LAMPULAN 15
15
Jerusalemme Ngengtüp
1 #
Gal 2.1-10. Hüyangpoi Judea kahtok mepu kahta ütam Antiok te pei, hüyange jeiheinaolan te hüowe i: “Mosa wanglamke sho-yekhüpma-a numan yinne ye-ok.” 2Hüyange aope Paul hüyange Barnabas niye iman phei laawe ngao yesheipe ngaiyapeih, jeiheinaolanne Paul hüyange Barnabas hüyange iman yo mepu ütam she tüopa ngao jeng Jerusalem me lampulan hüyange jeiyonglan phei ngaone onglak jingne le.
3Tüokhei bumeinoklan ne lünge, yinhulan monglüppu jeng pongne tamme, iman-e Phoenica hüyange Samaria kaiye tai, hüyange iman-e jeiheinaolan üshei yeonge mongmei ne tam. 4Hüyange aope iman Jerusalem ngoi, bumeinok hüyange lampulan hüyange jeiyonglanne iman yah, hüyange Kahwange iman phei lingpu üshei jeng i. 5Hüyangpoi Pharisee ükhong yo mepu mengpalan ütamme yonge i. “Iman shokhüplak hüyange Mosa ngaokeng jonlak ngaokeng phalak wongpong ngohnang ja.”
6Lampulan hüyange jeiyonglanne tüopa ngao teihnyüolak jingne jamme jem. 7Hüyange ngao maa iye mopyang phei me, Peter yonge imante i: “Jeiheinaolan Ü-jukaiye yinhulanne pungao ümei jailak hüyange menglak jingne Kahwange numan yomepu üshong memuh tao le ngai she numan-e shing. 8Hüyange mongjang shingpu Kahwange temante phapukih imante-o Yaha Üjao phawe, iman saki ne meng. 9Hüyange ütinglakpu kaiye iman mongjang poitamme, teman hüyange iman pa me Iye hango yoi yoine yeling tam. 10Tüokhei hanghe hangkiyih teman-e yejema-a teman pupayimlanne kipu ye-ok, hatüo pinlan üngme küntamme, hangne sha-a numan-e Kahwang toknangki? 11Hüyangpoi Youngwanpa Jesu shüpshe kaiye hangke iman yinnetam, teman-o hatüokih yinlak she teman-e ütinglak nang.”
12Hüyange ükhong moilan yelangmanpe ngoh, hüyange Barnabas hei Paul ni kaiye hanghe kahnyingwüngha füo hüyange yashanyali Kahwange yinhulan yo me ling, hatüo ngaopu iman-e jai. 13Hüyange iman ngaowe shoyang phei me, Jeams-e janne i, “Jeiheinaolan Ü-ngao jaikhu! 14I min jingne iman yo mepu kahta yahne, Kahwang hangke yinhulan tangte üwangne pei, Simon ne sha-a iyangki. 15Hüyange tüophei hipalan ngaolan nyanne ngohpuke shuwe ngoh nang:
16 #
Amos 9.11-12; Jer 12.15; Isa 45.21. “ ‘Tüophei me tao leihyelak, Youngwanpawe inang,
hüyange David nok hanghepa meng taowe linge yelak;
mengtepulan taowe linge yelak,
hüyange hatüo taowe welak.
17Hüyange ülao kahta liliye Youngwanpa yamlak,
hüyange Ü-min me nyikpu yinhulan üshei,
18ao tüopa ülangpa hipak me shingne tam, tüopa Youngwanpawe inang.’ ”
19Tüokhei taowe mongpuwa hatüo, “Teman-e yinhulan yome Kahwang tangte lüppe yepulan shangne yetamlak; 20hüyangpoi iman-e longjing peshaowe nuwe tampu hahying mepu, hüyange üyin yejao yeshapu mepu, hüyange phütte toipu hei iy mepu yanne ngohlak jingne lai ja nyanlak. 21Hangjingne Mosawe üshongpu jin memuh, chingnyu üshei me synagogue lan me Sabbath lep iye I ngao ilak jingne konnyüopalan ange peiyangki.”
Yinhu Mengpalan Tangte Ngengtüp-e Nyanpulai
22Tüokhei lampulan hüyange jeiyong lanne, bumeinoklan üshei phei jemme iman yo mepu kahta lelak, hüyange Antiok ngoiye Paul hüyange Barnabas ni phei jeiheinaolan yomepu kahta ümei leye shonlak she tüm. Iman-e Barsabbas she nyikpu Judas, hüyange Silas, jeiheinaolan üsheiye monghümpu ni le. 23Iman phei tüolan ngao nyanyange shon.
“Antiok, Syria hüyange Cilicia me yinhu jeiheinaolan tangte lampulan, jeiyonglan hüyange jeihei naolanne salam shonnang. 24Toman-e shonpu yejepu kahta ütam, toman mepu onge, ngaome numan mong lüpshüpne tamme, numan mopne tamhahki she toman-e jaiye, 25toman üsheiye monge kahta lelak, hüyange numan tangte toman-e kenpu Barnabas hei Paul, 26aoyin teman Youngwanpa Jesu Khrista min jingne iman üyin wengtuhte yeine tam, iman phei shonküme meilak she teih. 27Tüokhei Judas hüyange Silas, aoyinne jamshe tüolan ngaomuh juwe ilak, toman-e iman shon nangki. 28Hangjingne tüolan wongpong tokte kaiye numante hangki üyong hango ki ne yetamlak she Yaha Üjao hüyange toman-e mongyangki. 29Longjing peshaolante toidopu hahying mepu; iy mepu; phütte toipu yinmok mepu; hüyange yejao yeshapu toimepu numan yanne ngoh yah. Tüolan mepu numan yanma-a, numan meiye ngohlak. Meiye ngohyah.”
30Tüokhei aope iman shonne tei, iman Antiok te lai; hüyange ükhong jamshe jemme tamyange iman-e nyanpu lai pha. 31Hüyange iman-e tüopa iye leiyang phei me, toloimeilak ngao jingne iman mongmei. 32Hüyange Judas hei Silas hipa ne menge, iman-e jeihei naolante ngao maawe hengpu pha, hüyange iman wongnangne tam. 33Hüyange tüome ütenja nyoiyang phei me, iman-e jeiheinaolan mepu toloimei me iman shonpalan tangte leih yene tam. 34(Hüyangpoi Silas tüome muh ngohne mong.) 35Hüyangpoi Paul hei Barnabas niye, ülaolan maa omyange, Youngwanpa ngao nyüowe hüyange konnyüowe Antiok me nyoi.
Paul Hei Barnabas Ni Yan
36Hüyange nyih ütenja linyang phei me, Paul-e Barnabas te i, “Teman-e sha-a yehah, hüyange teman-e Youngwanpa ngao iyangpu ken chingnyu üshei me jeiheinaolante ngoi ponghah, hüyange iman hangke ngoh, leihah.” 37Hüyange Barnabaswe John Mark iman phei teihu. 38Hüyangpoi I woilak te Paul-e yemong, hangjingne iman phei konnyüopu toi me I üküm ngoiye yengoh; hüyangpoi iman Pamphylia me tüohyange ye mah. 39Hüyange imnipa me yeonge mong teiyehahpu ngai, tüokhei iman yoi yoi ne yan; hüyange Barnabaswe I phei Mark woiyange yenglin me Saipras te tai. 40Hüyangpoi Paul-e Silas le, hüyange Youngwanpa shüpshe tangte jeiheinao lanne iman phünne phawe iman tai. 41Hüyange Iye bumeinoklan wongnangne tamme, Syria hüyange Cilicia kaiye tai.
Currently Selected:
LAMPULAN 15: KONYBSI
Highlight
Share
Copy
Want to have your highlights saved across all your devices? Sign up or sign in
Konyak Naga Bible - ÜJAO LAITEP
Copyright © 2011 by The Bible Society of India
Used by permission. All rights reserved worldwide.
