LAMPULAN 24
24
Kaisarea Felix Sheshao Me Paul
1Nyih nga ngohyang phei me, jeiyonglan ütam hüyange Tertullus she minpu ngao iye okpu kahta ja phei Ütahpa Ngengpa Ananias lai, hüyange iman-e Paul phei tüi-e Governor tangte ngao pei. 2Aope Paulte nyik Tertulluswe I yeshupu jeng iye wang:
“Üshei tangte üyongpa Felix! Nang kaiye toman-e toloimei üyong tüowe, hüyange nange paowe tongpu jingne tüopa jat jingne ümeng hango peine yetampe lintampu nanjingne; 3toman-e hatüolam üshei me hüyange kenphe me yeonge monghah yah nangki. 4Taowe nang hipak meiyang yewinhu, nange toman ngao üjingha chingmei lamlinge jailak jingne taowe nangte tongnang. 5Hangjingne hatüowa pokke nopu phapu kahta ja, hüyange kahtoknyu üshei me Jehudilan mopne tampu ja, hüyange Nazarene ükhong woipa üjengpa ja she toman-e ngeye peiyangki. 6Tüokaiye Iye khümjing nehoi nuwe tamne ngang. Hüyangpoi toman-e I pho. (Toman-e toman ngaokeng ke Ite phünhu, 7hüyangpoi haja woipa Lysia peingoi, hüyange yakyuwe toman mepu I yahtei. 8Tüophei me Ite ümeng phapalan nang tangte peilak jingne Lysiawe ngaopha.) Nange tüopa kahtate tongküme, toman-e hangjingne I ümengne i, tüolan nang nying nyingke shinglak.” 9Hüyange Jehudilanne-o tüolan-a üting üja she iye, I ümengne ipu me omme yong.
Felix Sheshaome Paul Tienpu
10Aope Governorwe Iye ngaolak jingne yak tonne i, Paul-e jan:
“Wangpeng nangjange tüopa jat jingne nang ngao phünpa ja ne menge pei she taowe shingyah-e, taowe ü-ümeng tienpu ngao ine mongmei nang. 11Hangjingne tao Jerusalemte yoppe khümne ongyang phei me tenyih iye nyih penme ni phei nyeiye mantaishe nange shingne ok. 12Hüyange khümjing me jeyah, synagogue me jeyah, hüyange chingnyu me jeyah tao ao phei-o ngao moppu, yejema-a ükhong mopne tamme iman-e ye-nge. 13Yejema-a sha-a hanghe jingne iman-e tao ümengne i hatüo nangte iman-e ngaoting she hüone ye-ok. 14Taowe nang te jannang: Iman-e yeshu she ipu Lam teman puyimlan Kahwangte taowe khümnang; Hüyangpoi ngaokeng me ngohpu ngaolan khongkümpu hüyange hipalan laitep me hangyin nyanne ngoh tüolante taowe mengnang. 15Hüyange üjaolan hüyange ünulan moini yange yelak she imane-o monghümme ngohpukih, taowe Kahwangte monghüm nang. 16Tüokhei Kahwang hei kahta ye me jinte juteih mongjang ümei ngohlak jingne tao-o ü-nying nyingke ngang nang.”
17“Wangpeng nangjange Jerusalem mepu yanne ngohyang phei me, ü-jat jingne hünghao hüyange dopu peiye tamlak jingne tao pei. 18Tüoyin phawe ngohwante iman-e khümjing me tao jaoweshapu nge, hüyangpoi ükhong phei yeje, yejema-a üne-o moppe yeje. Hüyange Asia mepu Jehudilan ütam ngohyangki. 19Iman-e ü-phei tüi-e ngao ngaima-a, tüome nang tangte woipei hahshepu, hüyange iman-e iman nying nyingke tao ümengne ihah shepu. 20Yejema-a aope tao Ngengtüp sheshaome yong, hang ümeng üme nge tüome yonge ngohpu tüolan kahtawe min ikei. 21Tao aope iman sheshao me yong, ‘Lipulan yange yelak she taowe mengpu jingne tenyih numan-e üte ngaophün nang’, she taowe üngwün.”
22Hüyangpoi Felix, aowe Lamjeng meimeiye shingyange ngoh, iman ngao lakne tamme i, “Aope haja woipa Lysia ngoilakei, numan ngao taowe phünlak.” 23Hüyange Iye ghoja woipate Paul küpnok me anglak, hüyangpoi I kemme yongne tamlak, hüyange I shümpalan ao te-o Ite paolak mepu tahkhüm she ngaopha.
Paul Küpnok Me Muh Tüoh
24Nyih ütenja linphei me, Felix I shekonyu, Jehudi yha Drusilla phei pei, hüyange Paul nyik-e Khrista Jesu me ütinglakpu jeng I mepu jai. 25Hüyange ütingpa jeng yoi nying nyingke tükke okpu, hüyange Ngoikülak ngaophünpu nyih jeng Iye saki phawe ngaowante, Felix yeonge nyam, hüyange janne i, “Tenyihpu jingne-a hüke jataitüoh. Üte meipu hipak ja me taowe nang ü-tangte nyikpha peih.” 26Paul-e Ite ngin phakülak she Iye monghümme, tüojingne I nyikne shonkhan shonne I phei teingao.
27Aope wangpeng ni ngoi pei, Felix nanleiye Porcius Festus Governor ne meng; hüyange Felix-e Jehudilanne Ite kenne tamhuwe Paul küpnok me tüoh.
Currently Selected:
LAMPULAN 24: KONYBSI
Highlight
Share
Compare
Copy
Want to have your highlights saved across all your devices? Sign up or sign in
Konyak Naga Bible - ÜJAO LAITEP
Copyright © 2011 by The Bible Society of India
Used by permission. All rights reserved worldwide.
