LAMPULAN 9
9
Saul Monglüppu
(Lam 22.6-16; 26.12-18)
1 #
Lam 22.4-16; 26.9-18. Sha-a Saul, yelakpe Youngwanpa pinlan tangte taiye ümeng jonlak hüyange toilak jingne, Ütahpa Ngengpa tangte tongne tai, 2hüyange Damascus synagogue mepu lanphei hüoyange mengpalan lamme ngohpu ütam ngema-a netan hei sheko moini shayange Jerusalemte yelak jingne o-ngao nyanpu yuwe yah.
3I yayonge taiwante Damascus chingnyu pephang ngoi, hüyange mokhshe wangdang mepu wangngai ja I neikonne tee. 4Hüwante I kahtokte yeita, hüyange ngaowüng jawe Ite ngaowe i, “Saul, Saul! Hangne nange üte shaoshine tampu shi?” 5Hüyange Iye i, “Nang ao shi, Youngwanpa?” Hüyange Iye jan, “Nange shaoshine tampu Jesu Tao; 6hüyangpoi lüotüoh, hüyange chingnyute ongtüoh, hüyange nange hanghe linglak wongpong hatüo nangte iphalak.” 7Hüyange Iphei taipu kahtalanne ao-o ye-ngepe, ngao shaha jaiye, ngao yengao okpe yong. 8Hüyange Saul kahtok mepu yayong, hüyange aope I mük wem Iye hango ye-nge; tüokhei iman-e yakke I shuyange Damascus te woi in. 9Hüyange I nyih lüm, hango ye-ngepe ngoh, hüyange hah-o yehah ying-o yeying.
10Sha-a Damascus me Ananias she minpu pin ja ngoh. Ite Youngwanpawe himang me i, “Ananias!” Hüyange Iye i, “Youngwanpa, tao tüome ngohnang.” 11Hüyange Youngwanpawe Ite i, “Yayongtüoh, hüyange Tingkhak she nyikpu lamnyute taitüoh, hüyange Judas nokme Saul she minyange Tarsaslan ja tongtüoh; hangjingne leiyah, Iye yopnang; 12hüyange Iye Ananias she nyikpu kahta ja I ngeyetamlak jingne peiye I yakke Ite shinge ngeteki.” 13Hüyangpoi Ananias janne i, “Youngwanpa, kahta maapu mepu tüopa kahta jeng Jerusalem me nangjing üjaolan te Iye yeonge yemeipe hangke jon, taowe jaiyangki, 14hüyange tüome nang min me nyikpu üshei phoshalak jingne ngengpa üjenglan mepu yahpu wong Ime ngohnang.”
15Hüyangpoi Youngwanpawe Ite i, “Nang taitüoh, hangjingne yinhulan, ahngpalan, hüyange Israel hayimlan tangte ü-min kilak, I ü-jingne leyangpu wan ngohnang; 16hangjingne ü-min jingne I hangshin me hangke shange ponglak, Taowe Ite hüolak.”
17Hüyange Ananias yayonge taiye nokte ong, hüyange Ite yakke shüngyange i, “Jeiheinao Saul, nang peipu lamme nang tangte ngaipu Youngwanpa Jesuwe, nang ngeye tamlak hüyange Yaha Üjaowe maatamlak jingne tao shon.” 18Hüyange hüwante muh I mükmepu nyahla kihpu yei, hüyange Iye ngepu ok, hüyange I yonge taiye bapti; 19hüyange hahying ütam hahyang phei me I me wongpei.
Damascus Me Saul Konnyüopu
Hüyange I Damascus me pinlan phei nyih ütenja ngoh. 20Hüyange hüwante muh synagoguelan me, “Jesuwa Kahwang Üha she Iye üngwünne tam.” 21Hüyange Ite jaipalan üsheiye yashanne i, “Hatüo minme nyikpalante Jerusalem me shangne tampu I ne yeje a? Hüyange Iye Ütahpa Ngengpa tangte iman shayange yahyelak she iyange tüome peiyangki!” 22Hüyangpoi Saul, wong ünyei tüowe ngai, hüyange Jesuwa Messiah she Iye saki phapu jamloi ngao, tüokaiye Damascus me ngohpu Jehudilanne I ngao te yejan ok.
Jehudilan Mepu Saul Taipu Ok
23Nyih nangjange taiphei me, Jehudilan jem, hüyange I toilak kon yam. 24#2 Kor 11.32-33.Hüyangpoi iman kon Saul-e shinge pei. Hüyange I toilak jingne iman-e nyihning hüyange yaning petenlan yomme ngoh. 25Hüyangpoi I pinlanne yaning I woiteiye chingtukpenyu kaiye muhto ja me I nowe kaitam.
Saul Jerusalem Me
26Aope I Jerusalem te pei, Iye pinlan phei omlak jingne ngang; hüyange I-o pinja she üting yelak okpe, iman üsheiye Ite nyam. 27Hüyangpoi Barnabaswe lampulan tangte I woipei, hüyange hangke lamme Iye Youngwanpa nge, hüyange Iye I phei ngao, hüyange hangke Damascus me Jesu min me wongnange konnyüo, hatüo imante jaine tam. 28Tüokhei Youngwanpa min me wong nange konnyüowe, I Jerusalem me onge peiye iman phei ngoh. 29Hüyange Iye Greek ngaopu Jehudilan phei ngaowe mop, hüyangpoi iman-e I toilak yamme ngoh. 30Hüyange aope jeiheinaolanne tüopa shing, iman-e I Kaisareate woilai, hüyange Tarsaste shon.
31Tüokhei Judea, Galilee hüyange Samaria üshei me bumeinok jaalunne chingmei me ngoh, hüyange Youngwanpa nyamlepu hüyange Yaha Üjao toloimei tampume kemme jaalun.
Aeneas Meitampu
32Sha-a Peter kenphe me kemwante, Lidda me üjaolan tangte-o pei. 33Hüyange tüome Iye Aeneas she minpu lengme wangpeng tet yimtinne dakpu kahta ja nge. 34Hüyange Peterwe Ite i, “Aeneas, Jesu Khristawe nang meitam nang! Lüotüoh hüyange nang leng tümyah.” Hüyange hüwante muh I lüo. 35Hüyange Lidda me hüyange Sharon me ngohpu üsheiye I ngeye Youngwanpa tangte monglüp.
Lidda Hei Joppa Me Peter
36Sha-a Joppa me Tabitha she minpu ütinglakpu sheko ja ngoh. Greek me yha minna Dorcas, leppu-tokpongha. Yhawe yoi hipak khongkümpu toimei lingpu me hüyange toihalante paotükpu me winne ngoh. 37Tüopa nyih hei hipak me hatüo ngai, yha dak-e li, liphei me iman-e yha yengyaowe tümyange, ütangpa tüp me ang. 38Hüyange Joppa ü-o me Lidda ngohpu jingne, pinlanne Peter tüome ngohpu jaiye, I tangte kahta ni shonne tonge i, “Toman tangte yeshonpe ongkei.”
39Tüokhei Peter yayong hüyange iman phei tai; Hüyange aope I ngoi, iman-e I ütangpa tüp te woi in. I neikonne wamnyulan üshei yongyange shap; hüyange Dorcas üyin me iman phei ngohwante yhawe shüngpu phakshaoh hei nyemo Peterte hüo. 40Hüyangpoi Peterwe iman üshei tüp mepu taine tam hüyange yatuhshing yange yop. Hüyange mang yekaote lüpyange i, “Tabitha, lüotüoh!” Hüwante yhawe mükwem, hüyange aope yhawe Peter nge, yha lüowe shot. 41Hüyange Iye yha yakme jonyange lüo yongne tam, hüyange üjaolan hüyange wamnyulan nyik-e, Iye yha üyin pha. 42Hüyange hatüo Joppa üshei me shinge pei, hüyange maawe Youngwanpa te ütinglak. 43Hüyange Joppa me meisho lingpa Simon she minpu kahta ja phei Peter hipak laowe nyoi.
Currently Selected:
LAMPULAN 9: KONYBSI
Highlight
Share
Copy
Want to have your highlights saved across all your devices? Sign up or sign in
Konyak Naga Bible - ÜJAO LAITEP
Copyright © 2011 by The Bible Society of India
Used by permission. All rights reserved worldwide.
