WOITEI 16
16
Manna Hüyange Awshi
1Israel bangnyuha khongküm Elim mepu yayong; hüyange Elim hei Sin nipa me ngohpu Sin wanwüng jeng, Egypt kahtok mepu iman yayong phei me ni shepupa leat nyih pen me nga shepupa nyih me ngoi. 2Israel hayim banghalan khongkümpuwe wanwüng jeng me Mosa hei Aaron ni phei tüi-e ngu nga. 3#Woi 14.12; 17.3.Israellan-e imni te i, “Aope toman-e meitük ü-o me shotyange hüyange ülao hahying okpu shin-e hah ngoh, hüwante Egypt kahtok me Youngwanpa yak-e toman li ne tamteki she ngoh shih ma-a meihah shepu: hüpoi tüopa bangnyuha nopu sea nyaopuwe phao me litamlak numan-e toman woipei.”
4 #
Jn 6.31. Hüwante Youngwanpawe Mosa te i, “Leihuyah, Taowe numan jingne wang mepu hahying yeine tamlak, hüyange kahtalan nokshao te yulak hüyange nyihjeih she nyih ja hahlak hahying wangpu shinne shaijemlak. Tüokih-e linge Taowe nyüoweleipu me iman woilak heiya yewoilakei Taowe tokke leilak. 5Nyih wok shepupa nyih me-a iman-e hangke shaijem-e ngoh hüke muh tüophei üphong ni nyeiye yolak hüyange tümtalak yang.”
6Tüokhei Mosa hei Aaron ni-e Israellan khongküm pute i, “Egypt kahtok mepu numan woiteipu-a Youngwanpa muh yang she teya numan-e shinglak. 7Hüyange napning numan-e Youngwanpa omme ngohpu müktishiwa phihlangpu ngelak. Hangjingne Youngwanpa phei tüi-e numan-e ngu ngapu lye jaiteki, ütingme, I phei tüi-e ngaopu. Hangjingne, hüke numan-e toman phei tüi-e ngaolak ne toman-a hanghe?” 8Hüyange Mosawe i, “Aope Youngwanpawe yaning me numante hahlak jingne mei hüyange napning hahlak jingne numan-e okpu shinne hahlak hahying phalakei, hüwante numan-e hangshin me I phei tüi-e yemeipe ngu ngayangki, lye jaiyangpu yang she numan-e, shinglak. Aope numan-e toman phei tüi-e ngu nga yapeih, numan-e ütingpa me Youngwanpa phei tüi-e ngu nganang.”
9Hüyange Mosa-e Aaron te i, “Israel bangnyuha khongkümpute Youngwanpa sheshao me pei-e yonglak jingne hangjingne iman-e ngu ngapu lye jaiteki she itüoh.” 10Hüyange hüke Aaron-e Israel bangnyuha khongkümpu phei ngaowante, iman-e wanwüng jeng yekaote lei ye; hüwante mokhshe Youngwanpa phihlangpu wangngai wangphom me ngai. 11Youngwanpawe Mosa phei ngaowe i, 12“Taowe Israel lanne ngu ngapu jaiteki. Imante hüke itüoh, ‘Wangngaiko me numan-e hahlak jingne mei tüolak, hüyange shomme numan-e okpu shinne hahlak hahying tüolak. Hüwante numan-e Taowa numanjing Kahwang, Youngwanpa she shinglak.’”
13Ün yekao me awshi üngang puwe peiye iman lakjing maa; hüyange napning lakjing neikon-e nyai yei. 14Aope yeiye ngohpu nyaite üshem ngaiye eaye mah yapeih, leihuyah, ü-oun ne mengpu nyai ü-oun kih-e ü-oun üjing jingha kahtok tangme yeiye ngoh. 15Aope Israel lanne tüopa nge, hatüowa hanghe ne ngoh iman-e yeshing; tüokhei iman-e jawe jate teitonge i, “Hatüo hangshi?”
Mosawe imante i, “Hatüowa Young-wanpawe numante hahlak jingne phapu hahying ngoh nang. 16Youngwanpawe ngaophapu hatüo ngohnang, ‘Numan kahta lili-e yoi hahjange toontüoh; numan kahta lili-e yoi nyenok me ngohpu shangtoi phei shuwe kahta lili-e omer#Wong shengkok, Ephah 1/10 omer ja japong toontüoh.’ ”
17Israellan-e hüke ling; ütam-e sheyong she, ütam-e sheshoi she toon. 18#2 Kor 8.15.Hüpoi aope iman-e omer me takke leiyapeih, aoyinne sheyong she toon, jamloi yonge-o yenang, hüyange aoyinne sheshoi she toon jamloi shoi-o yenang; kahta lili yoi hahjange toonpu ne ngoh. 19Hüyange Mosawe imante i, “Kahta aowe-o ngainyih pu jingne towe tah ang.” 20Hüpoi iman ütam-e Mosa ngao yejai, hüyange tüopa mepu towe ang. Ünenap tüopa me yong üngang pah teiye hüyange sea nam teiye ngoh. Tüokhei Mosa imante mongshih ngai. 21Napja phei me napja she iman kahta lili yoi-e hahjange toon; hüpoi aope wanghe lange ngailakei towe ngoh pulan-a üsheamne ngaiye taimah yangki.
22Wokshepupa nyih me iman-e üphong ni hahying yowe ang, hatüowa kahta liliye omer nipong toon. Ükhong woipalan khongküm pei hüyange Mosate tüopa jeng i, 23Iye imante i, “Youngwanpawe ngaopuwa hatüo ngohnang; ‘ngainyih-a lahnyik mongkopu phei toloimeipu nyih, Youngwanpa jingne üjao Sabbath nyih ngohnang; numan-e hanghe hahying linglakne ngoh, tüopa lingtüoh, hüyange hanghe honglak ne ngoh, hatüo hongtüoh; hüyange topu khongkümpu-a napning ngoiye numan jingne angtüoh.’” 24Tüokhei Mosa ipu kih-e hangheyin to iman-e tüopa-a napning ngoiye ang; hüyange hatüowa yesea yenampe ngoh yejema-a yongo yepah pe ngoh. 25Mosawe i, “Hatüowa tenyih hahtüoh; hangjingne tenyih Youngwanpa jingne Sabbath nyih ngohnang, tenyih pa-a hatüowa üko me numan-e yetüo külak. 26Nyih wok hatüowa numan-e yolak; hüpoi nyit shepupa-a nyüonyih ngohnang, tüoma-a hango yenanglak.”
27Nyit shepupa nyih me kahta ütam-e hahlak toonlak jingne tai, hüpoi iman-e hango yetüo. 28Hüwante Youngwanpawe Mosate i, “Nang kahta lan-e hangshin me laowe ü-ngaokenglan üjon hupe ngohlak? 29Teihtüoyah! Youngwanpawe numante Sabbath pha, tüojingne wokshepupa nyih me Iye numante nyih ni jingne hahying pha; numan kahta lili numan ümeken me ngoh shu nyoitüoh, nyit shepu nyih numan ngohpu nyoi tahtüoh.” 30Tüokhei kahtalan-e nyit shepupa nyih me toloimei nyoi.
31Sha-a Israel kahtalan-e tüopa hahying te manna she nyik. Hatüowa hoinge üli kih-e he-enge, hüyange hatüo hahlak jingne zahtai jelo phei lingpu an ülam ja kih-e ngoh yangki. 32Mosawe i, “Youngwanpawe hanghe ngaokeng pha hatüo ngohnang: ‘Manna omer taksheng ja yah-e ngoikülak numan jin khongkümpu jingne angtüoh; hümme nakshih aope taowe Egypt kahtok mepu numan woingaiyapeih, phaonyu wanwüng jeng me taowe numan-e hahlak jingne phapu hahying she iman-e ngelak.’ ” 33Mosawe Aaronte i, “Yengtük ja yayah, hüyange tüome omer ja manna hintüoh, hüyange temanjing huhayimlan ngoiye anglak jingne, hatüo Youngwanpa sheshao me angtüoh.” 34Youngwanpawe Mosate ngaokeng phapu kih-e, yemahpe anglak jingne tüopa-a Aaron-e jiengjeppu sheshao me ang. 35Israellan-e wangpeng deli ngoiye, ümeken me iman chingnyoi-e lak, tüopa Kanan kahtok manngoi manngoi iman-e manna hah. 36(Wangpangpu te jonpu omer ja-a ephah pen meitam.)
Currently Selected:
WOITEI 16: KONYBSI
Highlight
Share
Copy
Want to have your highlights saved across all your devices? Sign up or sign in
Konyak Naga Bible - ÜJAO LAITEP
Copyright © 2011 by The Bible Society of India
Used by permission. All rights reserved worldwide.
