MATIUS 22

Kata katuk neng puyan pemung uman tegoʹ ngadet diaʹ pepeto

(Un te neng Lukas 14.15-24)

1Ca Liwai laʹa Yesus pisiu ngan kelunan kadoʹ dina man ca kata katuk. 2Un dau ue: “Puyan pengaren Allah ke ngaren ilu kelunan pekuaʹ koʹ baʹan ca laki paren iaʹ uyan pemung uman tegoʹ o ke ngadet pepeto me anak laki ie. 3Kun laki paren ina cuk diaʹ ulaʹ a tai mengin kelunan diaʹ ban sihoʹ pengin ne cen kena nai palaʹ pemung uman ina. Un sepuʹo abeʹ de ubaʹ nai. 4Tuman ina kun ne cuk kudaʹ usa ulaʹ a diaʹ ca laʹa. Un dau ue neng ida: ‘Badaʹ me sakai diaʹ ban sihoʹ pengin le didai ban pemung uman nceʹ lepa tenup. Lepa ne akeʹ nebek sapi manai, ngan anak sapi iaʹ lempoʹ, ngan mung nge lepa tenup ne. Nai ne kaʹ ukoʹ pemung uman ini ading.’

5“Un sepuʹo diaʹ ban sihoʹ pengin nte dina are, abeʹ de nyingo tai. Di lareʹ ida penco metuk gayeng nte: ca tai kaʹ uma ha, ngan un ca laʹa tai kaʹ kedai, 6ngan diaʹ ca laʹa, ida lemengen ulaʹ dina are, metung ida, ngan lematai ida. 7Miʹa laleʹ ne kaʹ laki paren ina are, sulo ho cuk sedadu ue tai lematai mung kelunan diaʹ ban lematai ulaʹ a are, ngan nutung lepoʹ de.

8“Sulo laki paren ina mengin ulaʹ a diaʹ ca laʹa, ngan un dau ue neng ida: ‘Lepa tenup ne pemung uman adet pepeto ini. Un sepuʹo kelunan diaʹ akeʹ ban mengin didai, abeʹ de tekep ban ke nai. 9Tai ne ikem kaʹ janan bioʹ naʹkini, ngan mele aheʹ aheʹ iaʹ ikem tegoʹ, mengin ne ida nai kaʹ pemung uman ini.’ 10Sulo ulaʹ dina are tai kaʹ janan bioʹ ngan kelimpun mung kelunan diaʹ ida tegoʹ, mele diaʹ jaʹat, mele diaʹ tiga pe. Sangan ne amin pemung uman ina are kuʹun kelunan.

11“Sulo kenai laki paren ina kaʹ dalem, ubaʹ ke naʹat mung nte diaʹ ia mengin dina are. Kun ne taʹan ca kelunan iaʹ abeʹ un kanan gelam iaʹ tekep tegoʹ pemung uman adet pepeto. 12Un dau laki paren ina lemutu ia: ‘Moʹ inu hoʹ nai kaʹ dalem kini, ngan abeʹ un gelam iaʹ tekep tegoʹ pemung uman adet pepeto tupe?’ Sulo laki ina abeʹ un pisiu. 13Penco dau laki paren ina neng idaʹ ulaʹ a: ‘Lemeka ne taket te ngan ujoʹ o, ngan pet ia tahaʹ awang kukoʹ iaʹ mentem. Kina ha ke nange ngan dau taret dijen ne.’ ”

14Tai kuʹo katuk Yesus, un dau ue: “Ban ne kadoʹ dulu diaʹ ia mengin, un sepuʹo kediʹut diaʹ ia lemileʹ.”

Putu neng nyuaʹ pupu

(Un te neng Markus 12.13-17; Lukas 20.20-26)

15Sulo tai kelunan Perisi dina petiraʹ, moʹ de ubaʹ ke pungkeʹ isiu ngan Yesus man kudaʹ naʹan putu. 16Kun nte cuk palai diaʹ bayaʹ katuk de tengen, peging ngan kelunan tudi pulitik Herudian, tai palaʹ Yesus. Un dau re: “Ahaʹ guru, ameʹ tisen ikoʹ ca kelunan iaʹ telit kimet. Ngan ikoʹ pelaʹa iaʹ mejo katuk iaʹ telit neng puyan pengubaʹ Allah me kelunan, mentung koʹ abeʹ un pesingo dau dulu. Ngan abeʹ koʹ selepeʹ neng ngadan kelunan. 17Tuman ina, badaʹ ne mameʹ, kumpin baʹan ncoʹ: Tekep taʹin buk ke are salaʹ, un meʹ ke ngesa Katuk Ukum buk meʹ nyuaʹ pupu me Kaisar Rum mo?”

18Un sepuʹo Yesus tisen kimet de iaʹ jaʹat ina, sulo dau ue neng ida: “E kelunan ngaloʹ, moʹ inu hem ten ke pungkeʹ isiu ngan nceʹ tupe? 19Peluhaʹ ne me akeʹ ca liʹap ligit iaʹ man ncem ke nyuaʹ pupu ina.”

Sulo kenai re ngkin ca liʹap ligit dina palaʹ ia. 20Penco ho lemutu ida: “Silung ngan ngadan aheʹ dini tupe?”

21Un dau re mipa ia: “Silung Kaisar.”

Un dau Yesus neng ida laʹa: “Tiga ne buk ke pekina nyuaʹ ne palaʹ Kaisar inu iaʹ anun Kaisar, ngan nyuaʹ ne palaʹ Allah inu iaʹ anun Allah.”

22Salam ne tekaʹ de ngeringa dau Yesus. Sulo tai re mecin ia ngan tai uleʹ.

Ca putu neng puyan beteʹ cen patai

(Un te neng Markus 12.18-27; Lukas 20.27-40)

23Neng tau ina lete, kenai palai kelunan Seduki palaʹ Yesus. Kelunan dina ne iaʹ kuma kelunan matai nyahut de ngeliwet mudip ne laʹa. 24Un dau re: “Ahaʹ guru, un dau Katuk Musa, buk ca laki matai ngan abeʹ un anak, tekep iaʹ cenganak laki ke pepeto ngan leto balu ina, apan nte un anak me laki iaʹ matai idai. 25Ca liwai ie un tujoʹ de laki pepadeʹ, iaʹ un kini cen kena. Kun iaʹ seken me ida pepeto, sulo matai ngan abeʹ un anak, luʹung ne balu ina ngan diaʹ cenganak ke. 26Pekina lete tai nuyan neng cenganak laki iaʹ kedua ha, ngan iaʹ ketelu, ngan pabeʹ cenganak ke iaʹ ketujoʹ o. 27Uʹo tai re dina padeʹ matai mung. Neng kebayaʹ a ketai leto ina matai. 28Kumpin buk ke tai sihoʹ tau kelunan matai kenai ngeliwet mudip, aheʹ ne iaʹ ke laki leto ina ʹo? Ban mung nte lepa pepeto ngan ne.”

29Un dau Yesus mipa ida: “Muʹo tawai, inu salaʹ laleʹ dau kimet cem. Ban ne abeʹ kem tisen inu iaʹ un dalem Kitap, ngan pekina pe penyukat Allah. 30Ban ne buk kelunan matai kenai ngeliwet mudip, ida ke nuyan koʹ baʹan seʹ melikat diaʹ kaʹ surga are. Laki ngan leto, abeʹ de ke pepeto laʹa. 31Abeʹ lepe ikem ban baca inu iaʹ Allah lepa badaʹ neng puyan kelunan matai nai ngeliwet mudip tupe?” 32Un dau tebadaʹ Allah: ‘Akeʹ lete Allah iaʹ anun Ibrahim, Isak, ngan Yakup.’ Naʹkini iaʹ lan sen ne, Tuhan ina Allah anun kelunan diaʹ mudip, abeʹ e Allah anun kelunan diaʹ matai.”

33Salam laleʹ ne tekaʹ kelunan kadoʹ dina kenahan dau katuk ke.

Katuk ukum iaʹ bioʹ

(Un te neng Markus 12.28-34; Lukas 10.25-28)

34Tegoʹ kelunan Perisi kenahan dau denga puyan Yesus lepa nyapet isiu kelunan Seduki dina, sulo nai re kelimpun. 35Un ca guru Katuk Adet neng ahang ida ten ke pungkeʹ isiu ngan Yesus man ca putu. 36Un dau ue: ‘Guru, katuk ukum iaʹ mpi iaʹ bioʹ dalem katuk Adet tupe?”

37Un dau Yesus mipa: “Atek tekep koʹ malaʹ Allah, Tuhan ncoʹ, ngan ketoʹ tekaʹ keluʹung kimet coʹ, ngan ketoʹ tekaʹ penawai hoʹ, ngan ketoʹ tekaʹ pengencam kimet coʹ. 38Ini ne katuk ukum iaʹ bioʹ ngan iaʹ tekep ilu ke nawai. 39Katuk ukum iaʹ kedua ilu tekep ke nawai, pekuaʹ koʹ baʹan iaʹ ading nte: ‘Tiga ho malaʹ neng ikem kelunan koʹ baʹan ncoʹ malaʹ neng usa hoʹ tengen are.’ 40Ketoʹ Katuk Adet, ngan katuk pegawa diaʹ cen naʹaʹ pesente neng katuk ukum dua dina mung ne ida.”

Putu neng Keristus iaʹ ngkang pungu udip

(Un te neng Markus 12.35-37; Lukas 20.41-44)

41Tegoʹ kelunan Perisi dina tai kelimpun, penco dau Yesus lemutu ida. 42Un dau ue: “Kumpin tekaʹ kimet cem neng puyan Keristus iaʹ ngkang pungu udip tupe? Mele mela aheʹ e?”

Un dau re mipa ia: “Mela Daut.”

43Un dau Yesus pelaʹa: “Buk ke pekina, moʹ inu Berua Buheʹ Allah nelasek Daut apan ne pisiu Keristus ina Tuhan? Ban ne un dau Daut:

44‘Tuhan lepa pisiu ngan Tuhan nceʹ:

Madung ne ikoʹ tahaʹ taʹu akeʹ, pa heʹ ke naʹ ketoʹ bunoʹ koʹ tahaʹ ntaʹ taket coʹ.’

45Buk ke Daut pisiu ia ‘Tuhan,’ kumpin Keristus iaʹ ngkang pungu udip ina senteng ke tai nuyan mela Daut tupe?

46Pabeʹ ca luʹung isiu pe, kelunan dina abeʹ un senteng mipa Yesus. Cen tau ina, pabeʹ ca kelunan pe abeʹ un makang kaʹ ke lemutu ia man ca putu laʹa.

Currently Selected:

MATIUS 22: KNT

Highlight

Copy