JOHN 15

Jesu Ütingpa Wuwüngwu

1 # Isa 5.1-7; Eze 19.10; Mk 12.1-9; Mt 15.13; Rom 11.17. Tao ütingpa wu, hüyange hampa-a Üpa. 2Üme ngohyange ülick yelickpu üqui lili Iye yahtei nang, hüyange ülick lickpulan üqui ülick sheyong she licklak jingne Iye jaowe lingnang. 3#Jn 13.10.Taowe ngaoyangpu ngao kaiye numan shaaji jaoteki. 4#Jn 6.56; 1 Jn 2.6.Üme ngohyah hüyange Tao-o numan phei ngohning. Üwu me yengohküma-a, hangke üquiye ülick yelick ok, hatüokih, ü-phei yengohküma-a, numane-o ülick yelick lak.

5“Tao üwu, numan üquilan. Ao üme ngohnang, hüyange Tao I me ngoh, hatüowe ülick maawe licknang, hangjingne ü-mepu yanne numan-e hango yeling ok. 6Ütam ü me yengohküma-a, peequi lange winpu kih winnang; hüyange wannang, moi yonang, hüyange vünte jakke shunang. 7#Jn 14.13; 16.23; Mt 7.7; Jas 1.5.Numan üme ngohküma-a hüyange ü-ngao numan me ngohküma-a, numan-e hangyin lengyapeih yuyah, hüyange hatüo numante linglak. 8#Mt 5.16.Numan-e ülick maawe lickke, hüyange ütingpa ü pinlan she hüowante Üpa müktishiwa nang. 9Üpawe üte hangke ken Taowe-o numante hüke kennang. Ü yayeng me yelakpe ngohyah. 10#Jn 14.15; 1 Jn 5.3.Hangke Taowe Üpa ngaokeng jon, hüyange I yayeng me ngoh, hatüoke numan-e ü-ngaokeng jonma-a, numan ü-yayeng me ngohlak.

11“Ü-mongmeipu numan me ngohlak, hüyange tüopa mongmei wangngoilak jingne, Taowe numante tüolan ngao yangki. 12#Jn 13.34.Hatüo ü-ngaokeng Taowe numante hangke ken, hüke numan teikenyah. 13#Rom 5.7; Jn 10.11.Kahta jawe yoi shümpa jingne üyin phünne phapu tokte üyongpa kenpu hango yenang. 14#Lk 12.4.Taowe numante phapu ngaokeng numan-e lingma-a, numan ü-shümpalan. 15Taowe shaaji numante shaoshanpa she yenyik; hangjingne yoi nokpupawe hanghe ling hatüo shaoshanpawe yeshing. Hüyangpoi Taowe numante shümpa she nyiknang, hangjingne Üpa mepu Taowe hanghe jai üshei Taowe numante iyangki. 16#Jn 6.70; 13.18; 14.13; 16.23.Numan-e Tao leye ngaipu ne yeje, hüyangpoi Taowe numan leye ngai, hüyange numan taiye ülick licklak jingne hüyange ülick ngohlak jingne Taowe numan le. Tüokhei numan-e ü-min me Üpate hangyin yulakei, Iye numante yahphalak. 17Hatüo Taowe numante ngaokeng phanang: Jawe ja te teikenpu ngohyah.”

Kahtoknyuwe Nupu

18 # Jn 7.7; 1 Jn 3.13; Mt 10.22; 24.9. “Numante kahtoknyuwe nupu ne mengma-a, üte üwangne nuyangpu she numan-e shingyah. 19Numan kahtoknyu jingne mengma-a, kahtoknyuwe I jingte kenhah shepu. Hüyangpoi kahtoknyu mepu Taowe numan lenang, hüyange numan kahtoknyu jing yeje; tüokhei kahtoknyuwe numante nunang. 20#Jn 13.16; Mt 10.24; 1 Kor 4.12; Lam 4.17; 1 Pet 4.14; Ütah 2.3.‘Shaoshanpa ja I nokpu phei sheyongpu yeje;’ she Taowe ipu teihtüoyah. Iman-e üte shaoshi ne tamma-a, iman-e numante-o shaoshi tamphalak; iman-e ü-ngao jai ma-a, iman-e numante-o jai phalak. 21Hüyangpoi ümin jingne iman-e numante tüo lili lingphalak, hangjingne Tao shonpupa iman-e yeshing. 22#Jn 9.41.Tao peiye imante yengao shihma, iman ünu yengoh hahshepu. Hüyangpoi sha-a iman ünu jingne tailak lam yenang. 23Aowe üte nunang, Üpate-o nunang. 24Aowe-o yelingpu toi iman yo me Taowe yeling shihma-a, iman ünu yenanghah shepu; hüyangpoi iman-e ütoishao ngeyangki hüyange Üpa hüyange Tao moini te nu. 25#Tüo 35.19; 69.4.Hüyangpoi iman-e jajangjawe üte nu, she ngaokeng me nyanne ngohpu ngao ngailak jingne tüo ngainang.

26 # Jn 14.16,26; 16.7; 1 Jn 2.1; 5.7. “Hüpoi aope jampupa peilakeih, ütingpa yaha ao Üpa mepu pei; ao Taowe numante Üpa mepu shon, Iye üjingne saki phakülak. 27#Jn 19.35; 21.24; 1 Jn 4.14.Hüyange numane-o ü saki ne menglak hangjingne numan-e ü-phei üwangne muh ngohyangki.”

Currently Selected:

JOHN 15: KONYBSI

Highlight

Copy