KAHTAMYENGHAN 34
34
Dinah Kange Nutampu
1Nyih ja, Jacob hei Leah ni üha yhala Dinah, iman ngohpu yenghoi mepu Kanan shekolan phei waone tai. 2Aope tüopa yenghoi Hivite ahngpa Hamor üha Shekhem-e yha nge, Iye yha te lük pho hüyange kange toimeng ling. 3Hüyange lye Jacob üha sheko-ha Dinah te yeonge nyak kenne teih, hüyange yhate yohkah. 4Tüokhei Shekhem-e Ipa Hamorte hüke i, “Tüopa naoyha ü-sheko ne peitam pha.”
5Sha-a Jacob-e I sheko-ha Dinah-a Shekhem-e nu-shak-e tamteki she jai, hüpoi Iha netanha lan-a inok tampu yinmoklan phei kah me ngoh, tüokhei iman manongpu mongme Jacob-e ngao yengaipe nün-e tan. 6Shekhem üpa Hamor-a Jacob tangte I phei ngaolak jingne pei. 7Hüke muh Jacob hayimlan-o kah mepu ün ong. Aope iman-e tüopa jeng jai, iman mokh-e yashan hüyange mongshih ngai; hüyange Jacob ühate kange toimeng lingpu kaiye Israel kahtalan te wüotüo shehai ne tampu ne ngohyangki.
8Hüpoi Hamorwe iman phei ngaowe i, “Üha Shekhem nenok naoyha te nyak kenne mahteki. Chingmei lamlinge yha-a I phei nokne mengne tamkei. 9Toman phei matatongningpu ngohlak; numan yhalalan tomante yahkei, hüyange numan jingne toman yhalalan yayah. 10Tüophei me numan-o toman kahmük tüome toman phei nyoipu oklak; numan-e ümeken me nyoihu tüoken me, pheeileih-e, hüyange toinyu nanha tüowe numan-e mongpupa kih nyoipu oklak.”
11Hüyange Shekhem-e Dinah üpa üjeilante ngaowe i, “Numan sheshao me tao shüpshe tüone tampha, hüyange numan-e hangheyin üte ilakei, hatüo taowe numante phalak. 12Sheko jingne yhamee hüyange hünghao numan-e mongpu kih yupha, hüyange numan-e üte hangke ilakei taowe jailak; naoyhanyu hei nyemnya ne menglak jingne üte yahkei.”
13Shekhem-e iman ü-nao Dinahte wüotüone tamyangpu jingne, Jacob hayimlanne Shekhem hei Ipa Hamor nite lowelampu yeme janne ye. 14Iman-e imni te i, “Toman ünao sho yekhüppu kahtate phalak-a toman-e ye-oklak; hangjingne hatüowa toman jingne wüolakpa. 15Hüpake lingküme hei toman-e mongne ok, hüke numan toman kih-e mengne, numan netan khongkümpu üshokhüp tüoh; 16tüome nakshih toman-e mata ne menglak jingne monglak. Numan yo me toman chingnyoilak hüyange numan phei jat ja ne menge ngohlak. 17Hüpoi toman-e ngaopute numan-e yemong hüyange shoyekhüp küma-a, toman-e yha yahlak hüyange yayonge tailak.”
18Tüopake teingaowe tümpuwa Hamor hei Iha Shekhem niye meijange teih-e pei; 19hüyange hanghepa juteih phayangki tüopa linglak mepu naoshepawe shonne yengoh; hangjingne lye Jacob üha te loishe ken. I nok noksa kahtalan üshei yo me I ütahpa ne ngoh yangki.
20Tüokhei Hamor hei Iha Shekhem ni iman chingnyu peten pongme chingjempu nyoite pei hüyange yoi chingshao kahtalan phei ngao: 21“Hatüo kahtalan toman phei teishinge meiye ngohnang; teman phei teman kahtok me chingmei me kemme yonge hüke iman minnyoiyah. Kahtok-a iman jingne wangmanne ngohnang. Teman-e iman jing yhalalan yah hah hüyange teman yhalalan-o imante hüke nok ne menge tamhah. 22Hüyangpoi iman shokhüppu kih-e temane-o teman netanlan khongkümpuwe shokhüp küm-e hei hatüo kahtalanna teman kahta ne hüyange teman phei chingnyoiye ngohlak jingne monglak she inang. 23Iman jing yinmok ükhong hüyange iman jingne ngohshihpu shemin lamphe khongküm teman jingne yemenglak a? Tüokhei iman-o teman phei jam-e nyoi oklak jingne teman-e monghah.” 24Chingnyu mepu nyupuh kahtalan khongkümpuwe Hamor hei Shekhem niye hanghe juteih pha tüote monge yah, hüyange netanlan khongkümpu chingnyu peten kaiye ongpulan üshei shokhüp.
25Nyih lüm shepupa me, iman maa üne-o manmeipe ngoh wante, Jacob hayim Dinah Ijei Simeon hei Levi ni, yoi yanglow jonyange lowe chingte onge netan khongkümpu toi. 26Iman-e Hamor hei Iha Shekhem ni-o omme toi; tüophei me Shekhem nok mepu Dinah woiyange taimah. 27Toilang yang phei me Jacob hayim ülaolan ngaiye iman ünao wüotüone tamyangpu phuh hahpu ne chingnyu mepu shemin lamphe panne yahtai. 28Iman-e imanjing nyee ükhong hei mahu ükhong hüyange gado ükhong chingnyu me ngohpu hei kah hei phao me ngohpu khongkümpu yahtai. 29Iman-e toinyu nanha khongkümpu yah, shekolan hei nahalan khongkümpu phowe yahyange nok me ngohpu shemin lamphe kiyange tai.
30Hüwante Jacob-e Simeon hei Levi nite i, “Numan-e ü-tang me shangshih yah peitam nangki. Sha-a Kananlan, Perizzlan, hüyange kahmük me ngohpu moilanne üte nulak. Ü-phei kahtalan meiyange yenang, iman khongkümpu ü-phei tüi-e ja ne shüppe shayange üte shümme peima-a, teman noksalan nopu mahtam phalak.”
31Hüpoi iman-e jan-e i, “Toman-e toman ünaowa phwngngam nyu kih-e jonne yetamlak.”
Currently Selected:
KAHTAMYENGHAN 34: KONYBSI
Highlight
Share
Copy
Want to have your highlights saved across all your devices? Sign up or sign in
Konyak Naga Bible - ÜJAO LAITEP
Copyright © 2011 by The Bible Society of India
Used by permission. All rights reserved worldwide.
