LAMPULAN 7
7
Ngengtüp Me Stephen Ngao
1Hüwante Ütahpa Ngengpa-e Stephen te i, “Hatüolan-a üting ne jeyah?”
2 #
Tüo 29.3; Kaht 11.31; 15.7. Hüyange Stephenne i: “Jeiheinaolan hüyange üpa yiman, ü-ngao jaikhu! Aope teman üpa Abraham, I Haran me nyoishao me; Mesopotamia me nyoingoh, müktishiwa Kahwang I tangte ngai; 3#Kaht 12.1.hüyange Ite i, ‘Nenok hüyange nang kahtok tüotüoh hüyange Taowe nangte hanghepa kahtok hüolakei tüote taitüoh’ 4#Kaht 11.31; 15.7; 12.5.Hüwante Iye Chaldea kahtok tüoh hüyange Haran me nyoilak jingne tai. Hüyange aope Ipa li, tüomepu numan sha-a ümeken me ngoh hatüo kahtokte Kahwange I woipei. 5#Hin 2.5; Kaht 12.7; 17.8.Hüwante Kahwange Abraham te yoi moth ne menglak jingne, hüyange yapha loklak nyoi shinne nehoi hango yepha; hüyangpoi hatüo Iye Ite phalak hüyange hatüo I jingne hüyange I mepu jaalunpulan jingne menglak she Kahwange jan. Kahwange hatüo janwante Abraham hayim yenangpe ngoh. 6#Kaht 15.13-14.Hüyange Kahwange hüke i: ‘Nangme jaalunpulan mih kahtok me wangpeng gho peli jingne rha shaoshanne hüyange wanwao ponge, jonne tamme nyoilak. 7#Woi 3.12.Hüyangpoi iman ao jat shaoshan lakei hatüo jat te Taowe ngao phünlak. Tüophei me iman leih yelak, hüyange tüome ü-shaoshanlak she Kahwange i.’ 8#Kaht 17.10-14; 21.2-4; 25.26; 29.31-35; 30.1-24; 35.16-18; 35.23-26.Hüyange Iye shokhüppe jiengpu Ite pha. Hüyange hatüoke Abraham mepu Isaac ngai, hüyange nyih tet shepu nyih me I shokhüp, hüyange Isaac mepu Jacob, hüyange Jacob mepu pajeiyonglan pen me ni ngai.
9 #
Kaht 37.11,28; 45.4. #Kaht 39.2-3,21.“Hüpoi pajeiyonglan-e Joseph te müktak, Egypt lante yüo; hüyangpoi Kahwang Iphei ngoh. 10#Kaht 41.40-46; Tüo 105.21.Hüyange I shange pongpu üshei mepu yin, hüyange Egypt Ahngpa, Pharaoh mükshao me meiye ngene tam hüyange konheingao pha. Hüwante Egypt hüyange I Ahngpa nok üshei tangme Iye I wanglam lampa ne mengetam. 11#Kaht 41.54-55; 42.5.Hüwante Egypt hei Kanan üshei me seanyao yengle hüyange shange pongpu üyong pei, tüokaiye teman puyimlanne hahlak yetüo. 12#Kaht 42.2.Tüokhei aope Jacob-e Egypt kahtok me tah ngohnang she jai, Iye toman puyimlan üwang üne yinte tei. 13#Kaht 45.1-4.Hüyange ün ni shepupa me Joseph yoi jeiheinaolante shingne tam hüyange Joseph nok Pharaoh te shingne tam. 14#Kaht 45.9-10. #Hin 10.22.Hüwante Ipa Jacob hüyange yoi nok üshei kahta denyit me nga ngoh, Joseph-e I tangte nyik. 15Tüokhei Jacob Egypt te ta, hüyange I hei teman puyimlan li; 16#Jos 24.32; Kaht 50.13.hüyange iman-e mang Shekhemte yahtei, Abraham-e Shekhem me Hamor hayim lan mepu ngin phayange shakke angpu mangjong me mu.
17 #
Woi 1.7-8. “Hüyangpoi hanghe jiengpu Kahwange Abrahamte pha hatüo ngailak hipak owe peiwante, Egypt me Israel kahtalan jaalun-e maangai. 18Ükümne Joseph yeshingpu Ahngjawe, Egypt me wanglam lam ne wang. 19#Woi 1.10-11; 1.15-22.Iye teman jat te aohüng puphei jon, hüyange teman puyimlante menge jon; hüyange iman üyin ne mintah meng she naotak halan chingyang ko me angne tam. 20#Woi 2.2.Hatüo hipak me Mosa puh, hüyange naoshe yeonge meingoh. Hüyange Ipa nokme I lekeng lüm jongne tam; 21#Woi 2.5-6,10.hüyange aope I win, Pharaoh üha yhalawe yahye, hüyange yha üha ne menglak jingne pao. 22Hüyange Egypt lan konngao khongkümpu Mosa te nyüo, hüyange I ngaopu me hüyange toi me yeonge okkeshange ngoh.
23 #
Woi 2.11-15. “Aope I wangpeng deli ne ngoh, yoi jeiheinao Israellan phei pongne I mongjang me teipei. 24Hüyange iman yo me ja Egypt naoshe jawe menge jonpu ngeye, Iye Egypt pa te shette I phuh hah, hüyange tüopa toi. 25Hüyange I yakke Kahwange I jeiheinao lante yinyepu phanangki she, iman-e shingnang she Iye teih, hüyangpoi iman-e yeshing. 26Üne nyih iman teishette ngohwante, I iman shongte wen; hüyange imante chingmei lingne ngange i, ‘Kahtalan, numan jeiheinao ja ngohnang; hangne shejawe sheja te ümeng jonpu shi?’ 27Hüyangpoi Iphei teekong wangpupawe Ite shunge i, ‘Aowe nang toman tangte wanglam lamne hüyange ngaophünpa ja ne menge tampu shi? 28Nange menyih Egypt lan toipu kih-e tao toihupu a?’ 29#Woi 2.22; 18.3-4.Aope Mosawe tüo jai, Egypt mepu I phette tai, hüyange Midian me nyoine wang. Tüome Iye nao she ni puh.”
30 #
Woi 3.1-10. “Hüyange wangpeng deli linyang phei me, Sinai kahtang phaome phümtümp ja me vün ngai tüome wangdang shongmokpa ja I tangte ngai. 31Aope Mosa tüopa nge, Iye ngepu lante yashan, hüyange Iye leilak jingne owe wenwante, Youngwanpawe ngaowe pei: 32‘Tao nangpu yimlan Kahwang, Abraham hüyange Isaac hüyange Jacob Kahwang.’ Hüyange Mosa nyamme nün, hüyange leilak jingne mong yeyong. 33Hüyange Youngwanpawe Ite i, ‘Nang ya mepu yashom khoktüoh, hangjingne nang yonge ngohjing kahtok üjao ngohnang. 34Egypt me ü-kahtalan shange pongpu Taowe ütingme ngeyangki, hüyange iman yinlak jingne Tao laiyangki; hüyange sha-a wenkei, Taowe nang Egypt te shonning.’
35 #
Woi 2.14. “Hatüo Mosa Israel kahtalanne yeyah, hüyange hüke i, ‘Nang toman tangme wanglam lampa hüyange ngaophünpa ne aowe mengtam ei?’ Kahwange wanglam lampa ne hüyange yinyepa ne, Iye vün-phümtümp me ngepu wangdang shongmokpa kaiye shon. 36#Woi 7.3; 14.21; Lung 14.33.Hatüo kahtawe Egypt me, Ütak Yengching me hüyange phaonyu jongme wang deli yashanyali hüyange kahnyingwüngha lingyange, iman woitei. 37#Hin 18.15,18.Hatüo Mosawe Israel hayimte i, ‘Kahwange numan jeiheinao lan yo mepu numan jingne tao kihpu hipa ja ngaitamlak.’ 38#Woi 19.Hatüowa I ao phaonyu jongme Israellan jemwante omme ngoh; I teman puyimlan phei ngoh hüyange I phei Sinai kahtang me ngaopu wangdang shongmokpa phei ngoh; teman te phalak jingne Iye Kahwang mepu üyin ngaolan tüo.
39 #
Lung 14.3-4. “Hüyangpoi Ite teman puyimlanne ngao yejaipe ling, hüyange iman mepu I kawin, hüyange iman mongjang Egypt te nishe leihye. 40#Woi 32.1,23.Hüyange iman-e Aaron te i, ‘Toman shaote tailak jingne tomante kahwanglan lingpha, hangjingne tüopa Mosa, aowe Egypt mepu toman woipei, I hangne mengyapeih toman-e yeshing.’ 41#Woi 32.4,6.Hüyange tüopa nyih hei hipak me iman-e mahu üpongha ja ling, hüyange tüopa te dopu yahpeiye khüm, iman yakke ling okpu toi me mongmei. 42#Jer 19.13. #Amos 5.25-27.Hüyangpoi iman mepu Kahwang lüp hüyange wangdang shanhalan khümlak jingne tüoh, hipalan laitep me nyanpu kih:
“ ‘Üte toipu yinmoklan hüyange dopulan numan-e phaya ei!
Wangpeng deli phaonyu jongme, O Israel jatlan!
43Hüyange numan-e Molech nyenok jon,
hüyange Rephan kahwang shanha khümlak jingne numan-e mieng leiyange ling;
tüokhei taowe numan Babilon kaiye yahteilak.’
44 #
Woi 25.9,40. “Hanghepake Iye nge, hatüo leye lingtüoh she aowe Mosa te i, Iye mongpu saki nyenok ke teman puyimlan phei phaonyu jongme hatüo ngoh. 45#Jos 3.14-17; Hin 32.49.Aope Kahwange teman puyimlan shaomepu jatlan iman kahtok mepu jange tei, iman tüome peiye iman hipak me Joshua phei nyenokke lam woipei, hüyange David hipak ngoiye hatüo ngoh. 46#2 Sam 7.8-16; Tüo 132.1-5.David-e Kahwang sheshao me shüpshe tüowe, Jacob Kahwang jingne nokja wetamlak jingne yuweyah. 47#1 Ahng 6.Hüyangpoi Solomon pahi Ite nok ja wetam.
48“Tüone jeyapoi Ütahpa Kahwang, yakke wepu nokme yengoh; hipawe ipu ke:
49 #
Isa 66.1-2. “ ‘Wangdanga Ü-Ahngpa shotjing,
hüyange kahtoknyu Ü-yalok jing, Youngwanpawe inang.
Nange üte hangkihpu nok wetamlak?
Yejema-a Tao hangkihpu me toloimei lak?
50Hatüolan khongkümpu ü-yakke yeling a?’
51 #
Woi 33.3,5; Jer 9.26; 6.10; Lung 27.14; Isa 63.10. “Numan longetanpalan mongjang yejhotpu hüyange na yenyimpalan! Numan-e jinte Yaha Üjao phei tüi-e yongnang; numan-e numan puyimlankih jonnang. 52Hipalan yo me numan puyimlanne shange yetampu ao ngoh nangki? Iman-e Üjaopa peilak hi-ngao ipalan toi, I lowe tampulan hüyange toipalan sha-a numan mengteki. 53Wangdang shongmokpalanne ipukih numan-e ngaokeng yah, hüyangpoi yejon!”
Stephente Longe Shüp
54Sha-a aope iman-e tüolan jai, iman mongte jak ong, hüyange I phei tüi-e fa teingao. 55Hüyangpoi I me Yaha Üjao maawe, wangyete leiye, Kahwang müktishiwa hüyange Kahwang yakjah yeme Jesu yonge nge. 56Hüyange Iye i, “Hüowü! Wangdang epyange Kahwang yakjah yeme Kahta Üha yongyange taowe ngenang.” 57Hüyangpoi iman-e yeonge üngwünne ngao ngai, na büangyange mong ja ne mengyange I tangte phet. 58Hüyange iman-e chingnyu mepu I shuwe teiye longe Ite shüp. Hüyange naoshe ja min Saul shaome sakilanne iman inkhek tüoh. 59Hüyange iman-e Stephen te longe shüpwante, Iye ngaowe i, “Youngwanpa Jesu, ü-yaha yayah!” 60Hüyange I khuhta hüyange üngwünne i, “Youngwanpa! Hatüo ünu imante tahpha.” Hüyange tüo iyang pheime I shimah.
Currently Selected:
LAMPULAN 7: KONYBSI
Highlight
Share
Copy
Want to have your highlights saved across all your devices? Sign up or sign in
Konyak Naga Bible - ÜJAO LAITEP
Copyright © 2011 by The Bible Society of India
Used by permission. All rights reserved worldwide.
