MATIUS 21

Luhaʹ diseʹ pengaren Yesus tai nyabeʹ lepoʹ Yerusalim

(Un te neng Markus 11.1-11; Lukas 19.28-40; Yaya 12.12-19)

1Dalau ketai re nyeng abeʹ kaʹ lepoʹ Yerusalim, penco tai re kaʹ Bit-pagi kata Mudung Ampang. Cen ina Yesus cuk dua usa diaʹ bayaʹ katuk ke tai nekena neng ida. 2Un dau ue neng ida: “Tai ne kaʹ lepoʹ iaʹ un tahaʹ tena neng ikem ina. Ketai hem abeʹ ʹo, ikem ke taʹan ca pun keledai iaʹ dulu nelu, peging ngan anak ke. Tiga hem mesau telu re, ngan nai ne ngkin ida palaʹ akeʹ. 3Ngan buk ke un aheʹ ke pisiu inu inu neng ikem, tiga hem badaʹ mia, kuma ha: ‘Amai ubaʹ ke un ida,’ ngan ia ubaʹ ke naʹ ida mikem tuaʹ ne.”

4Ini tai nuyan apan tai palup ne dau tiraʹ pegawa cen naʹaʹ iaʹ kuma ha:

5“Badaʹ ne palaʹ lepoʹ Siun:

Paren ncem kenai palaʹ ikem naʹkini.

Laki ina lemaʹ saheʹ, ngan ia ke ngedung neng mpau ca pun keledai,

iaʹ ina ca pun anak keledai.”

6Sulo diaʹ bayaʹ katuk Yesus dina tai tahaʹ tena, ngan uyan inu iaʹ ia lepa badaʹ mida. 7Sulo kenai re ngkin pun keledai ina, ngan anak ke. Kun nte naʹ sapai re neng likut pun keledai ina, penco tai Yesus ngedung neng ia. 8Kadoʹ laleʹ kelunan diaʹ medat sapai re neng janan. Un pe palai pelajap daʹan kayu ngan pajat te kaʹ janan. 9Kadoʹ kelunan diaʹ masat tahaʹ tena ngan tahaʹ bayaʹ Yesus, mentung nte ngelalo, un dau re: “Pempau ne Anak Daut. Allah ke naʹ peniga ha me ia iaʹ nai neng ngadan Tuhan. Pempau Allah.”

10Tegoʹ ketai Yesus nyabeʹ lepoʹ Yerusalim, mung lepoʹ ina muʹo tai maho ne dau re kuʹun ne. Un dau dulu lemutu: “Aheʹ ini tupe?”

11Un dau kelunan kadoʹ mipa ida: “Ini ne Yesus, pegawa cen lepoʹ Nasarit tanaʹ Galilia.”

Yesus tai kaʹ Umaʹ Palan Allah

(Un te neng Markus 11.15-19; Lukas 19.45-48; Yaya 2.13-22)

12Tai Yesus kaʹ dalem Umaʹ Palan Allah, penco ho pekarap dulu diaʹ pebeli kaʹ dalem Umaʹ Palan Allah ina. Kun ne puʹup bijaʹ kelunan diaʹ pesaliu ligit dina, ngan pekina pe adan kelunan diaʹ pebeli sui garaʹ. 13U dau ue neng ida: “Lepa un ne dalem Kitap, un dau Allah kuma ha: ‘Amin nceʹ dulu ke pisiu kukoʹ lemameʹ.’ Un sepuʹo ikem uvan ne kukoʹ diaʹ bekelau tai pekelem.”

14Nai kun kelunan butaʹ ngan kelunan kejaʹ palaʹ Yesus kaʹ dalem Umaʹ Palan Allah ina, penco ho paget ida. 15Buseʹ ne tekaʹ diaʹ detaʹu lataʹ, ngan diaʹ guru Katuk Adet Yahudi, tegoʹ re taʹan seʹ puyan nyingan iaʹ nuyan kuʹun Yesus, mepit pelaʹa anak ngelalo dau kaʹ dalem Umaʹ Palan Allah kuma ha: “Pempau ne Anak Daut.”

16Tuman ina re pisiu Yesus, un dau re: “Kumpin, un te guru kenahan dau re?”

Un dau Yesus mipa ida: “Ahaʹ, un te akeʹ kenahan dau re. Kumpin, un ncem lepa baca jo dalem Kitap iaʹ pekini dau? ‘Tuhan lepa pekalai anak dumit ngan anak diaʹ iteʹ pe, ke pempau ia man isiu iaʹ daʹam.’

17Sulo Yesus mecin ida ngan nai ie kawang cen lepoʹ ina, penco tai kaʹ lepoʹ Bitani, ngan tudo kidi.

Yesus mudoʹ ca inan buaʹ abung

(Un te neng Markus 11.12-14, 20-24)

18Laho neng ke nempam me, neng asat Yesus tai uleʹ palaʹ lepoʹ bioʹ ina, laʹu tekaʹ a ne. 19Idi ie taʹan ca inan buaʹ abung kaʹ sada janan, ngan penco ketai ie palaʹ a. Un sepuʹo abeʹ e taʹan buʹan ne, bang tung tuaʹ le. Un dau Yesus neng inan buaʹ abung ina: “Nyahut coʹ ke un buʹan ne laʹa ʹo.” Dalau ina lete inan buaʹ abung ina tai maʹang.

20Tai salam ne tekaʹ diaʹ bayaʹ katuk ke tegoʹ re taʹan seʹ puyan ina. Un dau re lemutu: “Kumpin ban inan buaʹ abung ina sangkit laleʹ tai maʹang tupe?”

21Un dau Yesus mipa ida: “Nawai tiga le ini. Buk kem ngelan ngan abeʹ un kawaʹ tekaʹ, senteng kem uyan koʹ baʹan iaʹ ban akeʹ lepa ti neng inan buaʹ abung ina. Abeʹ e bang ini tuaʹ le. Buk kem kuma ha neng mudung ini: ‘Beteʹ ne, ngan pelaboʹ ikoʹ kaʹ banget,’ atek ke nuyan lete puyan ina. 22Mele inu iaʹ ikem nyat dalem temameʹ kem, buk kem ngelan, atek kem ke alaʹ a lete.”

Dau putu neng penyukat Yesus

(Un te neng Markus 11.27-33; Lukas 20.1-8)

23Tai Yesus ngeliwet dalem Umaʹ Palan Allah laʹa. Ngajan ne pekatuk dulu, idi kenai diaʹ detaʹu lataʹ, ngan diaʹ lataʹ lepoʹ Yahudi palaʹ Yesus ngan lemutu ia. Un dau re: “Inu iaʹ penyukat man ncoʹ uyan mung puyan dini tupe? Ngan aheʹ iaʹ naʹ penyukat ini mikoʹ?”

24Un dau Yesus mipa ida: “Akeʹ ke lemutu hem man ca putu ading, ngan buk kem mipa ha uʹo, ina le akeʹ ke badaʹ mikem inu iaʹ ban penyukat ceʹ uyan puyan dini. 25Cen mpi kenai penyukat Yaya ngebatis kelunan tupe? Cen Allah mo? Buk are cen kelunan?”

Sulo re pesakat neng ahang ida selepeʹ, un dau re: “Kumpin dau tepat ke mipa ia taʹin? Buk le ke kuma ha: ‘Cen Allah,’ tuman ne ke pekini dau neng ilu ʹo: ‘Buk pekina moʹ inu hem abeʹ un ngelan neng Yaya?’ 26Un sepuʹo, buk le ke kuma ha: ‘Cen kelunan,’ takut pe ilu uʹo masaʹ inu iaʹ ke nuyan kuʹun kelunan kadoʹ, uban mung nte ne iaʹ ngelan ban Yaya ca pegawa Allah.” 27Tuman ina un dau re mipa Yesus: “Abeʹ meʹ tisen.”

Penco dau Yesus neng ida laʹa: “Buk pekina, akeʹ pe abeʹ un ubaʹ ke badaʹ penyukat ceʹ uyan puyan ini mikem.”

Kata katuk neng dua re anak

28“Kumpin baʹan ncem? Un ca kelunan iaʹ un dua re anak laki. Tai kun ne palaʹ anak ke iaʹ seken ina, ngan un dau ue neng ia: ‘Ahaʹ anak, tai nikoʹ pegayeng kaʹ banit anggur le tau ini ʹo.’ 29Un dau ue mipa ia: ‘Amai, abeʹ keʹ un ubaʹ kaʹ ketai.’ Un sepuʹo tai pekaliu pe tekaʹ kimet te laʹa, ina ukoʹ o tai kaʹ banit anggur ina are. 30Lepa ina, sulo tai amai ie palaʹ anak ke iaʹ sadin ina laʹa, ngan pisiu ia koʹ baʹan dau ue neng iaʹ seken idai are. Un dau ue mipa ia: ‘Ahaʹ amai.’ Un sepuʹo abeʹ e ban tai. 31Iaʹ mpi neng ahang anak dua dina iaʹ uyan pengubaʹ amai ie?” Un dau re mipa Yesus: “Anak ke iaʹ seken ina.”

Un dau Yesus neng ida laʹa: “Lan dau heʹ mikem, ban ne kelunan diaʹ alaʹ pupu, ngan leto pedayang, iaʹ ketai kaʹ dalem puyan pengaren Allah nekena neng ʹo ikem. 32Ban ne Yaya Guru Batis iaʹ nai badaʹ janan iaʹ teneng palaʹ ikem. Un sepuʹo abeʹ kem ubaʹ ngelan dau ue. Bang kelunan diaʹ alaʹ pupu, ngan leto pedayang le iaʹ ban ngelan neng ia. Naʹ pe buk kem lepa ban taʹan puyan nte pekina, abeʹ pe ikem un nyepuleʹ kimet cem cen penyalaʹ kem neng kebayaʹ a ngan ngelan dau Yaya.”

Kata katuk neng diaʹ petubo banit anggur

(Un te neng Markus 12.1-12; Lukas 20.9-19)

33Un dau Yesus: “Tiga hem ngeringa dau ca kata katuk laʹa. Un ca laki bioʹ iaʹ uyan ca banit buaʹ anggur. Kun ne uyan liwang teliling banit ina, ngan ngelubang kukoʹ o mema buaʹ anggur ina. Ngan kun ne uyan ca lepau kukoʹ o mengau banit ina. Uʹo ina kun ne naʹ banit ina me kudaʹ usa kelunan diaʹ ke petubo ho kena, moʹ o ketai peselai. 34Tegoʹ buaʹ anggur dina buʹan, kun laki bioʹ ina cuk ulaʹ a tai palaʹ kelunan diaʹ nubo banit ina are, tai alaʹ tulat laki bioʹ ina. 35Un sepuʹo kelunan diaʹ nubo banit ina are, dakep ida. Kun nte metung ca, ngan ca ida lematai, ngan un ca laʹa ida lemulo man batu. 36Uʹo ina kun laki bioʹ ina cuk ulaʹ a diaʹ ca tai pelaʹa, kadoʹ neng ʹo diaʹ ading tai didai are. Pekina lete puyan nte neng ida pelaʹa. 37Neng iaʹ kebayaʹ a, kun laki bioʹ ina cuk iaʹ anak ke tai palaʹ kelunan diaʹ nubo banit ina. Un dau ue: ‘Atek ida ke nyelama anak keʹ ne ʹo.’ 38Un sepuʹo tegoʹ de taʹan anak ina, un dau re pisiu neng ida selepeʹ: ‘Ini ne anak laki bioʹ idai. Baka, tiga tepat lematai ia apan le ke un galen ne ʹo.’ 39Sulo re dakep ia, ngan pet ia tahaʹ awang banit ina, penco re lematai ia.”

40Kun Yesus lemutu: “Buk laki bioʹ iaʹ un banit anggur ina ke nai uleʹ, inu iaʹ ia ke ti neng ida diaʹ petubo banit anggur dina are, baʹan ncem?”

41Un dau re mipa ia: “Atek ke ke lematai lete kelunan jaʹat dina, ngan naʹ banit ina kena me dulu diaʹ ca laʹa, diaʹ ubaʹ ke naʹ tulat uleʹ tanaʹ ina me ia tegoʹ tai sihoʹ un buʹan ne.”

42Un dau Yesus neng ida: “Abeʹ lepe ikem un baca isiu iaʹ un dalem Kitap iaʹ kuma ha:

‘Un sukaʹ iaʹ tukang amin pet ban nte kuma ha jaʹat, ina iaʹ ban tai nuyan sukaʹ tekedeng penyalet amin.

Ini ne iaʹ ban pemuyan Tuhan, salam tekaʹ le taʹan puyan ina.’ ”

43Un dau Yesus laʹa: “Ini ne dau heʹ mikem, puyan pengaren Allah ke ngaren ilu kelunan ke pesau cen ikem, sulo ho naʹ a me kelunan diaʹ ke ngebuʹan buʹan iaʹ tekep seʹ. [ 44Aheʹ aheʹ iaʹ ke laboʹ neng sukaʹ ini, tulang nge ke muʹo purep pegep. Ngan buk sukaʹ ini ke laboʹ neng usun ca kelunan, ia ke muʹo jutaʹ panyaʹ koʹ baʹan abu are.]”

45Dalau diaʹ detaʹu lataʹ ngan diaʹ keunan Perisi dina kenahan dau katuk Yesus ina, ida tisen tiraʹ ina pesen neng ida. 46Ina tuman nte ten ke dakep ia. Un sepuʹo takut tekaʹ de neng kelunan kadoʹ, moʹ kelunan kadoʹ kuma Yesus ca pegawa.

Currently Selected:

MATIUS 21: KNT

Highlight

Copy