹ tiraʹ me mung lepoʹ Israil, cuk Israil nesen ngan nyepuleʹ kimet de, ngan cuk ida sihoʹ ngebatis. 25Kena Yaya ke pesukung gayeng nge, un dau ue neng dulu: ‘Ikem kenaʹ aheʹ keʹ tupe? Akeʹ ne, abeʹ akeʹ iaʹ ikem ke mengaʹ kenai idi. Lan dau heʹ, un ca usa iaʹ kenai bayaʹ akeʹ ʹo, di pe ke ngelesoʹ sepatu neng taket te, abeʹ pe akeʹ tekep.’ Pekina dau Yaya.”
26Sulo dau Paulus laʹa: “Ahaʹ amai, ngan cenganak, tepat diaʹ kini mung, ikem diaʹ su mela Ibrahim, ngan mung ngkem diaʹ ca diaʹ tunuk palaʹ Allah, ban palaʹ tepat mung kenai denga katuk neng puyan iaʹ ke pudip kelunan dalem Tuhan ne. 27Un dulu diaʹ mudip kaʹ Yerusalim peging ngan diaʹ tuʹa re, abeʹ de tisen Yesus iaʹ Keniga Udip Kelunan, ngan abeʹ de tiesn sen tiraʹ dalem surat pegawa Tuhan iaʹ ida malai baca singket Tau Kelineʹ ne. Kenuen pia pekina, ida palup lete tiraʹ pegawa cen ban pemuyan nte ngukum Yesus ne. 28Naʹ pia abeʹ un ca tuman ukoʹ de ke lematai Yesus, kun nte nyat neng Pilatus ubaʹ ke lematai ia. 29Palup ne mung puyan isiu iaʹ un dalem Kitap neng Yesus ne, kuʹun dulu lepoʹ Yerusalim dina. Uʹo ina, kun nte muno patai Yesus cen kayu tecek, naʹ ia kentaʹ, penco re mahung ia kedalem liang. 30Un sepuʹo Allah pudip ia cen patai ie. 31Kenai ie luhaʹ dalem kudaʹ tau majan ne, kata ida diaʹ serengan ban masat ngan ne cen Galilia tai kaʹ Yerusalim are. Naʹkini ida dina diaʹ ban badaʹ tugen neng Yesus kaʹ lepoʹ Israil. 32Ameʹ dini iaʹ nai ke pedenga Denga Injil mikem. Ina puyan iaʹ Allah ban petuket ngan tepun le cen naʹa are. 33Naʹkini ne Allah lepa palup pe neng ilu diaʹ mela cen tepun le, moʹ o lepa pudip Yesus neng ca udip iaʹ tumpak. Koʹ baʹan ina are lete iaʹ un dalem Kitap Kentau Masmur, tulat kedua iaʹ pekini dau:
‘Ikoʹ lete Anak keʹ.
Tegoʹ tau ini akeʹ ne nuyan Amai hoʹ.’
34Ngan pekini pe dau tiraʹ Allah neng puyan ne ke pudip Yesus cen patai ie, apan ne abeʹ un tai madam. Kun dau ue:
‘Akeʹ ke naʹ te sio ngan peniga iaʹ buheʹ mikoʹ,
iaʹ akeʹ lepa petuket ke naʹ me Daut are.’
35Ina ukoʹ Daut pelaʹa pisiu kedalem ca jo Kitap Kentau Masmur diaʹ ca, kun dau ue:
‘Abeʹ koʹ ke dayo ulaʹ penyelum koʹ ketai madam.’
36Lepa ne Daut pegayeng bayaʹ pengubaʹ Allah ngajan udip pe, uʹo ina tai ie matai. Tai re masek ia, pedudo ia ngan tepun ne, ngan madam pe ia. 37Un sepuʹo Laki iaʹ Allah pudip cen patai ina, abeʹ e ke tai madam.”
38Sulo dau Paulus laʹa: “Ahaʹ cenganak keʹ, tepat mung, tekep kem tisen ban kuʹun Yesus ini kenai katuk iaʹ ke sau penyalaʹ. Ameʹ nai pedenga ha palaʹ ikem. 39Tai tisen ncem laʹa, mele aheʹ iaʹ ngelan Yesus, atek ke takau te ia cen ketoʹ penyalaʹ a. Moʹ abeʹ Katuk Adet Musa senteng nakau ikem cen penyalaʹ kem. 40Ina ukoʹ petawai tiga le ikem, malap ketai nuyan koʹ baʹan iaʹ lepa un dalem Kitap Pegawa are iaʹ pekini dau:
41‘Pekimet cem ading mung ngkem diaʹ ngetepet,
tai hem meba kena hem ketai matai.
Un gayeng iaʹ akeʹ pegayeng dalau pengudip kem in, abeʹ pe ikem ubaʹ ke ngelan kidi,
naʹ pe dulu ke badaʹ a mikem.’ Pekina dau Kitap Pegawa.”
42Dalau Paulus de dua Barnabas mecin amin sebayang Yahudi dina, un dulu kina nyat ida dua nai pelaʹa tegoʹ Tau Kelineʹ iaʹ bayaʹ ʹo, apan nte dua ke badaʹ katuk neng puyan dini pelaʹa ʹo. 43Lepa ne mpun ina pasi, kenai kadoʹ lepoʹ Yahudi pemung ngan kadoʹ dulu diaʹ lepa alaʹ adet Yahudi dina, nai re bayaʹ Paulus de dua Barnabas. Kun nte dua penco tiraʹ mida, ngan petangen ida ke tudep dalem pengelesau iaʹ Allah lebang naʹ mida.
44Tegoʹ Tau Kelineʹ iaʹ nai bayaʹ ina are nuʹo, nyeng ke muʹo lepoʹ ina nai pempun ngeringa tiraʹ Tuhan. 45Kun palai lepoʹ Yahudi dina taʹan ban kadoʹ kenai dulu, miʹet laleʹ le ida. Seʹ de nyakat tiraʹ Paulus ngan pejaʹat dau neng ia. 46Un Paulus ngan Barnabas makang kuʹo ke dau re dua pisiu. Kun dau re dua: “Tekep ne ameʹ nekena badaʹ tiraʹ Allah ini mikem. Un sepuʹo ikem nyekang tiraʹ Allah. Dalem puyan ina, seʹ kem ubaʹ ngukum usa hem tengen ne ina. Tepa ne ikem neng udip saheʹ keline iaʹ ngeriman. Ina iaʹ ukoʹ meʹ lepo ikem. Tai kun meʹ palaʹ dulu diaʹ tahaʹ awang Yahudi. 47Ina ban tengangan Tuhan cuk ameʹ, pekini dau ue:
‘Akeʹ naʹ ikem ca dema me dulu diaʹ tahaʹ awang Yahudi,
apan ncem tai ngkin puyan iaʹ ke pudip kelunan pa tipo tanaʹ.’ Pekina dau Tuhan.”
48Tai bangen diseʹ dulu diaʹ tahaʹ awang Yahudi, moʹde kenahan dau tiraʹ ina, mentung nte pada katuk Tuhan Allah. Un kudaʹ kadoʹ ne ida nai penco ngelan Tuhan, moʹ de lepa tenup tekaʹ ke alaʹ udip saheʹ kelineʹ iaʹ ngeriman cen Tuhan.
49Un tiraʹ Allah tai denga kuʹo ke pa tipo dale ina. 50Un palai lepoʹ Yahudi pekana neng diaʹ lataʹ lepoʹ ina, peging ngan leto diaʹ paren lepoʹ ina diaʹ sebayang palaʹ Allah dina. Pekina seʹ tading nte ubaʹ ke nyakit Paulus ngan Barnabas, penco re muyung ida dua tai kelap cen lepoʹ de. 51Kun nte dua lawa Injil dina nekaʹ abu taket de, uyan ca tedanaʹ neng lepoʹ ina, penco tai re kaʹ lepo Ikunium. 52Toʹ de diaʹ bayaʹ katuk Tuhan kaʹ lepoʹ Antiukia ina sangan kuʹun bangen ngan Berua Buheʹ.
Currently Selected:
PEMUYAN 13: KNT
Highlight
Share
Copy
Want to have your highlights saved across all your devices? Sign up or sign in
Kenyah New Testament © Bible Society of Malaysia, 1984.
