WOITEI 9
9
Shaonahpu Nga: Yinmok Leam
1Hüwante Youngwanpawe Mosa te i, “Ahngpa tangte taitüoh, hüyange Ite itüoh, ‘Hüke Hebrewlan Kahwang Youngwanpawe inang, “Üte yoppe khümlak jingne ü-kahtalan taine tamtüoh. 2Nange iman taine yetampe iman üne-o tükke angma-a, 3leihuyah, kahjee me nange tampu yinmoklan, koiponglan, gado hei udh, mahu ükhong hüyange nyee ükhong tangme dak yeonge yemeipu ja ngaine tam-e Youngwanpa yak hünglak. 4Hüyange Israel lan-e tampu yinmok hei Egyptlan-e tampu yinmok nipa me Youngwanpawe tampu ngaitamlak; hüyange Israellan jing yinmoklan-a hango yelilak.” ’” 5Tao, Youngwanpawe tüopa linglak jingne hipak-a “Ngainyih she itnang.”
6Üne nyih lye ngaoyangpu kih-e Youngwanpawe ling, hüyange Egyptlan-e tampu yinmok khongkümpu li; hüpoi Israellan jing tampu yinmok ja nehoi yeli. 7Hüyange ahngpawe hanghe ngaiyangki shinglak jingne shonne tei, hüpoi Israellan jing yinmok ja nehoi yeli she ngaowe tam. Hüyangpoi I üngeine meng hüyange kahtalan taine yetam.
Shaonahpu Wok: Tüm
8Hüwante Youngwanpawe Mosa hei Aaron nite i, “Jaklong vünjüo mepu tüpla yakpoih ja yayah; hüyange ahngpa sheshao me Mosawe tüolan-a wangte phutüoh. 9Tüolan-a Egypt kahtok nopute kahmak ükhoih ne menge yanlak, hüyange üken phe me tüolanne tüm ne ngaiye tamlak tüopawe kahta hei yinmoklan khongkümpute maa ne ngailak.” 10Tüokhei iman-e vünla ütam yahyange ahngpa sheshao me yong; hüyange Mosawe hatüo wangyete phutam, hüyange tüopawe kahta hüyange yinmok lante tüm ne ngaiye maa ne meng. 11Mosa sheshao me yepahipalan peiye yongpu ye-ok, hangjingne ima-a ülao Egyptlan khong kümpute ngaipu kih-e imante-o tüm ngaiye maa. 12Hüpoi Youngwanpawe ahngpa üngei ne linge tam, hüyange Youngwanpawe ipu meimei kih-e, ahngpawe Mosa hei Aaron ni ngao te yejai.
Shaonahpu Nyit: Yilong
13Hüwante Youngwanpawe Mosa te i, “Ngainyih shomme ahngpa phei hüotüoh, hüyange Ite itüoh, ‘Hüke Hebrewlan Kahwang Youngwanpawe inang, “Iman-e üte yoppe khümlak jingne ü-kahtalan taine tamtüoh. 14Shaapa-a Taowe nang jing shaoshanpalan hei nang kahtalan shahate shaoshi ne yetamlak, hüpoi Taowe nango omme shaoshi ne tamlak, hümme nakshih nange kahtoknyu nopu me ü-kihpu ao-o yenang she shinglak. 15Taowe nang hüyange nang kahtalan tangme daktin ngaine tamlak ne ü-yak hongshih ma-a, nanga kahtok mepu jaoshe-e mahteiye ngoh hahshepu! 16#Rom 9.17.Hüpoi nangte ü-wong hüolak hüyange ü-min kahtoknyu üshei yeme ponge tamlak jingne müktakpe angyange taowe nang üyin me angyangki. 17Tüoyangpoi sha-ate ngoiye nange iman teine mintam she ü-kahtalan phei tüi-e nang nying nyingke nang yongelüo nang. 18Leihuyah, ngainyih hakih tingme, Egypt ngaipu nyih me wange sha-ate ngoipu mongme aope-o manyütpu yilong yeonge wongnange Taowe yütne tamlak. 19Tüokhei sha-a, nange tampu yinmok ükhong hüyange phao ye me ngohpu khongkümpu ai jem ne shontüoh; hangjingne phao me ngohpu kahta hüyange yinmok lili, nokte aiye yejempulan tangme yilong yeilak hüyange iman khongküm lilak.” ’ ” 20Hüwante ahngpa shaoshanpalan yo me ütamme Youngwanpate nyamme teih, hüyange rhapalan hüyange yoi tampu yinmoklan nok me küone tam. 21Tüoyangpoi ülaolan aoyinne Youngwanpawe deingao phapu te mong yepha iman-e imanjing rhapalan hei yinmoklan üko me tüoh.
22Hüyange Youngwanpa Mosa te i, “Egypt kahtok khongküm me, kahta hüyange yinmoklan tang me hüyange Egypt kahtok üshei yeme phümha weangyong khongkümpu tangme yilong yeitamlak jingne nang yak wang yete hongtüoh.” 23Tüokhei Mosawe I wongjoi wang yete hong; hüyange Youngwanpawe wangkhongpu hei yilong shon, hüyange kahtok te vün yütne tam; hüyange Youngwanpawe Egypt kahtok me yilong yeine tam; 24hüyange Egypt kahtok jat ja ne mengyang phei me sha-ate ngoiye aope-o manngaipu yeonge wong nangpu yilong hüyange yilong phei vün nyütyange yeipu ngoh yangki. 25Hüyange Egypt kahtok üshei ye me, phao me ngohpu khongküm, kahta hei yinmok moini te yilonge shüp; hüyange yilonge phaome phümha weangyong khongkümpu phünne khoih ne tam hüyange phao mepu pee khongkümpu mengne tam. 26Israel hayimlan ngohpu nyoi, Goshen kahtok shaha me yilong ye yei.
27Hüwante ahngpawe Mosa hei Aaron nite nyikne shon hüyange imni te i, “Tenyih pa-a taowe ünu omyangki; Youngwanpa-a tinge ngoh nang, tao hüyange ü-kahtalan yeshupe ngoh nang. 28Youngwanpa te yoptüoh! Hangjingne tomante wangkhong üyong khongpu hei yilong yeipuwe wangteki. Taowe numan taine tamlak, numan shaaji nyoi ngohlak wongpong ne yejelak.”
29Mosawe Ite i, “Tao chingnyu mepu yayongpu phei jam she, ü-yak hongyange Youngwanpa te yoppe tonglak; hüyange kahtoknyuwa Youngwanpa jing she nange shinglak ne, wangkhongpu laklak hüyange yilong yeipu shaaji yengohlak. 30Hüpoi nang hüyange nang shao shanpalan taowe shing nang, hüke numan-e üne-o Youngwanpa Kahwang te yenyam.”
31Pengkhai hei barley tah menge küm, hangjingne barley tah ngaiye ngoh, hüyange pengkhai-a peng teiye ngoh. 32Hüpoi wheat hei spelt tah yemeng; hangjingne tüolan-a üne-o manngaipe ngoh.
33Tüophei me Mosawe ahngpa tüohyange chingnyu mepu ngaiye taiye yoi yak hongyange Youngwanpa te yoppe tong. Hüyange wangkhongpu hei yilong yeipu lak, hüyange kahtok te shaaji wai yekei. 34Hüpoi ahngpawe wai hei yilong yeipu hüyange wangkhongpu lakteki she aope nge, lye üne-o ünu omme I hüyange I shaoshanpalan mongjang wanne mah. 35Hüyange Mosa kaiye Youngwanpawe ngaopu kih-e ahngpa mongjang hüke wanne mah hüyange lye Israel hayim taine yetam.
Currently Selected:
WOITEI 9: KONYBSI
Highlight
Share
Copy
Want to have your highlights saved across all your devices? Sign up or sign in
Konyak Naga Bible - ÜJAO LAITEP
Copyright © 2011 by The Bible Society of India
Used by permission. All rights reserved worldwide.
