LAMPULAN 18

Korinth Me Paul

1Tüophei me, Athen mepu Paul yayong hüyange Korinth ngoi. 2Tüome Pontus me puhpu, Aquila she minpu Jehudi ja hüo, ao Italy mepu I sheko Priscilla phei ü-o-we pei ngoi, hangjingne Ahngpa Klaudias kaiye Rome me ngohpu Jehudilan khongküm tailak jingne ngaokeng pha. Iman phei hüone Paul wen, 3hüyange iman phei I toishao ja ne menge, I iman phei ngoh, hüyange iman-e toiling; hangjingne iman-e nyenok weye nanhah ngoh. 4Sabbath lep iye synagogue me Iye saki phawe nyüo, hüyange Jehudi hüyange Greeklan yohlak jingne ngang.

5Aope Silas hei Timothy Macedonia mepu pei ngoi. Jehudilante Jesuwa Messiah üja she saki phawe konnyüolak jingne Paul-e hipak lanshe pha. 6Hüpoi aope iman-e iman nying nyingke I phei laawe yong hüyange Kahwang phoiwüm, Iye yoi inkhek mak konge imante i, “Numan iy numan yoi shangtang me ngohtüoh; tao jaowe ngohnang. Sha-a me peiye tao yinhulan tangte tailak.” 7Hüwante I tüomepu yayonge tai, hüyange Kahwangte khümpu yinhulan ja min Titas Justus nok, hanghe synagogue phei yupi ne muh ngoh, tüote I ong. 8Hüyange synagogue woipa Krispaswe Inok me ngohpu üshei phei Youngwanpate meng, hüyange Korinthlan maapuwe jaiye meng, hüyange baptitam.

9 # Isa 43.5; Jer 1.8. Yaja himang me Youngwanpawe Paulte i, “Tahnyam, hüyangpoi yelakpe ngaotüoh hüyange jünge tahngoh; 10hangjingne Tao nang phei ngohnang. Nangte üko shalak ne aowe-o yejanglak; hangjingne hatüo chingnyu me ü-kahtalan maangoh nang.” 11Hüyange tüome I wangpeng ja lekeng wok iman yo me Kahwang ngao nyüowe nyoi.

12Hüyangpoi aope Akhaia me Gallio Governor ne ngoh, Jehudilanne mong ja ne sheiyange Paul phei tüi-e yong. Hüyange ngaophün jing shaome I woi peiye i, 13“Iman-e Ngaokeng phei tüi-e Kahwang khümlak kahta hatüowe kahtalan yohnangki.”

14Hüyangpoi aope Paul-e I juka ne she ngohwante, Galliowe Jehudilante i, “O Jehudilan, hatüo ütingme toimeng ja yejeküma-a lowelampu ja jengne jema-a, taowe numante jaihah shepu. 15Hüyangpoi hatüowe ngaoyin hüyange minlan hüyange numan yoi ngaokeng jeng teitongpune mengma-a, hatüopa-a numan-e numan nying nyingke leiyah. Hatüolan jeng ngao taowe yephünlak!” 16Hüyange ngaophün jing mepu Iye iman jangtei. 17Tüophei me iman üsheiye synagogue nokpu Sosthenes pho, hüyange ngaophün jing nokshao me Ite shet. Hüpoi tüolan jeng Galliowe hangko yeteih.

Paul Antiok Te Leihye

18Paul tüome nyoi yangphei me jeiheinaolan mepu yan, hüyange tüomepu Priscilla hei Aquila ni phei I Syriate yenglin me tai. Hüyange Iye Cenkhrea me I shanglin ne wen, hangjingne Iye jiengpu ja ngoh. 19Aope iman Ephesia ngoi, hüyange tüome Iye iman tüo; hüyangpoi I shaha synagogue te onge Jehudilante saki phawe nyüo. 20Aope iman-e Ite iman phei nyih nyeiye nyoilak jingne tong, Iye yemong; 21hüpoi imante hüke iyange yayong, “Kahwange mongma-a, tao numan tangte nishe peiküpeih.” Hüyange yeng me I Ephesia te tai.

22Hüyange Kaisarea me ngaiyange I Jerusalemte ong hüyange bumeinoklante salam pha, hüyange Antiok te lai. 23Tüome hipak üjingha winyange I yan hüyange japhei me ja she Galatia hüyange Phrygia kahtok kaiye, pinlan üshei wongnang tamme tai.

Apollos Toishao

24Sha-a Alexandria me puhpu, ngaome yeonge wangngoipu, hüyange ngaolai yeonge shingpu, Jehudilan ja min Apollos Ephesia te pei. 25Hatüo kahtawe Youngwanpa lam jeng me nyüowe okpu ngoh, hüyange yaha me lahnyikke Johnne baptitampu jeng shaha shingyapoi, Iye Jesu jeng khakshuwe ngaowe nyüo. 26Hüyange Iye synagogue me wongnange ngaone wang. Aope Priscilla hei Aquila niye Iye ngaopu jai, iman-e I iman nokte woiye, hüyange Kahwang lam ünyei shuwe Ite khoih-e iye hüo. 27Hüyange aope Iye Akhaiate taine tei, jeiheinao lanne I wongnangne tam, hüyange pinlan tangte I yahlak jingne lai nyanne tam, hüyange I ngoiyange, shüpshe kaiye mengpalante Iye yeonge jam. 28Hangjingne Jesuwa Messiah ne ngoh she nyüowe, Iye Jehudilan-a chingyang ko me yeonge yeine tam.

Currently Selected:

LAMPULAN 18: KONYBSI

Highlight

Copy