LAMPULAN 13
13
Barnabas Hei Saul Phünne Phatampu
1Sha-a Antiok me ngohpu bumeinok me hipalan hüyange konnyüopalan ütam ngoh: Barnabas hüyange Niger she nyikpu Simeon, Sairinlan Lucius, Herod tetrarch phei jongne tampu Inao Manaen hüyange Saul. 2Aope iman-e Youngwanpa te yoppe khümme hüyange nyaoleye ngoh, Üjao Yahawe i, “Barnabas hüyange Saul ni taowe nyikpu toi linglak jingne; iman üjingne yoi yoine angtüoh.” 3Tüokhei iman-e nyaoleye hüyange yopyang pheime iman yakke imnite shüngne tamyang phei me iman-e imni shonne tei.
Krispas Me
4Tüokhei Yaha Üjaowe Barnabas hei Saul ni shonne, iman Seleucia te lai. Tüo mepu imni yenglin me ongyange Saipras te tai. 5Hüyange aope imni Salamis me ngoi, Jehudilan synagoguelan me Kahwang ngao ponge tam; hüyange John iman phei jampu ja ne ngoh.
6Hüyange aope dikhot üshei linne iman-e Paphos ngoiye tai, Jehudilan yepahipa, tahleih hipa ja, Bar-Jesu, she minpu iman-e hüo. 7Governor Sergius Paulus, ao yeonge jelo wangpu kahta ne ngoh, I phei Bar-Jesu ngoh. Iye Barnabas hei Saul I tangte nyik-e Kahwang ngao jailak jingne ngang. 8Hüyangpoi yepahipa Elaimaswe (Greek me I min tüone ngoh) imante büange Governorpa mengne yetamlak jingne ngang. 9Hüyangpoi, Saul, ao te üne-o Paul she nyik, I Yaha Üjaowe maawe, Iye Ite tingkhakke lei, 10#Hos 14.9.hüyange i, “Nang Kahshih Üha! Khakshupu lili jingne nanga wepa ngohnang; nangme ünu ümeng konne maawe ngoh nang, hüyange nange jinte Youngwanpa ütingpa-a ngaoleih ne menge tamlak jingne ngangnang! 11Youngwanpa yak nang tangme sha-a yulak; hüyange nang mük pomlak, hüyange hipak ütenjapu jingne nange nyihning wangngai ye-ngelak.” Mokhshe phomshao hüyange wangnyakke Ite ngoi, hüyange I yak me jonyange woilak jingne Iye ütam yam. 12Aope Governorwe hanghe ngai hatüo nge, hüwante Iye Youngwanpa konnyüopu me yashan hüyange ütinglakke meng.
Pisidia Antiok Me
13Sha-a Paul hüyange I shümpalanne Paphos mepu yeng me tai, hüyange Pamphylia me Perga te pei. Hüyange John iman mepu yanne Jerusalem te ye. 14Hüyangpoi iman-e Perga mepu taiye Pisidia me ngohpu Antiok te pei. Hüyange Sabbath synagogue te onge shot. 15Hüyange ngaokeng hüyange hipalan laitep iyang phei me, synagogue me wanglam lampalanne iman tangte shonne i, “Jeiheinaolan, numan-e kahtalan jingne hengpu ngao ilak ngohma-a, ngaotamtüoh!” 16Tüokhei Paul yong, hüyange yak honge i:
“Numan Israellan, hüyange Kahwangte nyamhei lepalan, jaiyah! 17#Woi 6.1,6.Hatüo Israel jat Kahwange teman puyimlan le, hüyange Egypt kahtok me ngohwante, hatüo Israel jat yongne tam. Hüyange wong üyongpuwe Iye iman tüomepu woitei; 18#Hin 1.31.hüyange wangpeng deli mongme wanwüng jengme Iye iman paotong. 19#Hin 7.1; Jos 14.1.Hüyange Iye Kanan kahtok me jatli nyit mahne tam, hüyange tüopa kahtok me I kahtalan nokpu ne menge, 20wangpeng gho peli pheime wang denga nanjing ngohne tam. Hüyange tüolan lin phei me Samuel hipa ngoiye Iye imante ngaophünpalan pha. 21Tüophei me iman-e ahngpaja yu, hüyange Benjamin nokphong mepu Kish üha Saul wangpeng deli ngoiye wanglamlamlak jingne Kahwange imante pha. 22#Tüo 89.20; 1 Sam 13.14; Isa 44.28.Hüyange Iye I yahteiyang phei me, iman Ahngpane menglak jingne Iye David le. Iye David jingne saki phawe i, ‘Ümong hahpu, hüyange Taowe mongpu üshei linglakpa, Jesse üha David, taowe tüoyangki.’ 23Janyangpu kih I mepu jaalunpu lan mepu Kahwange Israel lante Yinyepa ja, Jesu woipei. 24#Mk 1.1-4.I manpeiwante, Johnne monglüppe baptitampu Israellan üsheite üwangne konnyüo. 25#Jn 1.20; Mt 3.11; Mk 1.7; Lk 3.16.Hüyange Johnne I toi tümme peiwante i, ‘Numan-e tao ao she teihnangki? Tao numan-e tanpupa Ine yeje. Hüyangpoi leiyah, ü-pheite ja, ao ya mepu yashom lanlakne tao yewang, I peiküki.’
26 #
Tüo 107.20. “Jeiheinaolan, Abraham mepu ngaipu hayim, hüyange numan yo me Kahwang nyamlepalan teman tangte hatüo yinyepu ngao shonteki. 27Hangjingne Jerusalem me ngohpalan hüyange iman wanglam lampalanne I yeshing, yejema-a Sabbath lep iye ipu hipalan ngao yeshing okpu jingne, Ite ümeng phawe hatüo ngao iman-e ütahte ngaine tam. 28Hüyange I litamlak ne I me ümeng yetüoyapoi, iman-e Pilate te I toilak jingne tong. 29Hüyange iman-e I jeng nyanne ngohpu üshei ngaine tamyang phei me, iman-e I pee mepu yah-e mangkoksa me ang. 30Hüyangpoi Kahwange I lipu mepu yange yetam. 31Hüyange Galilee mepu Jerusalem ngoiye I phei peipulan-e I nyih nangjange nge; hüyange sha-a kahtalante iman-a I saki ngohnang. 32Hüyange teman puyimlante janpu pungao ümei toman-e yahpei nang. 33#Tüo 2.7.Hatüo teman hayimlante Jesu yange tampuwe ütahte ngaitam yangki; Tüowelaihem nishepupa me nyanpu ke:
“ ‘Nang ü-ha,
tenyih taowe nang puhnang.’ ”
34 #
Isa 55.3. “Hüyange hatüowa lipu mepu yange yelak jeng Kahwange iyangki, üne-o nishe aope-o yeshilak:
‘Taowe David te janyangpu lowe angpu hüyange moiman Taowe nangte phalak.’ ”
35 #
Tüo 16.10. “Hüyange Iye üne-o Tüowelaihem ülao ja me inang:
‘Nange Ü-üjaopa namme yeteilak.’ ”
36“Hangjingne David-e yoi jinme Kahwange itpu shaoshan yang pheime, I shiye ta, hüyange I puyimlan phei jamme ang, hüyange seaye-namme tai. 37Hüyangpoi Kahwange ao yange yene tam, I seaye yetai. 38Tüokhei jeiheinaolan, numan-e tüo shingyah hatüo kahta kaiye ünu winpu numante pongtam nang; 39hüyange hanghe mepu Mosa ngaokenge numan tingne yetam, Iye tüolan khongküm mepu mengpalan lili tingne tamnang.” 40“Tüokhei hipalan laitep me ngaopu ngao numan me yengailak, numan kentingyah:
41 #
Hab 1.5. ‘Leiyah, numan yaowelepalan:
Yashantüoh hüyange mahtüoh!
Hangjingne taowe numan jinme toi ja lingnang.
Hatüo toijeng kahta ütamme numante iyapoi, numan-e hangke tingme-o üting yelaklak!’ ”
42Hüyange aope Paul hei Barnabas ni tüolan ngaoyang phei me yayong, ngoikülak Sabbath imante tüopa ngao üne-o ngaolak jingne kahtalanne tonge i. 43Sha-a synagogue mepu aope yan, Jehudilan hüyange yinhulan Jehudilan wanglam me mongjüonge mengpalanne Paul hei Barnabas pheite woi. Iman-e imante Kahwang shüpshe me yelakpe ngohlak jingne hengpu pha.
44Ünepu Sabbath me chingnyu mepu kahta sheyongpu jing Kahwang ngao jailak jingne jamshe jemme ngoh. 45Hüyangpoi aope Jehudilanne ükhong jempu nge, iman-e yeonge müktak, hüyange Paul-e ngaopu ngaote yaoweleye phoi. 46Hüyangpoi Paul hei Barnabas niye ünyei wongnange ngaowe i: “Kahwang ngao numante üwangne ngaolak wongpong ne ngohyang ki; hüyangpoi numan-e hatüo winpu, hüyange jinte üyin tüolak jingne wangpu yeje she numan-e numan nying nyingke shopu ngeye, leiyah, toman-e yinhulan tangte tainang. 47#Isa 49.6.Hangjingne hüke Youngwanpawe tomante tamyangki:
“ ‘Taowe numan yinhulan jingne wangngai ja ne angnang,
numan-e kahtoknyu üküm ngoiye yinyepu yah peilak.’ ”
48Yinhulanne tüopa ngao jaiye mongmei hüyange Kahwang ngao müktishiwa. Hüyange jintepu üyin jingne hangshin leyange ngoh iman-e ütinglak.
49Hüyange hüke Youngwanpa ngao üshei yete jaalun tai. 50Hüyangpoi Jehudilanne, wanglamte lahnyikpu üyonglan sheko hüyange chingnyu woipalan hengne tamme, Paul hei Barnabas ni phei tüi-e shaoshi tamlak jingne mopngai, hüyange iman kahtok yikeng kaiye jang tei. 51Tüokhei iman-e iman phei tüi-e iman ya mepu kahmak konge tüoh, hüyange Ikonium ngoine tai. 52Hüyange Antiok me pinlan-a mongmei hüyange Yaha Üjaowe maa.
Currently Selected:
LAMPULAN 13: KONYBSI
Highlight
Share
Copy
Want to have your highlights saved across all your devices? Sign up or sign in
Konyak Naga Bible - ÜJAO LAITEP
Copyright © 2011 by The Bible Society of India
Used by permission. All rights reserved worldwide.
