LAMPULAN 6
6
Teijampalan (Deacon) Nyit Le
1Sha-a tüopa nyih hei hipak me aope pinlan shangtoi pange ngai, Greek ngaopu Jehudilanne Hebrewlan pa ipu ngai, hangjingne iman wamnyulan nyihjeih hahying meitamme yepükpe shüppe ang. 2Tüokhei penme niye pinlan ükhong iman tangte nyik-e i: “Teman-e hahying namnolak jingne Kahwang ngao winlak yeshu. 3Tüokhei jeiheinaolan, min mei ngohpu hüyange Yaha maapu juteih wangpu kahta nyit, aoyin teman-e tüopa toite leilak jingne lelak, numan yo me yamtüoh. 4Hüphei me, tomanpa-a, yoppu me hüyange konnyüopu toime lanshe hipak phünne phaküning.”
5Hüyange tüopa ngao jaiye ükhong moilan mongmei, hüyange ütinglakpu hüyange Yaha Üjaowe maapu kahta ja Stephen; tüophei me Philip, Prochorus, Nicanor; Timon, Parmenas, hüyange Antiok mepu Jehudi wanglam yahpu yinhu ja Nikolas, iman-e le. 6Tüolan iman-e lampulan sheshao me peitam, hüyange iman-e yopyang phei me, yakke imante shüng.
7Hüyange Kahwang ngao jaalun, hüyange Jerusalem me pinlan maawe shangtoi ipu me om; hüyange ngengpa ükhong üyong jawe ütinglakpu yah.
Stephen Phopu
8Hüyange Stephen shüpshe hüyange ünganwonge maawe, kahtalan yo me yashanyali hüyange kahnyingwüngha füo üyong ling. 9Hüyange iman Nanngai Synagogue (hatüo hüke nyikpu ngoh) mepu ütam, hüyange Cyrenia, hüyange Alexandria, hüyange Cilicia mepu, hüyange Asia lanne Stephen phei ngaomop ngaiye yong. 10Hüyange Iye konngao hüyange Yaha phei ngaopu iman-e yenao ok.
11Tüokhei iman-e kahta ütamte lowe phayange hüke ngaone tam, “Iye Mosa hüyange Kahwang phei tüi-e ngaopu toman-e jaiyangki!” 12Hüyange iman-e kahtalan, jeiyonglan, hüyange ngaokeng nyüopalan mopne tam, hüyange I tangte peiye I phowe pangshanlan sheshao me woipei. 13Hüyange iman-e ngaoleih saki phalak jingne ütam peiye ang, hüyange tüolanne hüke i, “Hatüo üjao nyoi hüyange ngaokeng phei tüi-e kahta tüowe ngaopu yelak. 14Hangjingne hatüo Nazarethlan Jesuwe nok hatüo menglak hüyange Mosawe tomante phapu wanglam leijeitamlak she Iye ngaopu toman-e jaiyangki.”
15Hüyange shotte ngohpu pangshanlan üsheiye Stephen te tingkhakke lei hüyange I sheta wangdang shongmokpa sheta kih nge.
Currently Selected:
LAMPULAN 6: KONYBSI
Highlight
Share
Copy
Want to have your highlights saved across all your devices? Sign up or sign in
Konyak Naga Bible - ÜJAO LAITEP
Copyright © 2011 by The Bible Society of India
Used by permission. All rights reserved worldwide.
