LAMPULAN 14
14
Ikonium Me
1Ikonium me hatüo ngai, aope Paul hei Barnabas jamme Jehudilan synagogue te ong, hüyange iman-e ngaowante, ükhong üyong ja Jehudi hüyange Greeklan moiniye ütinglak. 2Hüyangpoi üting yelakpu Jehudilanne yinhulan mongte powe tam, hüyange jeiheinaolan phei woilak mepu büang. 3Tüokhei nyih yeonge iman-e nyoiye Youngwanpa min me wongnange ngao; hüyange iman yakke kahnyingwüngha füo lingne tamme, Iye yoi shüpshe ngaojeng saki pha. 4Hüyangpoi chingnyu kahtalan ükhong tamyange, ütam Jehudilan phei hüyange ütam lampulan phei om.
5Hüyange aope yinhulan hüyange Jehudilanne iman ching woipalan phei imante wüotüowe jonlak hüyange longe shüplak jingne taisho, 6hatüo iman-e shinge pei, hüyange Laikaonia mepu chingnyulan Listra hei Derbe, hüyange shüpneipu kahtok üshei yete yanne tai. 7Hüyange tüoyin me-o iman-e Pungao ümei yelakpe konnyüo.
Listra Hei Derbe Me
8Listra me puhnap memuh yashok teiye puhpu hüyange aope-o yekempu kahta ja ngoh. 9Paul-e ngaopu Iye jai, hüyange Paul-e Ite tingkhakke lei, hüyange I meilak ütinglakpu ngohpu Iye shing: 10ngao üyong ngaiye i, “Nang ya tingkhakke yongtüoh.” Hüyange I homme yonge kem. 11Aope ükhonge Paul lingpu toi nge, iman-e Laikaonialan ngaome üngwünne i, “Teman tangte kahwanglan kahta kih menge yuwe ngohnangki!” 12Hüyange iman-e Barnabas te Zeas (Jupiter) she nyik, hüyange Paul te Hermes (Merkuri) she nyik, hangjingne I ngao ipu me ütahpa ne ngoh. 13Hüyange chingnyu sheshaome ngohpu Zeas khümjing ngengpawe pejong yin ü-o me mahu üpong ühalan hüyange jupeng yük yah peiye, hüyange ükhong phei jamme lampulante toidopu phane she ngoh. 14Hüyangpoi aope lampu Barnabas hei Paul-e hatüo jai, iman-e yoi inkhek hit, hüyange ükhong yo me phette onge üngwünne i: 15#Woi 20.11; Tüo 146.6.“Üyih üyonglan, hangne numan-e tüolan jonpu shi? Numan hangkihpu hükih-e toman-o kahta muh! Wangdang, kahtoknyu, yengching hüyange tüome ngohpu üshei lingpupa üyin Kahwang tangte, tüolan jajang japu toi mepu leppe yelak jingne toman-e pungao ümei numan tangte yahpei. 16Lintepu jinme Iye jat üsheite yoi lam me kemne tam. 17Hüke jeyapoi Iye ümei jonne wangdang mepu wai hüyange deihaliha ümei numante phawante, hüyange Iye hahying hüyange mongmei me numan mongmaawe tümwante, tüoyangpoi Iye yoi jeng saki yephape yetüoh.” 18Hüyange tüolan ngao iye, imante toidopu yephalak jingne ngange ükhongte iman-e tien.
19 #
2 Kor 11.25. Hüyangpoi tüokente Antiok hüyange Ikonium mepu Jehudilan pei, hüyange ükhong yohyang pheime Paulte longe shüp, hüyange I liteki she teih-e chingnyu mepu shuiye tei. 20Hüyangpoi aope pinlan jemme I neikonne yong, hüwante I lüo, hüyange chingnyute ong; hüyange üne nyih I Barnabas phei Derbe te tai.
Syria Mepu Antiokte Yepu
21Aope Paul hüyange Barnabas niye Derbe me pungao ümei konnyüo, hüyange pinlan maawe om, iman Listra hüyange Ikonium hüyange Pesidia mepu Antiok te leihye; 22iman-e pinlan yaha me wongnangne tam, hüyange ütinglakpu me yelaklak jingne heng; “Shaoshi yalipu maapu kaiye teman-e Kahwang ahngching te onglak wongpong she nyüo.” 23Hüyange iman-e iman jingne bumeinok phe phe me jeiyonglan leyange nyaoweleye yopyang pheime, iman-e mengpu Youngwanpa te iman lanshe phawe tüoh.
24Hüyange iman Pisidia kaiye tai, hüyange Pamphylia te pei. 25Hüyange Perga me konnyüo yang pheime, iman Attalia te pei. 26Tüomepu iman-e Antiok, ümeken me Kahwang shüpshe tangte toi jingne iman phünne phayangki, hüyange iman-e hanghe toi tüm, tüopa Antiok te yeng me pah tai.
27Iman ngoiphei me bumeinoklan jamshe jemne tamyange, iman phei Kahwange lingpu üshei hüyange yinhulan jingne Iye hangke ütinglakpu taten ja eppe tam, tüolan üshei iman-e i. 28Hüyange iman pinlan phei tüome hipak laowe nyoingoh.
Currently Selected:
LAMPULAN 14: KONYBSI
Highlight
Share
Copy
Want to have your highlights saved across all your devices? Sign up or sign in
Konyak Naga Bible - ÜJAO LAITEP
Copyright © 2011 by The Bible Society of India
Used by permission. All rights reserved worldwide.
