WOITEI 19
19
Israellan Sinai Kahtang Ngoi
1Israel hayimlan Egypt kahtok mepu ngaiyang phei me, leat lüm shepupa me, tüopa nyih me iman Sinai wanwüng jengte pei. 2Hüyange aope iman-e Rephidim mepu yayonge Sinai wanwüng jengte pei, iman-e wanwüng jeng me lakjing ling, hüyange tüoken kahtang yashong me Israel-e lakjing ling. 3Hüyange Kahwang phei hüolak jingne kahtang te Mosa ong. Hüyange Youngwanpawe kahtang mepu Ite nyik hüyange Jacob huhayim Israel lante ngaolak jingne Ite i: 4“Tao, Youngwanpawe Egyptlan te hanghe ling hüyange yingphang awlanne yoi yangteng me üha hangke yahpei, hüke Taowe numan tüoken ngoiye yahpeipu numan-e ngeteki. 5#Hin 7.6; 14.2,21; 26.19; Tit 2.14; 1 Pet 2.9; Ütah 1.6; 5.10.Tüokhei sha-a, numan-e ü-ngaowüng jailakei she ima-a, hüyange Ü-jiengjeppu jonlakei she ima-a, hüma-a jatlan üshei tangme numan üjingne ü-moth ülaopa ne menglak: hangjingne kahtok khongkümpuwa üjing ngohnang: 6Hüpoi numan-a üjingne ngengli ahngching hüyange üjao jat. Tüolan ngao nange Israellan phei ngaolak yang.”
7Tüokhei Mosa leihye hüyange kahtalan yo mepu lwngmeilan nyik, hüyange Youngwanpawe Ite ipu ngao khongkümpu iman sheshao me ngaowe tam. 8Hüyange kahtalan khongkümpuwe jamshe janne i, “Youngwanpawe ngaopu khongkümpu toman-e linglakei.” Hüyange Mosawe kahtalan ngaowa Youngwanpa sheshao me shingne tam.
9Hüyange Youngwanpawe Mosate i, “Leihuyah, Taowe nang phei ngaowante kahtalan-e jailak, hüyange üne-o nangte jinte üting laklak ne, Tao nang tangte jeilehpu wangphom me peilak.” Tüophei me Mosawe kahtalan-e ngaopu Youngwanpa te i.
Kahtalan Jaoshapu
10Hüyange Youngwanpawe Mosate i, “Kahtalan tangte taitüoh, hüyange tenyih hei ngainyih nyih ni mongme iman jaowe shawe angtüoh, hüyange iman inkheklan shao ne tamtüoh; 11hüyange lümshepupa nyih jingne tümme tanyah: Tüopa nyih me kahta liliye ngepu oklak ne Tao Sinai kahtang me yulak. 12#Heb 12.18-20.Hüyange kahtalan jingne nange kahtang neikonne yikeng lingtam tüoh, hüyange hatüo itüoh, ‘Numan-e kahtang te ye-onglak hüyange yikengte yeletlak jingne numan yoi nying nyingke kenting yah; aohipawe kahtangte ya letlakei li ne tamlak; 13Ite aowe-o yakke yeletpe longe shüppe yejema-a wenglah-e keppe toilak. Tüopa-a kahta hei yinmok moini te jonlak, hüyange li ne tamlak.’ Hüpoi aope laolünge nyawong wünglakei, kahtalan kahtangte onglak.”
14Tüokhei Mosa kahtang mepu kahtalan tangte yuwe yoppe khümlak jingne tümtüoh she kahtalan te ngaowe tam. Iman-e yoi inkheklan shaowetüm. 15Hüyange Mosawe kahtalante i, “Lümshepu nyih jingne tümme tanyah; hüyange sheko shongte owe tahwen.”
16Lüm shepupa nyih napning me kahtang me wang khong wangkhah hüyange wanglüppu, hüyange jeilehpu wangphom, hüyange nyawong wüngpu yeonge yonge ngoh yangki; hüyange lakjing nyoi me ngohpu kahta üshei nyamme nin. 17Kahwang phei hüolak jingne Mosawe kahtalan lakjing nyoi mepu woiye ngai; hüyange iman kahtang yashong me yong. 18Hüyange Sinai kahtang khongkümpu vünkhuh-e maa, hangjingne tüopa tangme Youngwanpa vün me yu; hüyange tüopa vünkhuh-a vünloong vünkhuh kih-e ngai, hüyange kahtang khongkümpu yeonge mokh po. 19Hüyange nyawong wüng shewün shewün she ngai. Mosawe ngao hüyange Kahwange wangkhong pume Ite jan. 20Hüyange Youngwanpa Sinai kahtang me, shedaopupa kahtang ngoiye yu; hüyange Youngwanpawe kahtang üshang ye me Mosate nyik, hüyange Mosa ong. 21Hüyange Youngwanpawe Mosate i, “Yutüoh hüyange üte leine ongwante yikeng tahkai she kahtalante deingao itüoh; iman-e yikeng kaima-a, iman maapu lilak. 22Ngengpalan aoyin ü-shongte peiyapeih iman nehoi iman nying nyingke jaowe shalak wongpong, hüke yeling yahma-a Taowe imante yak lelak.”
23Mosawe Youngwanpate i, “Kahtalan-a Sinai kahtangte ongpu ye-ok külak, hangjingne nange tomante kahtanga üjao nyoi ne anglak hüyange tüopa neikonne yikeng janne tamlak jingne ngaokeng pha.”
24Youngwanpawe jan-e i, “Yutüoh hüyange nang phei jam-e Aaron woi ongkei. Hüpoi ngengpalan hei kahta-lanpa-a ü-tangte peilak jingne she yikeng kaine yetamlak, kaima-a Taowe imante yak lelak.” 25Tüokhei kahtalan tangte Mosa yu hüyange Youngwanpa hanghe i imante ngaowe tam.
Currently Selected:
WOITEI 19: KONYBSI
Highlight
Share
Copy
Want to have your highlights saved across all your devices? Sign up or sign in
Konyak Naga Bible - ÜJAO LAITEP
Copyright © 2011 by The Bible Society of India
Used by permission. All rights reserved worldwide.
