LAMPULAN 8
8
1 #
Lam 11.19. Hüyange Saul-e I li ne tamlak monge ngoh. Hüyange tüopa nyih me Jerusalem me bumeinok te shange pongpu üyong ngai, hüyange lampulan tokte kaiye, mengpalan üshei Judea hüyange Samaria kahtok me yanne ngoh.
Saul-e Bumeinok Shangne Tam
2Hüyange wanglamte ütinglakpu lanne Stephen mang tümme mu, hüyange I jingne üngwünne mangshap.
3Hüyangpoi Saul-e nokphe te onge, netan hüyange sheko shuiye yüowe küpnok me küowe ange bumeinok mengne tam.
Samaria Me Philip
4Sha-a aoyin yanne tai, yanne taipalanne ükenphe me pungao ümei konnyüowe tai. 5Hüyange Philip Samaria chingnyute laiye Khrista jeng imante nyüotam. 6Aope ükhonge Philip-e nyüopu jai, hüyange Iye lingpu kahnyingwüngha nge, ükhong üyonge yeonge mongphawe jai. 7Hangjingne ünu yaha ngohpalan mepu ünu yahalan maawe ngao üyong ngaowe ngaitai. Hüyange yimtin ngohpalan hüyange faipalan maawe meitam. 8Tüokhei tüopa chingnyu me mongmei üyong ngoh.
9Hüyangpoi tüopa chingnyu me Simon she minpu kahta ja ngoh. Üwangpe Iye yepahipa jonne Samarialan yashanne tam. Iye yoi nying nyingke üyong ja ne she ngaowe ngai; 10hüyange iman üsheiye üjoipa mepu üyongpa ngoiye, I ngao jaiye i, “Üngan üyong she ipu Kahwang üngan kahta-a hatüo ngohnang.” 11Hüyange iman-e I ngao jai, hangjingne hipak laolü-ünge Iye yoi hitoi kaiye iman yashanne tam. 12Hüyangpoi aope Kahwang ahngching jeng Pungao ümei hüyange Jesu Khrista min Philippe konnyüopute iman-e ütinglak, iman netan hei sheko baptitam. 13Hüyange Simone-o ütinglak, hüyange baptiyange Philip phei kem. Hüyange füo hei yashanlak üyong lingpu ngeye, I yashan.
14Sha-a Jerusalem me ngohpu lampulanne aope Samaria lanne Kahwang ngao yahteki she jai, iman-e Peter hei John iman tangte shon. 15Hüyange aope iman ngoi, mengpalanne Yaha Üjao yahlak jingne iman-e iman jingne yop. 16Hangjingne üne-o sha-a ngoiye iman ao te-o Yaha Üjao manpahpe ngoh; iman Youngwanpa Jesu min me hei baptiyange ngoh. 17Hüwante Peter hei John-e yakke imante shüng, hüyange iman-e Yaha Üjao yah.
18Sha-a lampulanne aope yakshüngpu kaiye Yaha Üjao phapu Simon-e nge, Iye Peter hei John nite ngin phawe i, 19“Ao te taowe, ü-yakke shünglakei, Iye Yaha Üjao yah oklak ne, hatüo üngan üte yahkei.”
20Hüyangpoi Peterwe Ite i, “Nang ngin nangphei mahtüoh, hangjingne, Kahwang hünghao nginne tüolak she nange teih! 21#Tüo 78.37.Hatüo toime nangjingne meitam yejema-a tampu hango yenang, hangjingne nang mongjang Kahwang shaome shupu yeje. 22Tüokhei nang ünu hatüo mepu mong lüptüoh, hüyange nang mongme teihpu win oklak heiya yewin oklakei she Youngwanpa te yoptüoh. 23#Isa 58.6.Hangjingne nang soihüng ükhah me hüyange ünuwe shapu me ngohnang she taowe ngenangki.”
24Hüyange Simon-e janne i, “Nange ngaopu ngao jawe nehoi üte yengaitamlak jingne, Youngwanpa te nange üjing ne yoppha.”
25Tüokhei iman-e saki phawe Youngwanpa ngao ngaoyang phei me, iman Jerusalem te leihye, hüyange Samaria ching maapu me pungao ümei konnyüo.
Philip Hüyange Ethiopia Moiko
26Hüyange wangdang shongmokpa jawe Philipte ngaowe i, “Yayong tüoh, hüyange heye me, hanghepa lam Jerusalem mepu Gaza ngoiye lainang, tüote taitüoh.” Tüopa-a wanwüng jengme ngohnang. 27Hüyange I yayonge tai, hüyange leihu, Ethiopialan moiko kahta ja ngoh. Ethiopia ahngyha Kandase moth üshei tangme I nokpu ne menge, I wong üyong pheipu kahta ja ne ngoh. I yoplak jingne Jerusalem ngoiye ong. 28Hüyange I leih yewante tongtoi me shotyange, Isaia hipa lai iye ngoh. 29Hüwante Yaha Üjaowe Philipte i, “Owe wentüoh, hüyange I tongtoi me nang ongtüoh.” 30Hüyange I tangte Philip phette wenne, Isaia hipa laitep Iye iye jaiye i, “Nange ipu shinge okya?”
31Hüyange Iye jan, “Ütamme üte yenyüoma-a taowe hangke iye shinglak? Hüyange Iye Philipte onge I phei jamme shotlak jingne tong. 32#Isa 53.7-8.Sha-a Iye iye ngohpu lai hatüone ngoh:
“Toilak nyee ja kih I woiye tei,
Hüyange nyeehawe I min khüppu shaome ngao yengaipu ke, hatüoke Iye yoi ju ye-ep.
33I wüotüone tamme Ite ngao shuwe yephün.
I jing huhayimlan jeng-a aowe-o ipu ye-oklak?
Hangjingne I üyin kahtoknyu mepu yahteiteki.”
34Hüyange moiko kahtawe Philipte janne i, “Taowe nangte tongnang, hipa ao jeng hatüowa ipu shi? Iye yoi jeng ipu heiya, yejema-a ülao ja jeng ipu shi?”
35Hüyange Philippe yoi ju ep hüyange hatüo lai mepu wange ngaowe Ite Jesu jeng konnyüo. 36Hüyange iman lamme kemwante yeng ngohjing ngoi, hüyange moikowe i, “Leihu tüome yeng ngohnangki. Tao baptilak jingne büangpu ütam ngohlak a?” 37(Philip-e Ite i, “Nang mongjang üsheiye nang üting lakma-a, nang baptine oklak.” Iye jan; “Tao ütinglak nangki.” Jesu Khrista-a Kahwang Üha she taowe üting laknangki.) 38Hüyange moikowe tongtoi lakne tam. Tüophei me Philip hüyange moiko imni moini yeng yete yu hüyange Philip-e Ite baptiye tam; 39Hüyange aope iman-e yeng mepu ngai, Youngwanpa Yahawe Philip woitei, hüyange moikowe shaaji I ye-nge; hüyangpoi I yoi lamyete mongmei me tai. 40Hüyangpoi Philip Azotus me nge hüyange linne taiwante, Kaisarea manngoi manngoi chingnyu üshei me Iye pungao ümei konnyüo.
Currently Selected:
LAMPULAN 8: KONYBSI
Highlight
Share
Copy
Want to have your highlights saved across all your devices? Sign up or sign in
Konyak Naga Bible - ÜJAO LAITEP
Copyright © 2011 by The Bible Society of India
Used by permission. All rights reserved worldwide.
