WOITEI 26
26
Khümjing Nyenok
(Woi 36.8-38)
1 #
Woi 36.8-19. “Pengkhai shemeipupa phei wanghüng, phutti, hüyange mattak hase ngaiye takyangpu üpha pen phei Tao ompu Nyenok, Üjaopa nyenok ümongpa lingtüoh. Cherubim ngaiye manneyange linglak yang, 2jhotnye moilan üjük üpeam ja kih-e ngohlak, laopute yakkong da me tet, hüyange khaopute yakkong peli ngohlak. 3Üpha nga-a üpha ja ne sheiye shünglak, hüyange japa üpha nga-o hüke muh ja ne shüngtüoh. 4Wanghüng hase pheipu inkhek phei jhotnye ü-at ye üpha lili üjeng yeme üpak lingtüoh. 5Üwangpa üpha tepu üwangpa üjep me üpak denga satüoh, hüyange ni shepupa üpha tepu üjep phei teihüowe üpak denga satüoh. 6Hüyange hon yankok denga hanghe me üjep ni-a üpha ja ne shünglak, tüo kaiye Khümjing nyenok-a ümongja ne menglak.”
7“Hüyange Khümjing nyenok tangme yüohlak jingne nange youn min phei jhotnye üpha pen me ja lingtüoh. 8Laopute yakkong delüm hüyange khaopute yakkong peli; jhotnye khongkümpu jakih-e shinne linglak. 9Nange jhotnye nga-a üjep ja ne jamme hüyange ülao jhotnye wok-a üjep ja ne she shüngtüoh. Hüyange üpha wok-a khümjing sheshao yeme ni ne nüppe yetüoh. 10Ükümpa üjep tepu üpha üjeng ye me üpak denga satüoh, hüyange japa üjep ünah yeme üpak denga satüoh.
11“Hüyange nange shakphan yan phei yankok denga lingtüoh, hüyange ünüp ni-a ja ne menge büange linglak jingne üpaklan me tüolan-a künne tamtüoh. 12Hüyange jhotnye üjeng tangkhüwpu nyei ngohpuwa khümjing tokphei yeme jhottüoh. 13Khümjing te tüopawe neikonne büanglak nanjingne laopu moini yekao mepu yakkong japong towe jhotte anglak yang.
14“Ü-at yeme shonglak jingne üne-o ülam ni hüke nyee üsho taakke tiyangphei hüyange ja-a shemeipupa meisho phei lingtüoh.”
15 #
Woi 36.20-34. “Khümjing nyenok ütangye püangpeam jingne acacia pee phei lingtüoh. 16Pelao jaja laopute yakkong pen hüyange khaopu te yakkong japhei me tangkhüw ngohlak. 17Hüyange pelaolan hüppu oklak jingne üphat nipong phei linglak. Pelao khongkümpu me tüokihpu üphat ngoh-e linglak yang. 18Heyekao khümjing jingne pelao da yahtüoh, 19hüyange tüolan me yahlak jingne khüm yajenth deli, pelao ja ja me üphat nipong ngohpute lümlak jingne yajenth nipong ngohlak. 20Khümjing apyekao jingne pelao da yahtüoh; 21hüyange khüm yajenth deli, pelao ja me nipong yahlak ne lingtüoh. 22Khümjing tokphei ye henyip yekao jingne pelao wok yahtüoh, 23hüyange ünuk me yahlak jingne pelao ni yahtüoh. 24Ünuk me yahpu pelao lanna yashong yeme hüplak hüyange ütangye ngoiye khongkümpu hüppe inlak. Hüke ünuk ni ngaiye tampu pelao ni-a hüppe linglak yang. 25Tüokaiye khüm yajenth pen me wok nangyange pelao tet, pelao ja ja me nipong ngohkülak.”
26“Hüyange nange acacia pee phei mailieng penme nga lingtüoh, khümjing nyenok ükao ja pelao jingne nga, 27hüyange khümjing nyenok jayekao jingne pelao nga, hüyange tokphei ye henyip üjengye jingne pelao nga yahtüoh. 28Üwopa peilei wenao pelao wosat ngoiye khümjing jaye üjeng mepu jaye üjeng ngoiye shalak yang. 29Pelao lante honne photüoh hüyange peilei wenaolante tüklak jingne hon shüptet te ange satüoh, hüyange tüolante-o honne photüoh. 30Kahtang me Taowe nangte hüowe tampu kih-e khümjing nyenok-a weye linglak yang.”
Jhotnye
31 #
Woi 36.35-38. “Shemeipupa pengkhai phei wanghüng, phutti, hüyange mattak phei jhotnye ja taktüoh. Tüopa me cherubim inyange manneyange lingtüoh. 32Hüyange tüopa-a yankok me shinyange, khüm yajenth peli me nyünyange ngohpu honne phoyang phei acacia shong peli me künne tamtüoh. 33Jhotnye lanna khümjing nyenok püangme khüng lienge ngohpu yankok me künne tamtüoh, hüyange longsheng ni hinyange ngohpu jiengjeppu ghonu-a jhotnye tokphei me angtam tüoh. Hüwante üjao nyoi hei shejaopupa nyoi nipa me jhotnye-e tienlak. 34Shejaopupa nyoi me ngohpu ghonu tangme shüpshe shotjinga angtüoh. 35Hüyange shejaopupa nyoi ü-at ye me, khaowa khümjing nyenok apyekaote nyien yange hüyange vüntük yongjinga heyekao me nyien yange angtamtüoh.
36“Khümjing nyenok nokshao ye jingne wanghüng, phutti, hüyange mattak hüyange manneyange hase inyange shemeipupa pengkhai-e jhotnye taktüoh. 37Tüopa jhotnye jingne honne phoyange hüyange hon phei lingpu yankok khamme lingyange acacia pee phei shong nga lingtüoh; hüyange tüolan shong jingne shakphanyan yajenth nga lingtüoh.”
Currently Selected:
WOITEI 26: KONYBSI
Highlight
Share
Copy
Want to have your highlights saved across all your devices? Sign up or sign in
Konyak Naga Bible - ÜJAO LAITEP
Copyright © 2011 by The Bible Society of India
Used by permission. All rights reserved worldwide.
