WOITEI 21
21
Rhapalantepu Ngaokhüm
(Hin 15.12-18; Lev 25.39-55)
1“Tüolan-a linglak ngaokhüm, kahtalan sheshao me nange phalak yang. 2#Lev 25.39-46; Hin 15.12-18.Aope nange Hebrew rhaja shaklakei, lye wangpeng wok nang shao shanlak. Wangpeng nyit shepupa me lye ümee hango phane yetampe lantamlak. 3I shaha peipu ne mengma-a, I shaha tailak; hüpoi I nokne meng teiye peipu ne mengma-a, hüpa ma-a, shekonyu I phei yahyange tailak. 4I tepu nokpuwe I te shekonyu phawe ngohtampu ne mengma-a hüyange yhawe hala yhala nge-e ngohpune mengma-a, shekonyu hüyange yhahayimlan-a Itepu nokpu jingne menglak, hüyange I shaha tailak. 5Hüpoi rhapawe hango yeteihpe, ‘Taowe ü-nokpu, ü-sheko hüyange ü-hayimte kennangki, tao lantampu tüowe mintai she ima-a;’ 6hüma-a I nokpupawe I-a Kahwang#Yejema-a kahphünpa shongte woi peilak. Tüoken me I-a lye tashüp yejema-a taküp me nyenge yongne tamlak hüyange Ite vemeiye na shunge tamlak. Hüma-a I jin küm-e Itepu rha ne menglak.
7“Aope kahta jawe yoi yhala rhanyu ne menglak jingne yüolakei, yha-a netan rhapalan taine tampu kih-e yetaitamlak yang. 8Yha-a yoi shekonyu ne menghupu kahta ütamte yha yüoyange ngoh, hüpoi lye yha yelengma-a, hüma-a yha-a yoipa te muh yüowe yene tamlak yang; Yha nokpupawe kahheng lante yha yeyüo lak yang, hangjingne lye yhate yemeipe jon. 9Hüyange kahta jawe yoiha te yha sheko ne yah ne tamhuwe rhanyu ja shakpune mengma-a, lye yha te yoiha kih-e jonlak yang. 10Kahta jawe nishe sheko yahma-a, lye üwangne yahpu shekote yelakpe yakjüng me hah ying, hei inkheklan, hüyange yhawe üwangne ngohpu meitam khakshuwe phalak yang. 11Hüyange tüolan toishaolan lye yhate yelingma-a lye yha-a hango ümee yeyahpe lantampu phawe teilak yang.”
Yakphei Lükpu Jengme Ngaokhüm
12 #
Woi 20.13; Lev 24.17; Hin 5.17; Mt 5.21. “Aowe kahta jate yak le hüyange I toi ne tam, üting me I-a li ne tamlak yang. 13#Lung 35.10-34; Hin 19.1-13; Jos 20.1-9.Hüpoi hatüowa yeteih tüopu ütuh ja ne hei hüopu ne mengma-a, hüyange Kahwange I yak me li ne tampu ne mengma-a, hüwantepa-a I ümeken me lolakei tüopa nyoijing ja Taowe nangte le ne tamlak, tüoken me I tai ngoh lak. 14Hüpoi aope kahta ja mongshih ngaiyange hüyange shingjang shinge nginme ülao kahta ja toipu ne mengma-a, nange ü-wümjong mepu I-a yah-e li ne tamlak.
15“Aowe yoipa yejema-a yoinyute shütlakei, üting me I-a li ne tamlak yang.
16 #
Hin 24.7. “Aowe kahta phoyange hüyange yüoyange ngohpu yejema-a Iphei muh ange ngoh-e kuh pholakeih, I-a li ne tamlak yang.
17 #
Lev 20.9; Mt 15.4; Mk 7.10. “Aowe yoipa yejema-a yoinyu phoiwümlakei, I-a li ne tamlak yang.
18“Aope kahtalan teelakei hüyange shejawe japa te longe shüpma-a yejema-a yakke tüpma-a, hüyange I yeli yapoi leng me ngohlak ne ngaima-a, 19hüpoi tüophei me I nishe laowe yoi wongjoi yahyange kempu okma-a, aowe shüt I-a lantamlak; hüke nanmah yangpu jingne hei lye nan mee phalak, hüyange I meimei-e meine tamlak yang.
20“Aope rha nokpu jawe yoi rhapa yejema-a rhanyu te shengshaohwe shütyange, hüyange I yak me rha lilakei, rha nokpu te shaoshi ne tamlak. 21Hüpoi rha nyih ja yejema-a nyih ni phei me meimahpu ne mengma-a; shaoshi phapu yengohlak; hangjingne ima-a rha-a I jing moth.
22“Aope netanlan teengai, hüyange püm yekengpe ngohpu sheko te shütte showe nao mengpu ngailakei, hüpoi yhate ümeng hango yengaima-a; shekonyu netanpawe Ite yupu kih-e ütingme Ite tang yulak yang; hüyange kahpalan-e phünne tampu kih-e lye phalak wongpong. 23#Lev 24.19-20; Hin 19.21; Mt 5.38.Hüpoi shekonyu-o mayah yange ngohküma-a, hüwantepa-a üyin nanleiye üyin phalak yang. 24Mük nanleiye mük, fa nanleiye fa, yak nanleiye yak, ya nanleiye ya, 25jakke tampu nanleiye jakke tampu, üko nanleiye üko, shütte tampu nanleiye shütte tampu.
26“Aope rha nokpu jawe yoi rhapa yejema-a rhanyu mükte shütlakei, hüyange hatüo menglakei, lye rhapa-a mük jingne hüke lanne tamlak yang. 27Hüyange lye yoi rhapa yejema-a rhanyu fa khaitam-e shütpu ne mengma-a, I fa nanjingne I lantampu phalak yang.”
Moth Jeng Me Ngaokhüm
28“Aope mahu üpong jawe netan yejema-a sheko ja te shuwe toilakei, mahu üponga longe shüppe toilak yang, hüyange I mei-a yehahlak yang; hüpoi mahu üpong nokpupa-a ümengne üjelak. 29Hüpoi mahu üponge üshong wante-o shuwe wenpu ne mengma-a, hüyange hatüo nokpute shingne tamyang pheite lye hatüo küowe ye-angpu ne mengma-a, hüyange tüowe netan yejema-a sheko jate shu ne tampu ne mengma-a, mahu üponga longe shüppe toilak, hüyange nokpupa-o li ne tamlak. 30Tüoyangpoi I üyin shaklak ne yupu ja ngohma-a, Ite hanghe yin yulakei, lye yoi üyin te shange phalak wongpong. 31Mahu üponge netan nahate jeyah sheko nahate jeyah shuma-a, tüopa ngaokhüm kih-e muh Ite jonlak. 32Mahu üponge rhapa yejema-a rhanyu te shuwe toima-a, mahu nokpupawe rha nokpupate khüm ngin khüo delüm phalak yang, hüyange mahu üponga longe shüppe toilak.
33“Aope kahta jawe kahsa eppe tüohlakei, yejema-a kahsa ja shaoyange hatüo yebüangpe ngohpute mahu yejema-a gado tüome yei ma-a, 34kahsa nokpupawe mahpuwa shümlak, yinmok nokpu te lye ngin phalak wongpong, hüyange yinmok ümanga yoi jingne menglak.
35“Kahta ütam jing mahu üponge eiha jing ja te shuyange toi ma-a, hüma-a üyin ngohpupa mahu üpong yüoyange hatüo ümee-a imnipa me tamme yahlak, hüyange lipu yinmok mei-o imniye tamme yahlakyang. 36Hüpoi üshongpe mahu üponge shupu shinge ngoh yang pheite nokpuwe hatüo küowe ye-angpe ngohpu ne mengma-a, Iye ütingme mahu üpong nanleiye mahu üpong üyin ja phalak; hüyangpoi yinmok ümangpa-a Iye hahlak yang.”
Currently Selected:
WOITEI 21: KONYBSI
Highlight
Share
Copy
Want to have your highlights saved across all your devices? Sign up or sign in
Konyak Naga Bible - ÜJAO LAITEP
Copyright © 2011 by The Bible Society of India
Used by permission. All rights reserved worldwide.
