WOITEI 23
23
Ngaotingpa Moilan Jingne
1 #
Woi 20.16; 23.7; Hin 5.20; 19.15-21. Nange tahleih ngaolan yah-e tahpei; ümengpa phei ngaoting ye ipu saki ne menglak nang yak tahyu. 2Ümeng linglak jingne nange ükhong sheyongpupa pheite tahwoi; yejema-a ükhong sheyongpupa yekaote ngaophünpu lüppe yetamlak jingne ngangpu toi me nange tah ngao; 3#Lev 19.15.hüyange ngaophün wante toiha kahtate sheta leiye tahjon.
4“Nange nang wepa jing mahu yejema-a gado lam pienne taiye hüoma-a, hatüo I tangte yah-e ye ne tamtüoh. 5Nangte nupu kahta jing gado ja hangki-e shepteiye toitawe ngeküma-a, nange Ite yejampe tahtüoh; nange I phei teijamlak wongpong.
6“Toiha kahta ja ngaophünpu me nange ngaophünpu leihkheih-e tahtam. 7#Woi 20.16; 23.1.Tahleih hangpu mepu nang shejai she yanne ngohtüoh; hüyange ümeng yenangpu hüyange ngaoting ipa nange tahtoi; hangjingne aowe hükihpu yeshupu toi lingyapeih Taowe yeitamlak. 8#Hin 16.19.Hüyange nange yakjai hango yeyahlak yang; hangjingne yakjaiye üyonglan mük pom tamnang hüyange ngaoting ipa ngao leihkheih-e tamnang.
9 #
Woi 22.21; Lev 19.33,34; Hin 27.19. “Nange yinkempa shaoshi ne tahtam, hangjingne numan Egypt kahtok me yinkempa ne ngohyangpu khei numan-e yinkempa mongjang hangke ngoh shing ngoh nang.”
Sabbath Ngaokhümlan
10 #
Lev 25.1-7. “Wangpeng wok jingne nange kahtokte üli deilak hüyange tüopa mepu ülick shaijem tüoh. 11Hüpoi wangpeng nyit shepupa me-a hüke yiengne tamtüoh, hüyange tüopa me penge lick-e ngaipu hango tahyah. Tüolan mongme hanghe lick-e ngailakei toihalan-e hahne ok, hüyange towe tüohpu lili-a phao yinmoklan-e hahlak. Hüke muh nange wuwünglick kah hüyange olive pelick jingne lingtüoh.
12 #
Woi 20.8-11; 31.15-17; 34.21; 35.2; Hin 5.12-15. “Nyih wok nange nang toi lingtüoh, hüpoi nyih nyit shepupa me nange toi tah ling; tüome nakshih nang mahu hei gado toloi meipu oklak, hüyange nang rhapalan hei yinkempa lüohe meilak.
13“Tao Youngwanpawe numante ngaopu khongkümpu jeng kenting yah. Ülao kahwanglan te tahyop, yejema-a nang ju mepu iman min nehoi ngaine tah tam.”
Mo Üyong Lüm
(Woi 34.18-26; Hin 16.1-17)
14 #
Woi 34.22-24; Lev 23.1-44; Hin 16.1-17. Wangpeng ja me lüm me, 15Abib leat, hanghepa leat me numan-e Egypt tüohyange yayong, tüopa leat me Taowe hangke numante ngaokeng pha hüke do yenyütpu an mo motüoh. Tüopa mo nyih nyit mongme do nyütyangpu an hango tah hah. Dopu ja yeyahpe üte yoplak jingne aope-o tah pei.
16Nange nangjing kah me deipu üwangpa ülick phei Tahyah Mo#Aonye mo motüoh.
Wangküm yeme, aope nange kah mepu ülick yah-shoyalakeih, Lao Mo#Peamsheam mo motüoh. 17Wangpeng te lüm me netan lili Ütahpa Youngwanpa sheshao me peilak yang.
18 #
Woi 12.10; 34.25; Lev 2.11; 7.15. “Nange aope üte toidopu iy phalakeih, do phei nyütyange hangho tahpha.
“Üte phapu mo mepu üyao ünepu napte ngoi-e yetüohlak yang.
19 #
Woi 22.29; 34.26; Hin 26.2-11; 14.21. “Nang Kahwang Youngwanpa nokte nange hamme ngaipu üwangpa tahlick shemeipupa yah peitüoh.
“Ünyulan düam phei jamme nyeeha yejema-a youn ha tahyang.”
Kananlan Chinghahlak Janpu
20“Leihuyah, nang lamnyu me woilak hüyange Taowe hanghe kahmük tümyange ngohnang tüoyete nang woiye peilak jingne Taowe nang sheshao yete wangdang shongmokpa ja shonlak. 21Kentinge ngohyah hüyange I ngaowüng jaiyah. Hüyange I phei tüi-e tahyong, hangjingne Taowe I shonne tamnang, hüyange hükih-e tüi-e yongpuwa lye ümeng yewinlak.
22“Hüpoi nang I ngao jaiyange hüyange Taowe ngaowe tampu khongkümpu lingma-a, nang tangte peipu wepalan üshei phei Tao wepa ne menglak, hüyange nang phei yemeipa lan phei Tao yemeilak.
23“Ü-shongmokpa nang shaote tailak; hüyange Amorlan, hei Hitlan, hüyange Perizzlan hei Kananlan, Hivitlan hei Jebuslan kahmükte nang woipeilak hüyange Taowe iman mahne tamlak. 24Nange iman kahwanglan te khuhtawe yekhümlak, yejema-a iman shao yeshanlak, hüyange iman mengpu wanglam yejonlak, imanjing kahwanglan mahtam tüoh hüyange imanjing üjao long shongnyulan khüw wintam tüoh. 25Nange nang Kahwang Youngwanpate yopkhümtüoh. Taowe nangte hahying hei yeng moiman tamlak hüyange nang daktin khongküm yahteilak. 26Nang kahmük me ao-o#Sheko yoiha meng winpu yejema-a heepu yengoh tamlak. Taowe jinlao shangshao-e tamlak.
27“Nang phei hokwepu kahtalan Taowe iman-a üte nyamne tamlak; iman pa me üpong yetüope moppu ja Taowe peine tamlak hüyange nang wepalan khongküm nangte tok-lüplak ne ling tamlak. 28Hüyange Taowe nang shaoyete nangtepu wepalante shangtak nyahnyu shonlak; tüo kaiye Hivitlan, Kananlan, hüyange Hittitlan nang sheshao mepu jange teilak. 29Hüpoi Taowe iman-a wangpeng ja me lanshe khongkümpu jange yeteitamlak; Taowe hüke jange teima-a, kahmük-a wanwüng jeng ne mengkülak, hüyange nangte loishe phao yinmoklan ngaikülak. 30Hüleima nang jaalun-e ngaiye, kahmük-a lanshe manyah manyah nang sheshao mepu Taowe iman üjing jingha hei jang teilak. 31Taowe nangjing kahmük yikenga Ütak Yengching mepu Euphrates yengyin ngoiye hüyange Mediterranean Yengching mepu wanwüng jeng ngoiye khaowe yonge tamlak, Tüolan kahmük me nyoi ngohpalan tangme okpu ngelak üngan wong Taowe nangte phalak, hüyange nang ngoipu phei jam jamshe nange iman-a jange yanlak. 32Nange iman phei yejema-a imanjing kahwanglan phei teijanpu hango tah yah. 33Numan kahtok me tüolan kahtalan ngohne tahtam nange iman ngohne tamma-a, Ü-phei tüi-e iman-e nang nuwe tamphalak. Nange imanjing kahwanglante yoppe khüma-a, hatüowa nang jingne tün ja angpu ne ngoh külak.”
Currently Selected:
WOITEI 23: KONYBSI
Highlight
Share
Copy
Want to have your highlights saved across all your devices? Sign up or sign in
Konyak Naga Bible - ÜJAO LAITEP
Copyright © 2011 by The Bible Society of India
Used by permission. All rights reserved worldwide.
