WOITEI 11
11
Shaonahpu Ükümpa Deingao
1Hüwante Youngwanpawe Mosa te i, “Taowe shaaji Egypt ahngpa hüyange I kahtalan tangme shangne tampu ja me hei shonlak. Tüophei me lye numan taine tamlak. Nyongküleih pahi, lye numan khongkümpu tüopa mepu jange tei phalak. 2Sha-a Israel kahtalan khongkümpu te ngaotüoh, hüyange netan hei sheko moilanne yoi yupilante iman me ngohpu hon hei khüm juyük yutüoh she itüoh.” 3Egyptlan-e Israel lante wangshüm hüolak ne Youngwanpawe linge tam. Ütingpa me, Egypt kahtok-e hüyange ahngpa shaoshanpalan hei kahtalan khongkümpuwe Mosa-a kahta üyong ja ne yihnoonpu ngoh yangki.
4Tüokhei Mosawe i, “Youngwanpawe hüke inang; phawo nanjing me Tao Egypt linne tailak; 5hüyange Egypt kahtok me üwangne puhpu halompa khongkümpu, ahngpa shotjing me shotpu ahngnok üwangpa ha mepu, rhanyu mepu üwangpa ha ngoiye; hüyange üne-o tampu yinmok üwangne puhpu khongkümpu lilak. 6Hüyange Egypt kahtok üshei ye me yeonge üngwünne shappu ngohlak, hüyange hükihpu leye aope-o manjai hüyange phei me-o yejailak. 7Hüpoi Israel lante yejema-a iman jing yinmoklan te kuiha jawe nehoi yehüolak. Hüwante Tao, Youngwanpawe Egyptlan hei Israellan ni pa me yoi yoi ne linge tamnang she, numan-e shinglak. 8Tüophei me hükih-e ngao küm iye Mosawe ngaowe tüoh ‘Nang shaoshanpalan khongkümpu ü-tangte peikülak, hüyange ü-sheshao me ümme khümlak, hüyange ü-kahtalan khongkümpu woiyange taitepha she iman-e üte yoppe tonglak.’ Tüophei me, tao yayonglak.” Tüophei me yeonge mongshih ngaiyange ahngpa mepu Mosa yayonge tai.
9Hüwante Youngwanpawe Mosa te i, “Egypt kahtok me ü-kahnyingwüngha ünyei ngaitamlak jingne, ahngpawe nangte yelakpe muh yejai phalak.”
10Mosa hei Aaron niye tüolan shao-nahpu khongkümpu ahngpa sheshao me ling; hüpoi Youngwanpawe ahngpa mongjang wanne tam, hüyange Iye Israel hayim yoi kahtok mepu taine yetam.
Currently Selected:
WOITEI 11: KONYBSI
Highlight
Share
Copy
Want to have your highlights saved across all your devices? Sign up or sign in
Konyak Naga Bible - ÜJAO LAITEP
Copyright © 2011 by The Bible Society of India
Used by permission. All rights reserved worldwide.
