WOITEI 24
24
Jiengjeppu Iy Füosangetam
1Youngwanpawe Mosa te i, “Nang, Aaron, Nadab, Abihu hüyange Israel lwngmeilan denyit ü-tangte kahtang te ongkei; hüyange numan shejai she ngohyange yop khümtüoh. 2Nang shaha hei japa ülaolan ao-o ü-shongte owe yepeilak. Kahtalan-a kahtangte I phei ye-onglak yang.”
3Mosa peingoi hüyange kahtalan te Youngwanpawe phapu linglak ngaokhüm lili ngaowe tam, hüyange kahta lili-e jamshe ngaopha ja phei i, “Youngwanpawe ngaowe tampu khongkümpu toman-e linglak.” 4Hüyange Mosawe Youngwanpawe phapu ngaokenglan khongkümpu nyan. I napning shonge lao, kahtang yashong me lye wümjong ja ling hüyange Israel nokphong jaja jingne long penme ni yonge tam. 5Tüophei me Israel naoshelan Youngwanpa te jakke dopu hüyange mahu üpong toiyange chingmei dopu phalak jingne lye shon. 6Hüyange Mosawe yinmok iy jakih-e tamme yankhong me ang; hüyange jakih-e tangpu iy-a lye wümjong tang me shai. 7Tüophei me jiengjeppu laitep hanghe me Youngwanpa ngaokenglan nyanne ngoh lye jon, hüyange tüopa-a kahtalante üngwün-e iye hüo. Iman-e i, “Toman-e Youngwanpa te jailak hüyange Iye ngaokeng phawe tampu lili linglakei.”
8 #
Mt 26.28; Mk 14.24; Lk 22.20; 1 Kor 11.25; Heb 9.20; 10.29. Hüwante Mosawe iy yah, tüopa-a kahtalante shaitam, hüyange i, “Hatüo jiengjeppu iy, tüome ngohpu ngaokenglan khongkümpu kih-e, Youngwanpawe numan phei lingnang.”
Sinai Kahtangme Kahwang Phei
9Tüophei me Mosa, Aaron, Nadab, Abihu, hüyange Israel lwngmeilan denyit ngoiye kahtang te ong; 10hüyange iman-e Israel Kahwang nge. I yashong me ngaiphaihpu wanghüng lepu me sapphire toinyu longe kamyange ngohpu kih-e nge. 11Kahwange tüolan Israel üshanglan te I yak yele; iman-e Kahwang nge, hüyange tüophei me iman-e jamme hahying yangki.
12 #
2 Kor 3.3. Youngwanpawe Mosa te i, “Ü-tangte kahtang yete ongkei, hüyange nang tüo me ngohwante, kahtalante nyüoweleiye Taowe nyanpu hanghe me Taowe phapu ngaokhümlan ngohnang tüopa longsheng khüo Taowe nangte yahpha peih.” 13Tüokhei Mosa hüyange Ite jampa Joshua tümme sho, hüyange Kahwang kahtangte Mosa ong. 14Hüyange Mosawe lwngmeilan te i, “Toman nishe numan tangte leih manye manye lakjing tüome numan-e toman tanne ngohkei. Leihuyah, Aaron hei Hur numan phei ngohnang; tüokhei aowe teingaolak ne ngohyapeih Iye imni shongte peiye ngaone tamtüoh.”
15Tüophei me Mosa Sinai kahtangte ong, hüyange kahtanga wangphom-e nyeih. 16Youngwanpa müktishiwa Sinai kahtang me ngohyangki, hüyange wangphom-e hatüo nyih wok büang; hüyange nyit shepupa nyih me wangphom yo mepu Iye Mosate nyik. 17Sha-a Israel hayim mükte kahtang me Youngwanpa müktishiwa leilak me mahtamlakpa vün kih-e ngoh yangki. 18Hüyange Mosa wangphom yo te kahtang ngoiye ong; hüyange Mosa kahtang me nyih deli hüyange pha deli ngoh yangki.
Currently Selected:
WOITEI 24: KONYBSI
Highlight
Share
Copy
Want to have your highlights saved across all your devices? Sign up or sign in
Konyak Naga Bible - ÜJAO LAITEP
Copyright © 2011 by The Bible Society of India
Used by permission. All rights reserved worldwide.
