LAMPULAN 19
19
Ephesia Me Paul
1Hüyange tüo ngai, Korinth me Apollos ngohwante, Paul-e ütokye kahmük lili kaiye taiphei me Ephesia te ngoi hüyange pin ütam tüo; 2hüyange imante tong, “Aope numan meng, Yaha Üjao tüoya ei?” Iman-e jan, “Yaha Üjao ngohnang she toman-e jai nehoi manjai.” 3Hüwante Iye i, “Hümma-a numan hanghe me bapti?” Hüyange iman-e i, “Johnne baptipu me.” 4Hüyange Paul-e i, “Johnne kahtalante I phei me peipu, hüke Jesute menglak yang she iye, monglüppe baptipuwe baptitam.” 5Hüyange iman-e aope tüopa jai, Youngwanpa Jesu min me iman baptitam. 6Paul-e I yakke imante shüngyange, iman tangte Yaha Üjao pei; hüyange iman-e ülao ngao me ngao, hüyange hi-ngao it. 7Iman khongkümpu penme ni nanjing ngoh.
8Hüyange Paul synagogue te ong, hüyange Kahwang Ahngching ngaolan jeng teilawe hüyange yoh-e lekeng lüm ngoiye wongnangpu phei Iye ngao. 9Hüyangpoi aope ütam üto-ülong hüyange ngao yejaipu lanne, hüyange ükhong sheshaome Youngwanpa lam jeng yemeipe ngao, I iman mepu yan, hüyange pinlan ülao ne ange Tairanas (Tyrannus) laipan me nyih jeih saki phawe nyüo. 10Hüke wangpeng ni linne tam, tüokhei Asia me ngohpu Jehudilan hüyange Greeklan üsheiye Youngwanpa ngao jai.
Seva Hayim
11Kahwange Paul kaiye yashantoi ülaopa kih ling. 12Hüke Paul-e jonpu lümphot yejema-a nyeshoh dakpalan tangte yahteiye iman dakpu meitam-e hüyange ünu yahalan taipu okke ngoh. 13Hüyangpoi ünu yahalan jange wa kempu Jehudilan ütam-e ünu yaha ngohpalan tangme Youngwanpa Jesu min me nyik-e janglak jingne ngang. Iman-e ünu yaha te i, “Paul-e ngaopu Jesu min me ngailak jingne taowe nang te inang.” 14Jehudilan Ütahpa Ngengpa Seva ühalan naoshe nyitte hüke ling. 15Hüwante ünu yahawe janne imante i, “Taowe Jesu shingnang, hüyange taowe Paul jeng shing nang; hüyangpoi numan aoyinshi?”
16Hüyange ünu yaha ngohpu kahtawe iman tangme phaowe phet, iman üshei nao, hüyange imante hüke wong jonphei me iman tüopa nok mepu pümkeng me ma yahyange phette tai. 17Hatüo jeng Ephesia me ngohpu Jehudi hüyange Greeklan üsheiye shinge pei; hüyange Youngwanpa Jesu Khrista min müktishiwa ne tam. 18Iman yo me menge ngohpu sheyongpu jinge iman toi janne hüyange ponge pei. 19Hüyange hitoi lingpalan maapuwe iman laitep jamshe shaijemme kahta üshei sheshao me vünte jakküm. Iman-e hatüo pheei itte lei hüyange ngin haja denga jingne ngoh. 20Tüokih-e Youngwanpa ngaowe yeonge jaalun hüyange okpu nge.
Ephesia Me Moppu
21Sha-a tüolan linyang phei me, aope Paul-e Macedonia hüyange Akhaia kaiye tai, Iye mongme Jerusalem te tailak tümyange i, “Tao tüoye me taiyang phei me, taowe Romete-o leilak wongpong.” 22Tüokhei Ite paopalan yo mepu kahta ni, Timothy hei Erastus Macedoniate shon yangphei me, I yoi nying nyingke Asia me kenja ngoh.
23Hüyange hatüo hipak ü-o me Youngwanpa lam jingne yeonge mop ngai: 24Hangjingne khüm ai jonpa ja Demetrius she minyange Artemi kahwang khümjing me khüm yaowe, Iye toijonpalan jingne küw yeonge yenetam. 25Iman tüopa toi jamuh jonpalan jamme jem ne tamyange Iye i, “Üyonglan, hatüo toishao kaiye teman moth tüonang she numan-e shing. 26Hüyangpoi hatüo Paul-e, Ephesia me shaha yeje, hüyangpoi Asia kahtok üshei ye me, yakke lingpulan-a kahwanglan yeje she iye yohnang, kahta maawe lüppe yene tamteki, she numan-e ngenang, hüyange jainang. 27Teman toishao hatüo jajang japune menglak ütuh shaha ne yeje, hüyangpoi kahwang üyongpa Artemis yopnok ye-ilak, hüyange Asia kahtok khongkümpu hüyange kahtoknyuwe khümpu I müktishiwa hei shemeipu mahne tamkülak.”
28Hüyange aope ükhonge tüopa jai, hüyange üngwünne i, “Ephesialan Artemis üyongpa!” 29Hüwante chingnyuwa moppuwe maa. Paul phei yinte kempu eihalan Macedonialan Gaius Aristarkhas iman-e phoyange, mong ja ne sheiyange wonjing kente shuwe phette jem. 30Paul-e ükhong yo me I onghuwe teih, hüyangpoi pinlanne Ite tük. 31I shümpa Asia me nokpulan ütamme I wonpu yo me yulak jingne tahngang she tongpu ngaolan I tangte shon. 32Tüokhei ütamme ngaoja, ütamme ülao ja she üngwün, hangjingne jempu nyoi moppuwe maa ngoh, hüyange sheyongpu jinge iman-a hangne jemme mop, yeshing, 33Jehudilanne Alexander sheshao yete shunge yüowe, ükhong yo mepu I ngaine tam. Hüyange Alexanderwe yak honge kahtalan lakne tamme, kahtalante shupu ngao ne she ngoh. 34Hüyangpoi aope iman-e I Jehudilan she shinge ok, üsheiye ja ne shüppe shayange ghonda ni nanjing üngwün, “Ephesialan Artemis üyongpa!”
35Hüyange aope chingnyu yaknyanpawe ükhong moppu lakne tam, Iye i, “O Ephesialan! Ephesialan chingnyuwa Artemis üyongpa khümjing hüyange mounga wangdang mepu yüt she yeshingpu kahta ao ngohnangki? 36Tüokhei tüolan jeng hango yejan oklak she shinge numan yemoppe ngohlak wongpong, hüyange hango mamme yelinglak yang. 37Hangjingne khümjing lan mepu toi kuhleihpu yejepulan yejema-a teman kahwangte yephoipalan kahta tüolan numan-e tüome woipei yangki. 38Tüokhei Demetrius hüyange I phei toilingpalan-e kahta ütam kaiye ngao ngaipune mengma-a ngaophün jingme epyange ngohnang, hüyange ngaophünpalan-o ngohnang: iman hei imanpa me teijanne tamtüoh. 39Hüyangpoi numan-e ngao ülao jeng yamm-a, hatüopa-a jinte ngao ine jempu nyoime phünlak. 40Hangjingne tenyih moppu jeng ngao ükong wangpu hango yenangpute, ütingme tomante-o ümeng phakülak wengtuh ngohnang; hüyange hatüo moppe jempu jeng toman-e hango üting ye-i-oklak.” 41Hüke Iye ngaoyang phei me, Iye jempuwa yanne tam.
Currently Selected:
LAMPULAN 19: KONYBSI
Highlight
Share
Compare
Copy
Want to have your highlights saved across all your devices? Sign up or sign in
Konyak Naga Bible - ÜJAO LAITEP
Copyright © 2011 by The Bible Society of India
Used by permission. All rights reserved worldwide.
