WOITEI 15
15
Mosa Hem
1Hüwante Mosa hei Israel hayimlan-e Youngwanpa te tüopa hem lok-e tam:
“Taowe Youngwanpa te hem loklak, hangjingne lye müktishiwa phei okpu ngeteki;
Koiponglan hüyange tüome shotpulan lye yengching te toonne shüpteki.
2Youngwanpa-a ü-wong hüyange ü-hem ngohnang,
hüyange I ü-yinyepa ne mengteki.
I-a ü-Kahwang, hüyange taowe I min yonglak,
Üpalan jing Kahwang, hüyange taowe I kheyongpu jeng loklak.
3Youngwanpa-a naomei;
I minna Youngwanpa.
4“Ahngpajing (Pharaoh) pongtongtoi hüyange I jing nyahponglan Iye yengchingte toon shüpteki;
Ahngpa shaoshanpa shemeipalan Ütak Yengching te hüngteki.
5Yengching üluwe imante lümteki;
longja leye iman yengching ümongte ongteki.”
6“Nang yakjah ye, O Youngwanpa, müktishiwa üngan phei,
Nang yakjah-e, O Youngwanpa, wepalan khoih nyai-e tam.
7Nang ütahpa me okkeshangpuwe, nang wepalan nange poih winteki;
Nang mongshih ngaipu nange shon, iman tahjan kih-e jakke tam.
8Nang nateange yowante yengchinga ü-oun ne menge bunge ngai,
yengchinga tingkhakke jantkih-e yong;
yengching shelupu ken-a ü-oun ne menge mah.
9Wepawe i, ‘Taowe jange tailak, hüyange iman pholak;
taowe iman moth tamlak, hüyange iman tangme ümong hupu ngohlak;
Taowe ü-yanglow teak-e yahlak, ü-yak-e iman mahtamlak.’
10Hüpoi nange nang lüo yo, hüyange yengchinge iman büange mah;
wongnangpu yengme iman-a leak jupu kih-e ong.
11“O Youngwanpa, kahwanglan yo me nang lepu me ao ngohlak?
Nang lepu me üjaopa me yashan yalipu ao ngohlak?
Aowe nange lingpu kih-e yashan yalipu hei wongnangpu ling oklak?
12Nange nang yakjahye lan,
kahtok-e iman lünge mah.
13Nange ütingpa kenpu me nange yintamyangpu kahtalan woi,
Nang wong me nange iman nang üjaopate lam woi.
14Jatlan-e tüopa jai, hüyange iman nyampuwe nin;
Nyam nyam shepuwe Philistialan pho ne tam.
15Edom woipalan-a nyamme kok;
Moab wongnangpu kahtalan ninnang,
Kanan kahtalan iman wongnange teihpu khai-e mah.
16Nyamlak hei moklak iman tangte pei ngoi;
Wongnangpu nang yanglow-e, iman-a long kih-e lingtam,
Nang kahtalan lin mantai mantai O Youngwanpa,
nang kahtalan aoyin nange woingai lin manküm she!
17Nange iman woijem, hüyange nange yoi kahtang me iman nyim tam,
O Youngwanpa, nang ngohlak jingne nange linge ngaipu nyoi,
O Youngwanpa, khümjing nyoi, hanghepa nang yakke nange ling.
18Youngwanpawe, jin tokte jin wanglam lamlak.”
19Aope Ahngpa jing koiponglan, I jing pongtongtoi hei tongtoi woipalan phei yengching te yuyapeih, Youngwanpawe yeng-a leih ye ne tam hüyange tüopawe imante yüoh tam. Hüpoi Israellan-a yengching kaiye, kahtok üwan me kem tai.
Miriam Hem
20Hüwante Aaron Inya hinyu Miriam-e yoi yak me phemkao jon, hüyange shekolan khongkümpuwe yha tokphei te phemkao konge hüyange polok-e woi. 21Hüyange Miriam-e imante hem loketam.
“Youngwanpa te hem loktüoh, hangjingne Iye müktishiwa-e okyangki;
koipong hüyange tüolan me shotpalan
Iye yengching ümongte inne tamteki.”
Ükhah Yeng
22Tüophei me Ütak Yengching mepu Mosawe Israellan woiyange Shur wanwüng jengte ong. Hüyange iman nyih lüm mongme wanwüng jeng kaiye kem, hüyangpoi yeng yetüo. 23Tüophei me iman Marah she nyikpu nyoi jing ja te pei ngoi, hüpoi tüo me ngohpu yeng yeonge khah-e ngoh, tüone menge iman-e tüopa mepu yeying ok. Tüojingne tüopa min Marah she nyik. 24Tüokhei kahtalan-e Mosa kaiye ngu ngawe i, “Teman-e hanghe yinglak?” 25Hüwante Mosawe Youngwanpa te üngwün, hüyange Youngwanpawe Ite pee#Peekhüo she-o ngelak ja hüotam, hüyange lye hatüo yahpuwe yengte shüp; hüwante yeng-a yinglak ne meiye ngai.
Tüoken me Youngwanpawe imante tüopa me ngohlak jingne ngaokhüm pha, hüyange tüome lye imante tok. 26Iye i, “Numan-e numan Kahwang Youngwanpa ngaowüng na epyange jailakei she ima-a, hüyange I sheshao me hanghe üting hatüo lingma-a, hüyange lye phapu ngaokeng me na shonglakei she ima-a, hüyange I ngaokhümlan khongkümpu jonlakei she ima-a, Egyptlante Taowe peine tampu daktin ja nehoi Taowe numante ngoine yetamlak. Hangjingne nang meiye tampupa Youngwanpa-a Tao ngohnang.”
27Tüophei me iman Elimte pei, ümeken me yengyin pen me ni hüyange logpee denyit ngoiye ngoh, hüyange iman tüoken me yengnah me nyoijing ling.
Currently Selected:
WOITEI 15: KONYBSI
Highlight
Share
Copy
Want to have your highlights saved across all your devices? Sign up or sign in
Konyak Naga Bible - ÜJAO LAITEP
Copyright © 2011 by The Bible Society of India
Used by permission. All rights reserved worldwide.
