WOITEI 25
25
Khümjing Nyenok Jingne Dopu
(Woi 35.4-9)
1Youngwanpawe Mosa te i, 2#Woi 35.4-9.“Ü-jingne iman-e dopu ja phatüoh she Israel hayimte itüoh. Kahta aowe hangkih pu dopulan phahuyapeih yahtüoh. 3Hüyange numan-e iman mepu yahlak dopuwa hatüolan ngohkülak: hon, khüm, hüyange shakphan yan; 4pengkhai, wanghüng, phutti, hüyange mat tak; youn min phei takpu inkhek; 5taakke yanti yangphei nyee sho, shemeipupa meisho; acacia pee; 6vüntük jingne minnga, pholak jingne muli, hüyange üpe-meipu sü; 7ütahpa ngengpa jing phakshaoh ülao hei I jing mongkhüp me onyx long hei ülao juyüklan ngohlak. 8Hüyange Tao iman phei ngohlak jingne Ü-jingne iman-e üjaopa nyoi ja lingne tamtüoh. 9Taowe hangke üshei nangte khümjing nyenok hüyange tüome toinan jeng hüoyangki hüke hei nange linglak yang.
Jiengjeppu Ghonu
(Woi 37.1-9)
10 #
Woi 37.1-9. “Acacia pee phei jiengjeppu ghonu ja lingtüoh, üjükte yakkong ni phei me tangkhüw, hüyange üpeamte yakkong ja phei me tangkhüw, hüyange daopute yakkong ja phei me tangkhüw. 11Hüyange nange hatüowa hon shaha phei ümong yeme hüyange ütahye me shittüoh hüyange tüopa ünah neikonne honne shitte büangtüoh. 12Hüyange tüopa jingne nange hon shüptet peli linglak yang, hüyange hatüo üya peli me, jaye me shüptet ni hüyange jaye me shüptet ni angtüoh. 13Hüyange nange acacia pee phei sheam lingtüoh hüyange tüopa tangme honne photüoh. 14Hüyange nange sheam-a ghonu ünah ye me ngohpu ükamte letamtüoh; tüome ghonu-a pailak. 15Tüopa ghonu tepu shüptet ükamme sheam-a leyange anglak, hüyange tüopa-a aope-o teakke yeyahlak. 16Tüophei me Taowe nangte phalak longsheng ni hanghe me ngaokhümlan nyanyange ngohnang tüopa ghonu me hintüoh.
17“Tüophei me nange hon shaha phei shüpshe shotjing ja lingtüoh; tüopa üjükte yakkong ni phei me tangkhüw, hüyange üpeamte yakkong ja phei me tangkhüw. 18Hüyange shüpshe shotjing ünah moi ni yekao me meimeiye jopyang phei honne cherubim ni nange lingtüoh. 19Ünah jayekao me cherub ja, hüyange ünah jayekao me cherub ja she shüpshe shotjing ja me ünah moini yeme cherubim ngohyange lingtüoh. 20Hüyange cherubim-a iman sheta teihüowe, shüpshe shotjing iman üyange yüohyange, iman üyanga ütang yeme saayange linglak yang. 21Nange shüpshe shotjinga ghonu tang me angtüoh; hüyange Taowe nangte phapu jiengjeppu-a tüome hintüoh. 22Hüyange tüome Taowe nang phei hüolakei, hüyange ghonu tangme cherubim nipa mepu, shüpshe shotjing mepu, Israel hayimlante ngaokhüm hanghepa Taowe nangte phalak, khongkümpu jeng Taowe nang phei ngaolak.
Kahwangte Dopu An Jingne Khao
(Woi 37.10-16)
23 #
Woi 37.10-15. “Nange acacia pee phei khaoja lingtüoh; tüopa üjükte yakkong ni, hüyange tüopa üpeamte yakkong ja, hüyange tüopa daopute yakkong ja phei me tangkhüw. 24Hüyange tüopa tangme nange jaoshepu hon phei phowe büangtüoh; hüyange tüopa neikonne honne shittüoh. 25Hüyange nange tüopa neikonne yakpha khop nanjing khaowe üju lingtüoh, hüyange tüopa üjute honne phoyange lingtüoh. 26Hüyange tüopa jingne nange pailak hon shüptet peli lingtüoh; hüyange tüolan-a ümeken me üya peli ngohnang, tüopa ünuk peli me angtam tüoh. 27Khao pailak jingne sheam lelak shüptet lan-a üju pong me anglak yang. 28Sheamlan-a acacia pee phei lingtüoh, hüyange tüolante honne shitte büangtüoh. 29Sheng, wan, yengsheng, hüyange yankhonglan wuwüngti dowante jonlak jingne lingtüoh. Tüolan khongkümpuwa jaoshepu hon phei lingtüoh. 30#Woi 39.36; 40.23; Lev 24.5-9.Khaowa jiengjeppu ghonu sheshao me anglak, hüyange tüopa khao tangme üte dopu üjao an jinte anglak yang.
Vüntük Yongjing
(Woi 37.17-24)
31 #
Woi 37.17-24. “Nange jaoshepu hon phei vüntük yongjing ja lingtüoh. Tüopa tepu yajenth hei üya-a meimei-e joppe yaoyang phei hon phei lingtüoh. Tüopatepu oleng, jupenglan, pengpu üju hei üyak lan-a tüopa phei üpee ja ne hei jam-e linglak. 32Tüopa vüntük yongjing mepu üphat wok, moini yekao me lümpong phatte yanlak. 33Üqui wok phatte yanpu üphat moilan me almond jupeng penge jupeng üyak-o omme jupeng lümpong linglak. 34Vüntük yongjing üya-a almond jupeng pengpu üpeng hei jupeng üyaklan omme lingyang phei jupeng peli ngohlak. 35Jupeng üqui phatpu lüm moilan phang me jupeng pengpu japong ngohlak. 36Pengpu jupeng üju, phatte yanpu üquilan, hüyange vüntük yongjing khongkümpu-a hon shaha joppe lingyang phei üpe ja ne menglak yang. 37Vüntük yongjinglan jingne vüntük nyit lingtüoh, hüyange hüke tüolanne sheshao yeme wangngai teelak jingne tüolan tangme angtam tüoh. 38Tüome jonlak jeplak hei süjak shenglan-a jaoshepu hon phei lingtüoh. 39Vüntük yongjing hüyange tüome yahpu toinan khongkümpu linglak jingne jaoshepu hon kilogram delüm me nga yah jontüoh. 40#Lam 7.44; Heb 8.5.Taowe nangte kahtang me hangke hüo tüo kih-e tüolan-a linglak jingne namnotüoh.
Currently Selected:
WOITEI 25: KONYBSI
Highlight
Share
Copy
Want to have your highlights saved across all your devices? Sign up or sign in
Konyak Naga Bible - ÜJAO LAITEP
Copyright © 2011 by The Bible Society of India
Used by permission. All rights reserved worldwide.
