LAMPULAN 21
21
Paul Jerusalemte Ongnang
1Hüyange hatüo ngai, iman mepu toman yanne yenglin me taiphei me, shetingpupa Cos lam yete toman pei, hüyange üne nyih Rhodes, hüyange tüomepu Patara te toman tai. 2Tüome toman-e Phoenicia te tailak yenglin ja ngeye, toman onge shot hüyange tai. 3Hüyange toman-e Saipras dikhot ngeyange hatüo yaknya yeme tüohyang phei me, toman Syriate yenglin me tai, hüyange Tyre me ngai, hangjingne tüome yenglin-a hangki angne lak. 4Tüome pinlan ngeyang phei me, toman nyih nyit nyoi. Hüyange Yaha kaiye tüolan pinlanne Paul te Jerusalem te I ya yelokpu meilak she i. 5Hüyange tüo ngai, nyih peingoi phei me, toman yanne toman lamte tai. Hüyange sheko nyuyonglan hei hayimlan phei iman üsheiye chingnyu manlin küm she toman lünge tam, hüyange yengnah me ümme tawe toman yop. 6Tüophei me toman-e jawe jate salam teipha, hüyange toman yenglin ngoine yu, hüwante iman nokte leihye.
7Toman Tyre mepu yenglin me kempu lak phei me, toman Tolemais (Ptolemais) ngoi, hüyange jeihei naolante salam phawe iman phei nyih ja toman nyoi. 8Hüyange üne nyih toman yan, hüyange Kaisareate pei. Hüwante evangelist Philip, ao Jerusalem me lepu Deacon nyit yo me ja ne ngoh, I nokte onge toman-e I phei nyoi. 9I me toimantaipu I ha naoyha peli Kahwang ngao me hi ne ngoh. 10Tüome toman nyih nang jange nyoingoh wante, Judea mepu Agabas she minpu hipa ja pei. 11I toman tangte peiye, Paul jing shienghit yahpuwe, yoi ya hei yak me sha, hüyange i, “Yaha Üjaowe hüke inang, hatüo shienghit ao jingne mengyapei, hatüo kahta-a Jerusalem me Jehudilanne hüke shalak hüyange yinhulan yak me phünne phalak.” 12Aope toman-e tüopa jai, toman hei tüome ngohpalanne Paulte Jerusalem te ye-onglak jingne tong. 13Hüwante Paul-e jan, “Numan-e hangne shappe ümong mengne tampu? Hangjingne tao sha-ne tamlak shaha yeje, hüyangpoi Youngwanpa Jesu min jingne Jerusalem me lilak jingne-o tao tümme ngohnang.” 14Aope I yeyoh ok, toman-e lak hüyange i, “Youngwanpa mongpukih lingtüoh.”
15Tüolan nyih linphei me, toman tümyange Jerusalem te ong. 16Kaisarea mepu pinlan-o ütam toman phei pei, hüyange toman ngohpu Saipraslan Mnason, ao üwangpa pin ja ne ngoh, I iman phei woi pei.
Jerusalem Me Jeams Tangte Paul Ngoi
17Aope toman Jerusalem te pei, jeiheinaolanne mongmei me toman yah. 18Üne nyih Paul-e toman phei Jeams tangte tai; hüyange tüome jeiyonglan kümme jemme ngoh. 19Iye imante salam phayang phei me, I toi kaiye yinhulan yo me Kahwange lingpu toishaolan ja phei me ja she i. 20Aope iman-e tüopa jai, iman-e Kahwang müktishiwa ne tam, hüyange iman-e Ite i, “Jeiheinao, Jehudilan yo me mengpalan haja hangshin ngoh, hüyange iman üsheiye ngaokeng jingne lahnyikke hangshin ngohnang she hatüo nange nge. 21Hüyange yinhulan yo me ngohpu Jehudilan üsheite iman hayimlan shoyekhüplak hüyange Mosa ngaokeng me yekemlak üja she nange nyüonang she nang jeng imante shingne tamyangki. 22Hümma-a teman-e hang linglak shi? Nang peiye ngohnang she iman-e üting me jailak. 23Tüokhei toman-e ipu tüopa nange lingtüoh. Jiengyange ngohpu kahta peli toman phei ngohnang. 24Iman woitaitüoh, hüyange iman phei nang nying nyingke jaowetampu yahtüoh, hüyange iman shang linpu oklak ne nange iman jingne ngin phatüoh. Hüwantepa-a hanghe nang jeng imante shingne tamyange ngoh, tüowa üleih, hüyangpoi nange-o ngaokenga jonne shuwe kemnang she üsheiye shinglak. 25Hüyangpoi menge ngohpu yinhulan jingne-a, moung te toidopu toilan mepu, phütte toipu mepu, hüyange yejao yeshapu mepu iman yanne ngohtüoh she, toman-e tümpu nyanyange pha.” 26Tüokhei Paul-e kahtalan woi, hüyange üne nyih iman phei jaowe tampu hipak yah. Tüophei me I khümjing te ong hüyange jaowe tampu hipak üküm manngoi manngoi nyih hangshin tüopa jingne ngohlak, aope iman jaja jingne toidopu phalak tüopa jingne shingne tamme ngoh.
Khümjing Me Paul Pho
27Aope nyih nyit üküm ngoiye peine ngoh, Asia mepu Jehudilanne yopnok me I ngeye, ükhong üshei mopne tam; hüyange Ite yak yuwe phoyange üngwün, 28“Israellan, jemtüoh! Jehudilan hüyange teman ngaokeng hüyange hatüo nok phei tüi-e kahta üsheite üshei yeme aowe konnyüo, hatüo kahta-a tüome! Tüophei shenyei she Iye Greeklan-o khümjing te woipei, hüyange tüopa üjao nyoi nune tamyangki!” 29Hangjingne tüopa nyih sheshao me Ephesialan Trophimus I phei chingnyu me iman-e ngeyangki, hüyange Iye I khümjing te woi intepu she iman-e teih. 30Chingnyu nopume moppuwe maawe kahtalan jamshe phette jem, hüyange iman-e Paulte tükyange khümjing mepu shuiyüo. Hüyange hüwante muh khümjing taküp khongkümpu küp. 31Hüke iman-e I toilak ngangwante, Jerusalem khongkümpu me moppu ngohnangki she haja tangme woipa tangte ngaolan pei. 32Hüwante muh Iye I phei kengphetlan hüyange gho ja woipalan woiyange iman tangte phette peingoi. Hüyange aope haja tangme woipa hüyange kengphetlan iman-e nge, Paul te shetpu lak. 33Hüwante haja woipa I shongte wenne Paulte yakyu, hüyange Ite yanwu niye shalak jingne ngaopha. Hüyange I ao, hüyange Iye hanghe ling? she Iye tong. 34Ükhong yo me ütamme ülam ja, ütamme ülaolam ja she üngwün. Hüyange aope moppuwe ütingpa ngaowa yeshing, Iye yoi yomtep te woi inlak jingne ngao pha. 35Aope Paul shaijing ngoi, ükhong üyong jamloi kattewongpu jingne kengphetlanne I nowe inlak ne ngai. 36Kahta ükhong üyong tokphei me üngwünne woiye i, “I toitüoh!”
Ükhongte Paul-e Ngao
37Hüyange Paul yomtep te woitei ne ngohpu hipak me Iye haja woipa te i, “Taowe nangte ülamja ipha ning yüo?” Hüyange haja woipawe i, “Nange Greek ngao nangkü a?” 38“Hüma-a, üshongpe kahta toiye mop ngaine tamyange haja peli phaote woiteipu Egypt pa-a nang ne üje no?”
39Paul-e i, “Tao Cilicia mepu Tarsaslan Jehudi kahta ja; üjoi ünao chingnyu kahta ne yeje. Taowe ükhongte ngao ilak jingne tamkhu she taowe nangte tong nang.”
40Hüyange aope Iye Ite ngaone tam, Paul shaijing me yongyange ükhongte I yak honge lakne tam. Hüyange aope yelangmanpe lak, Iye Hebrew ngaome ngaowe imante i:
Currently Selected:
LAMPULAN 21: KONYBSI
Highlight
Share
Compare
Copy
Want to have your highlights saved across all your devices? Sign up or sign in
Konyak Naga Bible - ÜJAO LAITEP
Copyright © 2011 by The Bible Society of India
Used by permission. All rights reserved worldwide.
