WOITEI 10
10
Shaonahpu Tet: Nyaodukh
1Hüwante Youngwanpawe Mosa te i, “Taitüoh hüyange ahngpa phei hüotüoh. Hangjingne iman yo me tüolan shaonahpu hüolak jingne Taowe I mongjang, hüyange I shaoshanpalan mongjang wanne tamyangki; 2hüyange Taowe Egypt tangme hanghe toi ling, hüyange hanghepa kahnyingwüngha iman yo me Taowe ling, tüopa nange nangha hüyange nanghulan nasa me ngaolak jingne, hüyange numan khongkümpuwe taowa Youngwanpa she shinglak jingne Taowe Egyptlan üngapa ne linge tamnang.”
3Tüokhei Mosa hei Aaron ni ahngpa tangte ngoiye Ite i, “Hebrew Kahwang, Youngwanpawe hüke inang, Ü-sheshao me nange hangshin me nang nying nyingke wanne ngohlak shi? Üte yoppe khümlak jingne ü-kahtalan taine tamtüoh. 4Hangjingne nange ü-kahtalan taine yetam ma-a, leihuyah, ngainyih Taowe nang kahmük te nyaodukh peine tamlak. 5Hüyange aowe-o kahtok üshe yeshinglakne, iman-e kahtok phünge mahlak; hüyange yilong mepu yinne numan jingne towe ngohpuwa iman-e hahkümlak, hüyange phao me numan jingne towe ngohpu pee khongkümpu hahlak. 6Hüyange iman-e ahngnok, hüyange nang shaoshanpalan nok khongkümpu hüyange Egyptlan nok khongkümpu maalak; hüyange nangpa yejema-a nangpuyiman kahtok me ngoh phei me tenyih ngoipu mongme hüke jeman ngepu ngelak.” Tüophei me I lüp hüyange ahngpa mepu yanne tai.
7Ahngpa shaoshanpalan-e Ite i, “Tüopa kahtawe temante hangshin me shaoshi ne tamlak? Iman Kahwang, Youngwanpa te yoppe khümlak jingne Israel kahtalan min taiyah. Egypt khaiye menge mahteki she nange teih yetüo a?”
8Tüokhei nishe Mosa hei Aaron ni ahngpa tangte yah ye, hüyange lye imante i, “Numan taine ok hüyange numan Kahwang Youngwanpa te yoppe khümtüoh. Hüpoi ütingpa me aoyin tailak?”
9Mosawe janne i, “Toman khongküm hüke hayimlan hei lwngmeilan hüyange toman hala yhalalan phei, toman nyee ükhong hei younlan hüyange mahu ükhong phei toman tailak; hangjingne Youngwanpa te yihnoonpu mo ja toman-e ngohlak.”
10Ahngpawe imante i, “Youngwanpa min me taowe jienge inang hüke, numan-e numan jing shekolan hei nahalan yahyange taine taowe yetamlak! Numan-e ümeng ngaitamlak jingne ütingpa me kon kon nang. 11Hüke yeje! Sha-a numan netanlan shaha taitüoh hüyange Youngwanpa te yoppe khümtüoh, hangjingne hatüo hei numan-e yah hupu ngoh nang.” Tüolan ngao phei ahngpa sheshao mepu Mosa hei Aaron ni jange tei.
12Hüwante Youngwanpawe Mosa te i, “Egypt kahtok te nyaodukh peiye, kahmük me ngohpu phümha weangyong khongkümpu hüyange yilonge towe tüohpulan hahtamlak jingne Egypt tang me nang yak notüoh.” 13Tüokhei Mosawe yoi wongjoi Egypt kahtok tangme nowante, tüonyih hüyange tüoya phapan heong yekao mepu wangyang kahmük tangme peine tam; hüyange shom ngoiwante heong wangyange nyaodukh puwe peine tamyange ngoh. 14Hüyange nyaodukh-a Egypt kahtok üshei yete onge Egypt kahtok neikonpu üshei me pah; iman yeongpu ükhong üyongne ngoh, tüolan nyaodukh kih-e üshong wante aope-o jeman pei hüyange phei me-o yepeilak. 15Hangjingne iman-e kahtok nopute pahpuwe kahmük-a wangnyak ne menge tam; hüyange kahmük me phümha weangyong hüyange yilonge towe tüohpu pee mepu pelicklan khongkümpu iman-e hah; hüyange Egypt kahtok üshei yeme, phaome phümha weangyong, pee jeyah, deiha liha jeyah, ümük üha ja nehoi towe yetüoh.
16Hüwante ahngpawe yeonge heh-e Mosa hei Aaron ni nyik-e i, “Youngwanpa numan Kahwang hüyange numan kaiye taowe ünu omyangki. 17Tüokhei sha-a, ü-ünu tenyih hei winpha she taowe nang nite yoppe tongnang, hüyange Youngwanpa numan Kahwang te ü-mepu tüopa lipupa hei yah teilak yoppe tongpha.” 18Tüokhei Mosawe ahngpa tüohyange ngaiye tai hüyange Youngwanpate yoppe tong. 19Hüyange Youngwanpawe heong wangyanga yeonge wongnangpu henyip wangyang ne lüppe tam, hanghe kaiye nyaodukh lanna moijem me iman Ütak Yengching te jange tei; hüyange Egypt kahtok üshei ye me nyaodukh ja nehoi yetüoh. 20Hüpoi Youngwanpawe ahngpa mongjang wanne tam, hüyange lye Israel hayim yetaitam.
Shaonahpu Tu: Wangnyak
21Hüwante Youngwanpawe Mosa te i, “Egypt kahtok tangme wangnyak peiye wangnyak me pomme ngohne tamlak jingne nange nang yak wangyete hong tüoh.” 22Tüokhei Mosawe yoi yak wangyete hong; hüwante nyih lüm Egypt kahtok khongkümpu me wangnyak üyong ngoh. 23Hüyange Egyptlanne jawe ja tei ye-ngepe mah; hüyange nyih lüm mongme aowe-o yoi ngohpu nyoi mepu yeyan ok. Hüpoi Israel hayimlan iman ngohjing nyoi üshei me wangngai me ngoh.
24Hüwante ahngpawe Mosa te nyik hüyange i, “Numan tai ne ok hüyange Youngwanpa te yoppe khümne ok; numan phei jamme numan jing shekolan hei nahalan-o taine ok. Hüpoi numan jing nyee, youn, hüyange mahulanpa-a tüome ange tüo tüoh.”
25Hüpoi Mosawe janne i, “Hüma-a Youngwanpa toman Kahwang te toidolak hüyange jakke dolak jingne tomante yinmoklan-a nange phalak wongpong. 26Hüke yejelak, toman-e yinmoklan-a toman phei yah tailak; yashok ja nehoi yetüohlak, toman Kahwang Youngwanpa te hangkihpu hüyange hanghepa yinmok-e yoppe khümlak hatüowa toman-e lelak. Hüyange tüoken nyoi te toman manngoi manngoi hangkihpu yinmok-e Ite toidolak toman-e yeshinglak.”
27Hüpoi Youngwanpawe ahngpa mongjang wanne tam, hüyange lye iman yetei tam. 28Hüwante lye Mosa te i, “Ü sheshao mepu taitepha! Nang shaaji üte nishe ngene tah tam pha! Taowe nang sheta ngene tampu nyih me nang lilak!”
29Mosawe janne i, “Nange ipu shunang. Nange shaaji ni she tao ye-ngelak.”
Currently Selected:
WOITEI 10: KONYBSI
Highlight
Share
Copy
Want to have your highlights saved across all your devices? Sign up or sign in
Konyak Naga Bible - ÜJAO LAITEP
Copyright © 2011 by The Bible Society of India
Used by permission. All rights reserved worldwide.
