WOITEI 28
28
Ngengpalan Jingne Nyemo
(Woi 39.1-7)
1“Nangjei Aaron hüyange Ihalan, Nadab, Abihu, Eleazar, hüyange Ithamarlan nang shongte nyik tüoh. Israel kahtalan yo mepu iman yanne angtüoh, hümme nakshih iman-e ngengpaja ne ü-shao shanlak. 2Ite shemei yaomapu hüyange okkeshangpu phei hüowe tamlak jingne nangjei Aaron jingne ngengpa jing nyemo shüngtüoh. 3Aoyinte Taowe okkeshangpu pha tüolan aimanpalan khongkümpu nyik tüoh, hüyange Aaron jing inkheklan takke shünglak; tüophei me ü-toishao jingne ngengpa ja ne jaowe tamlak. 4Imante tüolan lingtüoh she itüoh: mongkhüp ja, ngengpa phakshaoh ja, ngeng-ahng phakshao ja, awfa yantak inyangpu phakshao ja, shangnyeih khek, hüyange shienghit ja, iman-e tüokih-e ngengpa nyemo nangjei Aaron hei Ihalan jingne shünge linglak yang; tüome nakshih iman-e ngengpa ja ne menge ü-shaoshan lak. 5Aimanpalan-e wanghüng phutti, mattak, hon ve, hüyange shemeipupa pengkhai hase pheipu velan jonne linglak yang.”
Ngengpa Phakshaoh
6 #
Woi 39.2-7. “Hüyange iman-e ngengpa phakshaoh-a wanghüng, phutti, hüyange mattak, hon ve, hüyange shemeipupa pengkhai awfa yantak inyange linglak. 7Moini üjeng me hüowe shalak ne üjeng nangyange phakwai ni ngohlak. 8Jakihpu hase toinan muh yahyange yeonge meiye takpu shienghit khek ngengpa phakshaoh me wailak tüokaiye tüophei ja ne ngohlak. 9Hüyange nange onyz long ni yayah hüyange tüopa me Jacob hayim pen me ni min watte nyan tüoh; 10hüke iman puhpu kih-e jeiyongpa me wange long ja me wok, hüyange japa long me wok she nyantüoh. 11Jacob hayimlan min long ni me watte nyanlak jingne okkeshangpu juyük yaopa yamtüoh, hüyange longa hon ünok ja me yonge tamlak. 12Israel nokphong pen me ni ompu hüowe tüolan-a ngengpa phakshaoh phakwai me angtam tüoh. Hükih-e linge Aaron-e iman min-a I phaktang me kiyange kemlak, hümme nakshih Tao, Youngwanpawe jinte ü-kahtalan teih tüolak. 13Hüyange nange hon ünok ni lingtüoh; 14hüyange wu lüppu kih-e lüpyange hon shaha phei yanwu ni lingyange tüo ni-a hon ünok me khümtüoh.
Mongkhüp
(Woi 39.8-21)
15 #
Woi 39.8-21. “Nange Ütahpa Ngengpawe Kahwangpawe mongpu shinge oklak me yahlak jingne mongkhüp ja lingtüoh. Hatüowa ngengpa phakshaoh yahpu ülamlan muh yahtüoh hüyange awfa yantak inpuwa teilepu me linglak. 16Hatüowa üjük üpeamjakih-e hüyange ni ne nüplak. Üjük te yakkam ja, hüyange üpeamte-o yakkam ja. 17Tüopa tangme toinyu long üleng peli neak-e tamtüoh; üwangpa leng me ruby ja, topaz ja, hüyange garnet ja; 18nishepupa leng me emerald ja, sapphire ja, hüyange diamond ja; 19lüm shepupa leng me jacinth ja, agate ja, hüyange amethyst ja; 20hüyange peli shepupa leng me beryl ja, onyx ja, hüyange jasper ja. Tüolan-a hon ünok ja me neak-e khümlak yang. 21Israel nokphonglan ompu hüowe tüolan long pen me ni jaja me Jacob hayimlan min japong me watte nyanlak. 22Mongkhüp jingne wu lüppu kih-e lüpyange jaoshepu hon phei honwu lingtüoh. 23Hon shüptet ni lingtüoh hüyange tüolan-a mongkhüp ütokye ünuk ni me shintüoh. 24Hüyange honwu ni-a tüopa shüptet ni me shintüoh. 25Honwu jayekao üjeng ni-a honnok ni me shintüoh, hükih-e linge ngengpa phakshaoh phakwai ütah ye me khüm tamtüoh. 26Tüophei me hon shüptet ni lingtüoh, hüyange tüo ni-a ngengpa phakshaoh phei neak-e mongkhüp üphang ye ünuk ümongye me shintüoh. 27Üne-o hon shüptet ni lingtüoh, hüyange ngengpa phakshaoh tepu okkeshange takpu shenghit ütok pong hüyange shüngpu pongme phakwai ni ütah üphang yeme shintam tüoh. 28Ngengpa phakshaoh tepu shüptet te mongkhüp shüptet-a wanghüng wu phei satüoh, hümme nakshih mongkhüp-a lanne yetape shenghit tok me monge ngohlak.”
29“Aope Üjao Nyoite Aaron onglakeih, hüwante Israel nokphonglan min watte nyanyangpu mongkhüp lye yahyange onglak, hüwante Tao, Youngwanpawe jinte ü-kahtalan teih tüolak. 30Hüyange mongkhüp tangme Urim hei Thummim#Urim hei Thummim - Kahwang phei ngaowante ngengpalan-e jonpu toilan. angtam tüoh, hümme nakshih aope ü-üjaopa nyoite I peilakeih hüwante Aaron-e tüolan-a yah peilak. Hükih-e onge peipu hipak lili me Iye tüopa mongkhüp yüklak wongpong, hümme nakshih Israel kahtalan jingne Taowe mongpu Iye shinge oklak.”
Ngengpa Ülaolan Nyemo
(Woi 39.22-31)
31 #
Woi 39.22-26. “Hüyange nange ngengpa phakshaoh tangme yahpu ngeng-ahng phakshaoh-a lanshe wanghüng mat phei linglak yang. 32Hatüo me üshang ngailak jingne üwo linglak, hüyange tüopa üwo yehitlak jingne yakke takpu mongjü-ongpu khek-e üju neiye paowe shünglak. 33Tüopa phakshaoh üya ye neikonne wanghüng, phutti, hüyange mattak hase pheipu chamuk lingtüoh, hüyange üpa üpa me hon lüngha jhotte lingtüoh. 34Ngeng-ahng phakshaoh üya neikonpu me hon lüngha ja hüyange chamuk ja, hon lüngha ja, hüyange chamuk ja she ngohlak. 35Aope ngengpa toishao linge jonlakei, Aaron-e tüopa ngengpa phakshaoh shaohlak yang; aope I üjao nyoi, Youngwanpa sheshao me peilakeih yejema-a I tailakei, hatüo lüng wüng jailak hüyange I yetoilak.”
36 #
Woi 39.30,31. “Hüyange nange jaoshepu hon phei longsheng yük lingtüoh, hüyange tüopa me ‘Youngwanpa te Jaowetampupa’ she watte nyantüoh. 37Tüopa-a wanghüng wu phei shangnyeih khek sheshao yeme satüoh. 38Aaron-e tüopa-a I shekeng me khümyange ngohlak, tüokaiye kahtalan-e dopu phawante iman-e püohpinpu ngoh yapoi, Tao, Youngwanpawe Israellan-e üte jaowe tamme dopulan khongkümpu Taowe yahlak.”
39 #
Woi 39.27-29. “Shemeipupa pengkhai phei Aaron jing phakshaoh hüyange shemeipupa pengkhai phei shangnyeih khek ja hüyange üne-o awfa yantak inyange shenghit ja taktüoh.”
40“Hüyange Aaron hayimlan imante shemei yaomawe hüyange okkeshangpu phatamlak jingne phakshaoh, shienghit khek, hüyange shaoshaohlan shünge tamtüoh. 41Hüyange tüolan inkheklan-a nange nangjei Aaron hüyange I hayimlante shaoh-e tamtüoh. Tüophei me imante olive minnga phowe tamme phünne phawe hüyange jaowe tamtüoh; tüo kaiye iman-e ngengpa ja ne ü-shaoshanlak. 42Hüyange nange iman pümkeng me ngohpu büanglak jingne shieng mepu yung ngoiye yahlak koongshaoh pengkhai khek phei shüngtüoh. 43Aope iman ü-khümjing nyenokte yejema-a ngengpa ja toishao linglak jingne Shejaopupa Nyoi wümjongte owe peilakeih, Aaron hüyange I hayimlan-e jinte tüolan yahyange peilak yang, hümme nakshih iman pümkeng me yengoh teiye yetoilak. Tüopa-a Aaron hüyange Ijing huhayimlan jingne jinte ngohlak ngaokeng ngohnang.”
Currently Selected:
WOITEI 28: KONYBSI
Highlight
Share
Copy
Want to have your highlights saved across all your devices? Sign up or sign in
Konyak Naga Bible - ÜJAO LAITEP
Copyright © 2011 by The Bible Society of India
Used by permission. All rights reserved worldwide.
