WOITEI 12
12
Yinyepu Mo
1Youngwanpawe Mosa hei Aaron nite Egypt kahtok me i: 2“Numan jingne tüopa leat-a ükong wangpu leat ne menglak; numan jingne tüopa-a wangpeng me üwangpa leat ne menglak. 3Israel ükhong khongkümpu te numan-e tüopa nyüoweleipu phatüoh. Tüopa leat nyih pen shepupa nyih me kahta lili-e yoi yoi noksa jingne nyeeha yejema-a younha japong letüoh. 4Sheakpu yinmok üpüm me nowe yehah oklakne inok noksa jamloi shoima-a, hüma-a I hüyange inok yupipalan jamyange shejawe hah oklak shinne meitam tamyange kahta ityange hahne oklak. 5Numan-e tüopa-a nyee ja yejema-a youn ja yahne ok; hüpoi tüopa-a üko üshang yenangpu wangja ngoitephei üpong ne menglak wongpong. 6Tüophei me, tüopa leat tepu nyih pen me peli shepupa nyih ünpong me, Israel ükhong khongkümpuwe yinmoklan-a toilak. 7Hüyange kahta lan-e iy ütam yahlak yang, hüyange nok hangshin me tüolan mei hahlak ne ngoh, tüolan nok tashüp moini me hüyange shangtang ye me iy phowe tamlak yang. 8Mei-a tüoya muh ngüwlak, hüyange ükhah hoilai phei hüyange do yenyütpu an phei hahlak yang. 9Tüolan yo mepu ühüng me yejema-a yang yange tah hah; hüpoi üshang hei üya üyak hüyange titoi mongjang hei üyei ütang khongkümpu omme ngüw yange hahtüoh. 10Hüyange numan-e napning ngoiye hatüo hango towe ye-anglak yang; napning ngoiye ülam ja nehoi toma-a, tüopa-a numan-e vün me jakke tamlakyang. 11Numan-e hatüowa mamme hahlak yang, hangjingne numan ya me yashom, hüyange numan yak me wongjoi tümlak ngohnang. Hatüowa Linne taipu Mo Youngwanpa üte yihnoonne mopu ngohnang. 12Hangjingne, tüoya-a Tao Egypt kahtok linne tailak, hüyange Egypt kahtok me üwangpa ne puhpu halom hüyange üwangne puhpu yinmok khongküm Taowe toilak; hüyange Egypt kahwanglan üsheite Taowe ngaophün phalak. Tao Youngwanpa ngohnang. 13#Heb 11.28.Hanghepa nok tashüp me iy ngohlakei, tüolan nok me numan ngohnang she yepinlakpa hüopu ngohlak. Aope Taowe iy ngelakei, hüyange aope Taowe Egypt lante shangne tamlakei hüwante shangne yetampe Taowe numan linne tailak.
14“Tüopa nyih numan jingne teihtüopu nyih ja ne ngohlak, hüyange numan-e Youngwanpate mowe tampu mo ja ne anglak; hüyange jin tokte jin ngaokenge jintepu jingne tüopa-a mo ja she numan-e nyoilak yang. 15Nyih nyit mongme numan-e do phei nyütpu an hango yehahlak yang, do yenyütpu an hei hahlak yang. Üwangpa nyih me numan noksalan me ngohpu do khongkümpu yahteilak yang; hangjingne tüolan nyih nyit mongme numan yo mepu ütamme do phei nyütte lingpu an hahma- a, I-a shaaji ü-kahtalan yo me ja she ye-ilak, lange winlak. 16Üwangpa nyih me hüyange üne-o nyit shepupa nyih me yoppe khümlak jingne numan jemlak. Tüolan nyih hipak me numan-e toi yelinglak, hüpoi numan-e hahyingpa-a tümta ne ok. 17Tüopa mo yelakpe ngoh tüoh, hangjingne tüopa nyih me Taowe numan nokphong Egypt mepu yah ngai yangki. Ngoikülak hipak jin jinte numan-e tüopa nyih-a mo pu nyih ne ngohlak yang. 18Üwangpa lekeng tepu nyih pen me peli ünpong mepu da me ja shepupa nyih ünpong te ngoiye, numan-e do phei nyütte lingpu an hango yehahlak yang. 19Nyih nyit mongme numan nok me do nge ne yetamlak yang; hangjingne aowe do nyütpu hahlakei, tüopa kahta-a, yinpa jeyah puhu jeyah, Israel ükhong mepu lange winlak. 20Do nyütpu hanghe-o numan-e yehahlak; numan nyoijing üshei me numan-e do yenyütpu hahlak.”
21Hüwante Mosawe Israel lwngmeilan khongkümpu te nyik hüyange imante i, “Numan noksalan phei shuwe nyee üha leyange linne taipu yahlak jingne nyeeha toitüoh. 22Numan-e phemkhah ütüp ja yahpuwe sheng me ngohpu iy te hüngtüoh, hüyange sheng me ngohpu iy-ye tashüp hei taten ütangye moini te phowe tamtüoh, hüyange numan aowe-o napning te ngoishe yoi nok tafün shong kaiye yeyulak. 23Hangjingne Egyptlan toilak Youngwanpa linne tailak; hüyange aope yoi taten hei tashüp moini yekao me iy nge lakei, Youngwanpawe tafün-a kaiye linlak, hüyange mahtampupa shongmokpawe numan nokte onge numan toine lye yetamlak. 24Numan hüyange numan hayimlan-e hatüowa shupu ngaokeng she jin jintepu jingne numan-e jonlak yang. 25Hüyange Youngwanpawe janpu kih-e lye numante phapu kahtok te aope numan peilakeih, numan-e tüopa toi linglak yang. 26Hüyange aope numan hayimlan-e ‘Tüopa toishaowa hanghe te leppu?’ she tonglakei, 27numan-e ilak, ‘Hatüowa Youngwanpate yihnoonpu linne taipu dopu ngohnang; hüyange lye Egyptlan toiwante, teman Israel noksalan-a yinne tüohyange linne taiyangki.’ ” Hüwante Israellan-e yatuh shüng hüyange yoppe khüm.
28Tüophei me Israel hayimlan taiye hüke Youngwanpawe Mosa hei Aaron nite ngaowe tampu kih-e iman-e ling.
Shaonahpu Pen: Üwangne Puhpu Lipu
29Phawo me Egypt kahtok me, ahngpa shotjing me shotpu ahngpa üwangpa halom mepu kahmong küpnok me phowe angpupa üwangpa ha ngoiye, hüyange tampu yinmoklan üwangne puhpu ühalan khongküm Youngwanpawe toi. 30Tüoya, ahngpa hei I shaoshanpalan hüyange Egypt kahtalan khongkümpu shinyang. Hüyange Egypt kahtok nopu me üngwünne shappu ngoh yangki; hangjingne ima-a noksa ja me nehoi kahta ja nehoi yelipu yenangpe ngoh yangki. 31Tüoya muh ahngpawe Mosa hei Aaron nite nyikne shon hüyange i, “Nang hüyange numan Israellan taitüoh! Ü-kahmük mepu yayongtüoh; nange tongpu kih-e taitüoh, hüyange Youngwanpate yoppe khümtüoh. 32Nange ipu kih-e numan jing nyee ükhong hei youn, hüyange mahu ükhong woiyange yayong tüoh. Hüyange üte moimanlak jingne yoppha!”
Sheihtaipu: Rameses Mepu Succoth
33Egyptlan-e Israel lante kahmük mepu mamshe yayonge tailak jingne imante kang; hangjingne iman-e i, “Numan yayeyong ma-a toman khongkümpu likülak yang.”
34Tüokhei kahtalan-e do yenyütpu an nyüt yahyange hüyange an kang sheng iman inkhek me peiyange phaktang me pai. 35Mosawe imante iyangpu kih-e Israel hayimlan-e ling; hüyange Egyptlante khüm hei hon yük hüyange inkheklan yu; 36hüyange Youngwanpawe kahtalan te shüpshe hüowe tamlak jingne Egyptlan te linge tam, hüyange iman-e hanghe yu pha ne tam. Hükih-e linge Egyptlan mepu moth Israel lanne kiye tai.
37Israellan Rameses mepu Succoth ngoilak ya me yayong. Iman sheko hei nahalan ye-ompe netanlan haja gho wok nanjing ngoh yangki. 38Hüyange üne-o iman phei ülao kahtalan-o ükhong üyong, nyee ükhong hei youn ükhong, hüyange tampu yinmok maawe omme tai. 39Hüyange Egypt mepu iman-e an nyüt yah-e peipu do yenyütpu an nyüt kange ngüw, hangjingne iman-e hahying tümlak yejema-a an nyütyange tümtawe tailak ne iman-e hipak yetüope Egypt kahtok mepu iman mokh she jange teiyangki. 40#Lam 7.6.Israel hayim Egypt me ngohpu hipak-a wangpeng gho peli phei me delüm ngoh yangki. 41Hüyange wangpeng gho peli phei me delüm üküm ngoipu nyih khak shuwe tüonyih-a Youngwanpa nokphong kahtalan khongküm Egypt kahtok mepu yayonge tai. 42Tüopa-a iman Egypt kahtok mepu iman woiteilak jingne Youngwanpawe yomme ngohpu yaning ja ne ngoh yangki; tüokhei Israel kahtalan jin khongkümpu me tüopa yaninga Youngwanpate yompu yaningne angnang.
Linne Tailak Ngaokhümlan
43Youngwanpawe Mosa hei Aaron nite i, “Linne tailak me linglak ngaokhüm lanna tüolan ngoh nang: Yinhulan aowe-o linne taipu hahyinga yehahlak; 44hüpoi numan-e shakke angpu rha ütam, numan-e üwangne shokhüp yangpu ne mengma-a hahpu oklak. 45Chingtaipa hüyange nanpalan-e tüopa mepu yehahlak. 46#Lung 9.12; Jn 19.36.Ümpehepa nok me tüopa yange tüm, tüopa nokme hahying khongkümpu hahlak wongpong; tüopa-a nokshaote yüone yetamlak. Hüyange yinmoklan üwaan ja nehoi yepailak. 47Israel ükhong khongkümpuwe tüopa mo-a jonlak wongpong. 48Hüpoi sho yekhüppu kahtawe tüopa-a yehahlak, numan yo me yinpa kahta ütam nyoi ngohpu ne mengma-a hüyange Youngwanpa te yihnoonpu hüowe linne taipu mo ngoh huma-a, numan-e üwangne inok noksa netanlan khongkümpu shokhüppe tamlak yang. Tüophei me I-a Israel chingshao ja me puhpu kih-e jonpailak hüyange mo te omne tampu oklak. 49#Lev 24.22; Lung 9.14; 15.15,16,29.Chingpuhu jingne hüyange numan yo me omme ngohpu yinhulan jingne linglak ngaokhüm-a ja kih hei ngohlak.”
50Hüke Israellan khongkümpuwe ngao jai hüyange Youngwanpawe Mosa hei Aaron nite ipu kih-e iman-e ling. 51Hüyange tüonyih muh Israel nokphonglan Egypt mepu Youngwanpawe ükhong ükhong woi ngai yangki.
Currently Selected:
WOITEI 12: KONYBSI
Highlight
Share
Copy
Want to have your highlights saved across all your devices? Sign up or sign in
Konyak Naga Bible - ÜJAO LAITEP
Copyright © 2011 by The Bible Society of India
Used by permission. All rights reserved worldwide.
