LAMPULAN 22
22
1“Jeiheinaolan hüyange üpa yiman, taowe sha-a numan shaome tao shuwe ngohpu ngao ipha ning jaitüoh!”
2Aope Iye Hebrew me imante ngaowe jai, iman-e ünyei yemoppe wünge lak. Hüyange Iye i:
3“Tao Jehudi kahta ja, Cilicia me Tarsas chingnyu me tao puh, hüyangpoi Gamaliel konnyüopa phangme naha ja ne tüopa Jerusalem me shingmanne jong. Teman puyimlan mepu ngaokeng wanpu jeng taowe tüo, hüyange tenyih numan üshei yongpu kih tao Kahwang jingne yeonge lahnyikke ngohyangki. 4#Lam 9.1-19; 26.9-18; Gal 1.14.Hüyange hatüo lam me aoyin woi taowe lilakne netan hei sheko moilan shayange küpnok me ange shaoshine tam. 5Hatüo jeng Ütahpa Ngengpa hüyange jeiyonglan-o üshei ü-saki ngohnang. Iman mepu taowe jeiheinaolan jingne nyanpu lai yah, hüyange tüome ngohpalan shangne tamlak jingne Jerusalem te shayange woipeilak jingne tao Damascus te tai.”
Paul-e I Monglüppu Jeng Inang
(Lam 9.1-19; 26.12-18)
6“Hüyange hatüo ngai, tao aope Damascus ü-o ngoi, nyihning hipak me, mokh she ü-neikon-e wangdang mepu, wangngai üyong ja teetam. 7Hüwante tao kahtokte yei, hüyange ngao jawe üte ngaowe jai, ‘Saul Saul! Hangjingne nange tao shangne tampu?’ 8Hüyange taowe jan, ‘Youngwanpa, nang ao shi?’ Hüyange Iye üte i, ‘Nange shangne tampu Nazarethlan Jesu tao.’ 9Hüyange ü-phei ngohpalanne wangngai ütingme nge, hüyangpoi aowe üte ngao I ngaowüng iman-e yejai. 10Hüyange taowe i, ‘Youngwanpa, taowe hang linglak shi?’ Youngwanpawe üte i, ‘Yayong tüoh, hüyange Damascuste ongtüoh, nang jingne hanghe linglak tümyange ngohnang, tüoyin khongkümpu jeng tüome nangte ilak.’ 11Aope wangngai ütee kaiye taowe hango ye-ngepe ngai, ü-phei jamme ngohpalanne, yak me shuiyange Damascus te inne tam.
12“Hüyange ngaokeng me ngohpukih wanglam te kenpu, tüome ngohpu Jehudilan üsheiye minyonge ngaohümpu kahta ja Ananias ü-tangte pei; 13hüyange ü-shongme yongyange üte i, ‘Jeiheinao Saul, nange nishe ngetüoh.’ Hüwante muh taowe I nge. 14Hüyange Iye i, ‘Teman puyimlan Kahwange Iye mongpu shinglak, hüyange ütingpa ngelak, hüyange I jumepu ngaowüng ja jailak, nang leyangki.’ 15Hangjingne nange hangyin ngeyangki hüyange jaiteki hatüo jeng kahta üshei tangte I jingne nang saki ne menglak. 16Sha-a nang hangne tanne ngohlak? ‘Yayong tüoh, hüyange I min me nyik-e baptitüoh, hüyange nang ünu poitüoh.’
Paul Yinhulan Tangte Shon
17“Aope tao Jerusalem te leihye hüyange khümjing me yoppe ngoh, tao mükngoih shonge tawante himang ja nge, 18hüyange üte i, ‘Mamyah hüyange Jerusalem mepu mamshe taitüoh, hangjingne iman-e nang mepu üjing saki yeyahkülak.’ 19Hüyange taowe i, ‘Youngwanpa, synagogue lili me nangte mengpalan taowe küpnok me küo hüyange shet she iman-e iman nying nyingke shing. 20Hüyange aope nang saki phapu Stephen toi, tao-o ü-o me yongyange ümonghah-e ngoh, hüyange I toipalan nyemo taowe jonne ngoh.’ 21Hüwante Iye üte i, ‘Taitüoh, hangjingne Yinhulan tangte üjaite taowe nang shonlak.’ ”
Paul Hüyange Roman Haja Woipa
22Tüopa ngao ngoiye hei iman-e jai, hüyange iman-e ngao üyong ngaiye üngwünne i, “Tüokihpu kahta kahtoknyu mepu yanne tamtüoh! Hangjingne I üyin ngohlak yewang.” 23Hüyange iman-e üngwün, hüyange iman inkhek khokke yüp, hüyange wangyete kahmak puishüp. 24Haja woipawe hanghe jingne iman-e I phei tüi-e üngwün tüo shinglak jingne, hüyange Ite shette ngao tonglak jingne, I yomtep te woi inlak ngao pha. 25Hüyangpoi aope iman-e Ite shetlak jingne sha, I shongme yongpu ghoja woipate Paul-e i, “Nange Rome nyupuh kahta ja, ao te ümeng yepha, Ite shetlak shupu heiya yeshupu shi?” 26Aope ghoja woipawe tüo ngao jai, haja woipa tangte wenne i, “Nange hang linglak she ngohnangki? Hangjingne tüopa kahta-a Rome nyupuh yang”! 27Hüyange haja woipa wenne Ite i, “Üte ipha, nang Rome nyupuh a?” Iye jan, “Üm.” 28Hüwante haja woipawe jan, “Ngin yeonge phayange taowe tüopa nyupuh kahta ne meng.” Hüwante Paul-e i, “Hüyangpoi taowa puhnap memuh Rome nyupuh.” 29Hüwante aoyinne Ite ngao tongne she ngoh, iman hüwante muh I mepu yan. Hüyange aope haja woipawe I Rome kahta she shing, I nyam, hangjingne Iye Paul te shayangki.
Ngengtüp Sheshaome Paul
30Hüyangpoi üne nyih, hangne Jehudilanne Ite ümeng pha, hatüo meimeiye shinghuwe haja woipawe I lan. Hüyange ngengpa üjenglan hei Pangshanlan üshei jam-e jemne Iye ngaopha, hüyange Paul woipeiye iman shaome angne tam.
Currently Selected:
LAMPULAN 22: KONYBSI
Highlight
Share
Compare
Copy
Want to have your highlights saved across all your devices? Sign up or sign in
Konyak Naga Bible - ÜJAO LAITEP
Copyright © 2011 by The Bible Society of India
Used by permission. All rights reserved worldwide.
