LAMPULAN 23
23
1Paul-e Ngengtüp te tingkhakke leiyange i, “Jeiheinaolan, tenyih ngoiye Kahwang shongme juteih mongjang ümei me hei tao ngoh wenyangki.” 2Hüwante Ütahpa Ngengpa Ananiaswe I shongme yonge ngohpalante Paul jute eptüoh she ngaokeng pha. 3Hüwante Paul-e Ite i, “Nang jan ühengpa, Kahwange nangte shetlak! Ngaokenge ü-ngao phünne nang shotyange, hüyange ngaokeng püoh-e üte eppe tamlak nange ngaokeng phanangkü a?” 4Hüwante Paul shongme yonge ngohpu lanne i, “Nange Kahwang Ütahpa Ngengpa te teetam nang!” 5#Woi 22.28.Hüyange Paul-e i, “Jeiheinaolan, I Ütahpa Ngengpa she taowe yeshingpe ngoh, hangjingne hatüo nyanne ngohnang, ‘Numan kahtalan tangme wanglam lampa ja te nange ümeng tahngao.’ ”
6Hüyangpoi aope Paul-e iman ütam Sadduceelan hüyange ütam Phariseelan she nge ok, Iye Ngengtüp te üngwünne i, “Jeiheinaolan, tao-o Pharisee ja hüyange Pharisee üha ja. Lipalan monghümlak hüyange yange yepu jeng me ü-ngao phünnang.” 7Iye hüke ngaoyang phei me, Phariseelan hei Sadduceelan pa me teepu ngai, hüyange jempuwa tamme ngai. 8Hangjingne Sadduceelanne yange yepu, yejema-a wangdang shongmokpa jeya, Yaha jeya yenang she inang; hüyangpoi Phariseelanne tüolan moilante üting laknang. 9Tüokhei moppu üyongne ngai, hüyange Phariseelan ükhong yo mepu ngaokeng nyüopalan ütam yonge yeonge wanne i, “Hatüo kahta me toman-e hang ümengo ye-nge, hüyange yaha jawe yejema-a wangdang shongmokpa jawe Ite ngaoyangki she ima-a hang ngoh nangki?”
10Aope teepuwa yeonge yemeipe ngai, iman-e Paul khoihnyaiye hittamlak she nyamme, haja woipawe kengphetlan yu ne tam hüyange iman yomepu I nyieye yomtep te woi inlak jingne ngaopha.
11Hüyange tüoya Youngwanpa I shongme yongyange i, “Wongnang yah, hangjingne Jerusalem me nange ü-jeng saki phapukih, Rome me-o hüke nange saki phalak yang.”
Paul Toine Konkonpu
12Aope wangngai, Jehudilan ja ne meng, hüyange iman-e Paul mantoi mantoi hah-o yehahlak, ying-o yeyinglak she iye, iman yo me teijiengpu yah. 13Tüopa konmeng konpulan-a iman deli phei nyeiye ngoh. 14Hüyange iman-e ngengpa üjenglan hüyange jeiyonglan tangte peiye i, “Toman-e Paul mantoi mantoi hango yehahlak jingne, toman-e ngao üyongne teijieng yangki. 15Tüokhei numan-e sha-a Ngengtüp phei haja woipa omme I ngao ünyei shopu phünne ngaolakei she iye, Iye I numan tangte woipeikei she tongtüoh. Hüyange Iye numan shongte manpeipe, toman-e I toine tümyange ngohnang.”
16Hüyangpoi Paul ülishepawe iman-e doyu ne ipu jeng jai, hüyange yomtep te onge Paulte i. 17Hüwante Paul-e ghoja woipa ja nyik-e peiye i, “Tüopa naoshe haja woipa tangte woitei tüoh, hangjingne Iye Ite ülam ja ilak ngohnang.” 18Tüokhei Iye yoi haja woipa tangte woiteiye i, “Küpnok me ngohpu Paul-e I tangte tao nyik, hüyange hatüo naoshe, aowe nangte ülam ja ilak ngohnang, I nang te woipeilak jingne tong.” 19Hüyange haja woipawe Ite yakme jonyange woiyah hüyange lowe tong, “Nange üte hanghe ilak ngohnang ki?” 20Iye i, “Ngainyih ngengtüp shaome Paul yah laine tamkei she, hüyange hüke ngohyahpoi I jeng ünyei üpong tüowe yamhu nangki she nangte lowelamme tam-e tonglak jingne Jehudilanne mongtepu. 21Tüokhei iman-e nang yohne tahtam, hangjingne iman deli phei nyeiye Ite doyulak jingne shotte ngohnang. Iman-e I mantoi mantoi hah-o yehahlak, ying-o yeyinglak ngao jiengyange ngoh nang. Shaa-o iman-e nangmepu janpu tanne tümme ngohnang.” 22Haja woipa i, “Nange üte tüolan ngao shingne tam she aote-o tah i.” Hüyange Iye naoshepa taine tam.
Governor Felix Tangte Paul Shon
23Hüyange Iye ghoja woipa ni I tangte nyik-e peiye i, “Teya tupaji hipak nanjing me yayonglak hüyange Kaisarea ngoilak jingne, kengphet gho ni, koipong me shotpu denyit, hüyange ngou jonpu kahta ghoni tümne tamtüoh. 24Hüyange Paul shotlak jingne koipong tümtüoh, hüyange Governor Felix tangte yeonge meiye woiteilak jingne Iye i.” 25Hüyange Iye laija hüke nyan:
26“Üshei tangte üyongpa Governor Felix tangte Laudius Lysiawe salam shonnang. 27Hatüo kahta Jehudilanne pho hüyange patoi she ngoh. Taowe Iya Rome nyupuh she jai, tüokhei Ü-kengphetlan phei tao tai hüyange I yin. 28Hüyange iman-e I hangke ngohtüoh-e ümeng ne i, hatüo shinghuwe, iman ngengtüp shaote taowe I woipei. 29Hatüome iman ngaokeng teitongpu jengme I ümengne i, hüyangpoi I lilakne yejema-a küpnok me anglak ne I me ümeng hango yenang she taowe yam ok. 30Hüyange aope Jehudilanne I phei tüi-e ümeng lingne tümnang she üte shingne tam, taowe I nang tangte shonlak jingne mongyangki. I phei tüi-e yongpalan te-o nang sheshao me I jeng itüoh she taowe iyangpu.”
31Tüokhei imante ngaokeng phapuke, kengphetlanne Paul yah hüyange wangnyak me Antipatris tangte I woitai. 32Hüyangpoi üne nyih iman-e koipong me shotpalan I phei taine tüoh, hüyange iman yomtep te leih ye. 33Aope iman-e Kaisareate pei hüyange nyanpulai Governor te pha, hüyange Paul-o I shongme yongne tam. 34Hüyange nyanpulai iyang phei me, Iye I ümpehepa kahtok mepu she tong. Aope Iye I Cilicia mepu she shing; 35Iye i, “Aope nangte ümeng phapalan peilakeih, taowe nang ngao khongkümpu jailak.” Hüyange I Herod ahngpa nokme angtüoh she ngao pha.
Currently Selected:
LAMPULAN 23: KONYBSI
Highlight
Share
Compare
Copy
Want to have your highlights saved across all your devices? Sign up or sign in
Konyak Naga Bible - ÜJAO LAITEP
Copyright © 2011 by The Bible Society of India
Used by permission. All rights reserved worldwide.
