KAHTAMYENGHAN 33
33
Esau Phei Jacob Hüo
1Jacob-e nganne leiwante, kahtalan gho peli phei Esau peipu nge. Tüokhei lye yoi halan Leah hei Rachel hüyange phongphe nyulan yo me tam. 2lye phongphe nyu hüyange iman hayimlan sheshao yeme üwangne, tüophei me Leah hüyange yha hayim, hüyange Rachel hei Joseph üshei phei ükümpa ne ang. 3Hüyange I iman shao yete wen, hüyange Ijei shongte owe peiwante lye yoi nying nyingke nyit me kahtok te khuh tawe khüm.
4Hüpoi Esauwe I phei hüolak jingne phette wen, hüyange Ite üngme künyange, omhüp; hüyange imni moini shap. 5Aope Esauwe I mük wemme lei hüyange shekolan hei nahalan nge, lye i, “Nangphei ngohpu tüolan-a aoyin shi?”
Jacob-e janne i, “Üyongpa, nang shaoshanpate Kahwange shüpsheye phapu hayimlan üja.” 6Tüophei me phongphe nyulan yoi hayimlan phei kem pei hüyange khuhtawe khüm; 7hüke muh Leah hei yha hayimlan kem pei, hüyange ükümpa me Joseph hei Rachel kem pei hüyange khuhtawe khüm.
8Esauwe tong, “Taowe hüoyangpu ükhong tüolan lili-a hanghe te leppu?”
Jacob-e janne i, “Hatüowa nang mepu shüpshe tüolak nanjing ne shon shihpu!”
9Hüpoi Esauwe i, “Ünao, ü-meo wangmanne ngoh nangki; nang me ngohpuwa nangjingne muh angtüoh.”
10Jacob-e janne i, “Tah, taowe nangte yoppe tongnang; taowe sha-a nang sheshao me shüpshe tüopu ne mengma-a, ü-hünghao ü-yak mepu yahtepha. Hangjingne ü-jingne-a nang sheta ngepuwa Kahwang sheta ngepu shinne ngohnang; sha-a nange tao monghah-e yahteki. 11Chingmei lamlinge ü-hünghao hanghepa nang tangte yah peinang, yahtepha she taowe nangte yoppe tongnang; hangjingne Kahwange üte shüpshe jontepuwe, ü-wongpong üshei üte phawe ngohnang.” lye manyah manyah Jacob-e kang; hüke lye Ite yoppedopu jingne lye yah.
12Tüophei me Esauwe i, “Teman yayongne tümhah; hüyange tao nang shaote kemkü ning.”
13Hüpoi Jacob-e janne i, “Ü-nokpupawe shingnang, nahalan wong yenang, hüyange ü-phei ngohpu nyee ükhong hei mahu ükhong iman düamyeng hüppu ühalan jingne taowe teihne ngainang; hüyange iman nyih ja jingne nehoi kange kemne tamma-a yoi yoi ükhong ngohpu khongkümpu likülak. 14Ü-nokpupa, nang shaoshanpa mepu üwangne kemkei; hüyange tao monglaowe ü-phei ngohpu tampu yinmoklan-e kempu phei shuwe, hüyange nahalan-e kempu phei shuwe, woiyange taowe ü-nokpupa tangte Edom kahtang manngoi manngoi peiküning.”
15Tüokhei Esauwe i, “Hüma-a taowe sha-a ü-phei ngohpalan ütam nang phei tüohpha ning;”
Hüpoi Jacob-e janne i, “Hatüowa wongpongne min ngai ja, nang shüpshe tüolak te hei taowe lenge teihnang.” 16Tüokhei Esau tüonyih-a Edom yete taipu lamnyute leih-e ye. 17Hüpoi Jacob Succoth yete tai; ümeken me Iye yoi jingne nok ja we hüyange lye tampu yinmoklan jingne panha ja we; tüojing ne tüopa ching min Succoth she nyik.
18Mesopotamia mepu I leih yewante ütuh ümeng yehüope Kanan kahtok Shekhem chingnyute Jacob ngoi; hüyange chingnyu ü-o mepu kah ja me yoi pümtep ling. 19Iye tüopa kah-a Shekhem üpa Hamor huhayimlan mepu khüm ngin ükhüw gho ja phayange shak. 20Tüoken me lye wümjong ja linge ngai, hüyange tüopate El-Elohe-Israel#Tüopa-a Kahwang, Israel Kahwang she min.
Currently Selected:
KAHTAMYENGHAN 33: KONYBSI
Highlight
Share
Copy
Want to have your highlights saved across all your devices? Sign up or sign in
Konyak Naga Bible - ÜJAO LAITEP
Copyright © 2011 by The Bible Society of India
Used by permission. All rights reserved worldwide.
