JOHN 16

1“Numan leamme taipu mepu yinlak jingne Taowe numante tüoyin ngaoyangki; 2#Jn 9.22; Lam 26.9-11; Isa 66.5.Iman-e numan synagogue mepu teiphalak: Eiyang, aowe numan toilakei, Iye Kahwang toi lingnang she teihlak hipak peiküki. 3Iman-e Üpa jeyah yejema-a Tao jeyah yeshingpuwe tüoyin iman-e linglak. 4Hüyangpoi aope tüoyin ngailak jingne hipak peilakeih, tüolan jingne Taowe ngaopha yangki she numan-e teihtüolak jingne Taowe tüolan ngao numante inang.

“Üwangne muh taowe numante tüoyin ye i, hangjingne Tao numan phei ngoh.”

Yaha Üjao Toishao

5 # Jn 7.33; 14.5. Hüyangpoi Tao sha-a aowe Tao shon I tangte tailak. Hüyange numan aowe-o “Nang hang taiki?” she yetong; 6hüyangpoi Taowe numante tüoyin ngaoyangpu jingne, numan mongjang mongmenge maateki. 7#Jn 14.16,26; 15.26.Hüyangpoi Taowe numante üting inang: numante meilak jingne Tao taipu shemei, hangjingne Tao yetaiküma-a, numan tangte jampupa yepeikülak; hüyangpoi Tao taima-a, Taowe numan tangte I shonlak. 8Aope I peilakeih, Iye kahtoknyu ünu jeng hüyange khakshupu hüyange ngaophünpu saki phalak; 9#Jn 15.22.Hüyange ünu jeng hangjingne iman-e khakshupu jingne üte üting yelak; 10#Lam 3.14; 7.52; 1 Pet 3.18.hangjingne Tao Üpa tangte tainang hüyange numan-e shaaji Tao ye-ngelak; 11#Jn 12.31.hangjingne tüopa kahtoknyu wanglam lampalan ngao phünyangki.

12“Taowe numante yeonge ilak ngohnang, hüyangpoi numan-e tüopa sha-a yenün oklak. 13Hüpoi aope I, ütingpa Yaha, peilakeih Iye ütingpa lam üshei me woiphalak: hangjingne Iye yoi wong phei yengaolak, hüyangpoi Iye hanghe jai Iye ngaolak, hüyange ngoikülak toi Iye numante iphalak. 14#Jn 7.39.Iye Tao müktishiwa tamlak hangjingne Iye numante hanghe ngaolakei Iye üjing hanghe ngoh tüomepu yah lak. 15Üpa me hanghe ngoh üshei üjing; tüokhei Taowe iyangki Iye üjing mepu yahlak hüyange numante iphalak.”

Mongmenga Mongmeipune Lüplak

16 # Jn 14.18-24. “Hipak ütenja ngohyange shaaji numan-e Tao ye-ngelak; hüyange tüophei me hipak üten ja ngohyang phei me numan-e Tao ngelak.”

17I pinlan ütamme hüke teitonge i, “ ‘Hipak üten ja ngohyange, numan-e Tao ye-ngelak; üne-o hipak ütenja phei me numan-e Tao ngelak? Hangjingne Tao Üpa tangte tainang;’ hatüo Iye hangte leppune ipu shi?” 18Tüokhei iman-e i, “ ‘Hipak ütenja ngohyange’, Iye hatüo hanghete leppu? Iye hanghe ngaopuweih teman-e yeshing!” 19Iman-e Ite tonghupu Jesuwe shing, hüyange imante i, “Numan pa me hanghe jeng teitongpu shi? Taowe numante ‘Hipak ütenja ngohyange numan-e Tao ye-ngelak; üne-o hipak ütenja ngohyange numan-e Tao ngelak,’ she iyangpu jingne hei? 20#Jn 20.20.Üting tingha me Taowe numante ipha ning, numan-e shaplak hüyange yoonglak, hüyangpoi kahtoknyuwe mongmeilak; numan-e mongmenglak, hüyangpoi numan mongmeng mongmei ne lüplak. 21#Isa 13.8; Hos 13.13; Mik 4.9; 1 Thes 5.3.Aope sheko jawe moipai ne hipak ngoi, yha mongmeng nang; hangjingne yha shaoshilak hipak ngoipei; hüyangpoi aope naha wangngai nge, yhawe yoi shaoshipu pemah nang, hangjingne nahaja kahtoknyu wangngai ngepu jingne yha mongmeinang. 22Numan-o sha-a mongmenge ngoh nang; hüyangpoi Taowe numan nishe leilak, hüyange numan mongjang mongmeilak, hüyange aowe-o numan mepu mongmei yah yeteilak.

23“Tüonyih numan-e üte hango yetonglak. Üting tingha me Taowe numante ipha ning, numan-e Üpate ü-min me ülam ja nehoi tongma-a hatüo Iye numante yahphalak. 24#Jn 14.14; 15.11.Sha-a ngoipu mongme numan-e ümin me hango mantong (manyu) yutüoh hüyange numan-e tüolak, tüome numan mongmei wangpu oklak.”

Kahtoknyu Tangme Okpu Ngepu

25 # Jn 10.6; Mt 13.34. “Taowe numante ngaoleppu me tüolan ngaoyangki. Hipak ja peiküki aope Taowe numante hüke yengaolak, hüyangpoi Taowe numante Üpa jeng ngaiphaih-e ilak. 26Tüonyih numan-e ü min me yulak, hüyange numan min me Taowe Üpate yupha ning she Taowe ye i. 27Hangjingne Üpa Iye numante kennang, hangjingne numan-e üte ken hüyange Tao Kahwang mepu pei she ütinglak. 28Tao Üpa mepu ngai, hüyange Tao kahtoknyu te peiyangki. Üne-o Taowe kahtoknyu tüoh nang hüyange Tao Üpa tangte tainang.”

29I pinlanne i, “Leiyah! Sha-a nange leppume yengaope, ngaiphaih-e ngaonang. 30Sha-a nange khongküm shingnang she toman-e shingnang, hüyange aowe-o nang te tonglak wongpong ne yeje; tüo kaiye nang Kahwang mepu pei she toman-e jan.” 31Jesuwe imante jan, “Sha-a numan ütinglak nangkü a? 32#Jn 4.23; Mk 14.27; Zekh 13.7.Leitüoh, hipak ja peiküki, hüyange peiteki, aope numan, yoi yoi ching te jaja yanlakei, hüyange ü-shaha tüohlak: hüyangpoi ü-shaha ne yejelak, hangjingne Üpa ü-phei ngoh nang.

33 # Jn 14.27; 15.18; Rom 8.37; 2 Kor 2.14; Ütah 3.21. “Ü-phei numan chingmei ngohlak jingne, Taowe numante tüoyin, ngaonang. Kahtoknyu me numan shaoshilak. Hüyangpoi wongnang yah, Taowe kahtoknyu okyangki.”

Currently Selected:

JOHN 16: KONYBSI

Highlight

Copy