MARK 15

Pilate Sheshao Me Jesu

(Mt 27.1,2,11-14; Lk 23.1-5; Jn 18.28-38)

1 # Mt 27.1-2; Lk 23.1; Jn 18.28. Napning shomme ngengpa üjenglan yeonge mamme jeiyonglan phei, ngaokeng nyüopalan phei, hüyange ngao ipalan üshei phei hüo, hüyange iman-e tüm. Iman-e Jesute sha, hüyange woiye peiye Pilate te pha. 2#Mt 27.11-26; Lk 23.2-3,18-25; Jn 18.29—19.16.Hüyange Pilate-e Ite tong; “Nang Jehudilan ahngpa a?” Jesuwe jan! “Nange hüke inangki.”

3Ngengpa üjenglanne Jesu lamphe li me püohpu pho, 4tüokhei Pilate-e Ite nishe tong: “Nange hango yejanlak a? Leiyah hangshinne iman-e nang püohpu phopu shi!” 5Hüyangpoi Jesuwe ngaopha ja nehoi yejan, hüyange Pilate yashan.

Jesu Line Tampu

(Mt 27.15-26; Lk 23.13-25; Jn 18.39—19.16)

6Sha-a Yinyepu mo hipak lep iye küpnok me ngohpalan yo me ja, kahtalan-e ao yulakei, Pilate lanne teipu wanglam ngoh. 7Barabbas she minpu kahta ja weihkhong phei mop ngaiwante lünmang ngaitampu jingne küpnok me ang. 8Aope ükhong jem hüyange Iye imante üshong me lingpu kihmuh lingpha she Pilate te tong: 9Iye imante janne i! “Taowe numante Jehudilan ahngpa lanne tamhu pu a?” 10Iman müktakpu kaiye ngengpa üjenglanne Ite Jesu phünne phanang she Iye shing. 11#Lam 3.14.Hüyangpoi ngengpa üjenglanne ükhong wukne tamyange, iman-e Barabbas lantampha she Ite kang. 12Ükhong te nishe Pilate-e ngao! “Hümma-a numan-e Jehudilan ahngpa she nyikpupa te taowe hanghe lingne tamhu pu?” 13Iman-e üngwünne janne ye, “I Tangpem me taktüoh!” 14Pilate imante tong, “Hüpoi Iye hanghe ümeng lingyangpu te?” Iman-e shewün shewün she üngwünne i, “I tangpem me eptüoh!” 15Pilate-e ükhong mongmei ne tamhu, tüokhei Iye iman jingne Barabbas lantam. Tüophei me Iye Jesute shetwu jonyang phei me hüyange tangpem me eplak jingne I phünne pha.

Kengphetlanne Jesute Yaole

(Mt 27.27-31; Jn 19.2,3)

16 # Mt 27.27-31; Lk 23.11; Jn 19.2-3. Kengphet lanne I ahngnok te woiye in, hüyange iman-e ülaolan khongkümpu nyikjem. 17Iman-e Jesute takmon nye intam, ühuh pheipu shaoshaoh ling, hüyange shangme shaohtam. 18Tüophei me iman-e salam phawe i, “Jehudilan ahngpa jinlaowe nyoiyah!” 19Hüyange iman-e I shangme shet, Ite iyphao phao, hüyange iman-e yatuh shinge ümme Ite khüm. 20Aope iman-e Ite yaole sho, iman-e takmon nye yah hüyange I inkhek muh inne tam. Tüophei me iman-e I tangpem me taklak jingne woitei.

Jesu Tangpem Me Takpu

(Mt 27.32-44; Lk 23.26-43; Jn 19.17-27)

21 # Mt 27.32; Lk 23.26; Rom 16.13. Sairin mepu Alexander hei Rufus üpa Simon üjai mepu, chingye te yepu iman-e lamme hüo, hüyange iman-e Ite Jesu tangpem pailak jingne kang. 22#Mt 27.33-44; Lk 23.33-39; Jn 19.17-24.Hüyange iman-e Jesu Golgotha she nyikpu nyoite (leppu-Shangwaan nyoi) woipei. 23Tüome iman-e Ite wuwüngti phei ükhah nyityange pha, hüpoi Jesuwe yeying. 24#Tüo 22.18.Tüophei me iman-e I tangpem me tak hüyange iman yo me I jing inkhek tamlak jingne aowe hanghepa yahlak shinglak jingne phongyenge lei. 25Aope iman-e I tangpem me tak, napning tu paji (lüm shepupa ghonda) ne ngoh yangki. 26I phei tüi-e püohpu she hüke nyan: “Jehudilan Ahngpa.” 27Hüyange iman-e Jesu phei kuhlang ni tangpem me tak. Sheja I yakjah yeme, hüyange ülaopa I yaknya yeme, 28(hatüo kih-e “I-o ümenglan phei om,” she ngaolaiye ipu ütingme ngai.)

29 # Mk 13.2; 14.58; Jn 2.19. Hüyange linne taipu kahta lanne, iman ngüm ngok hüyange Jesute phoiye i: “Hei! Nang, aowe yopnok mengyange nyihlüm mongme loilak! 30Sha-a tangpem mepu yutüoh hüyange nang nying nyingke yintüoh!” 31#Tüo 22.7-8.Tüokih muh ngengpa üjenglan hei ngaokeng nyüopalanne Jesute yaole linge iman-e hüke i: “Iye eihalan yin, hüyangpoi Iye yoi yeyin ok! 32Israel ahngpa, Messiah, sha-a tangpem mepu yupute leihah, hüyange teman-e Ite ütinglak hah!” Hüyange Iphei tangpem me takpu niye-o Ite yao.

Jesu Lipu

(Mt 27.45-56; Lk 23.44-49; Jn 19.28-30)

33 # Mt 27.45-56; Lk 23.44-49; Jn 19.28-30. Hüyange nyihning penme ni paji mepu lüm paji ngoiye kahtoknyu üshei me wangnyak ngoi#Wok shepupa ghonda mepu tushepupa ghonda ngoi she kahmük nopute wangnyak pei. 34#Tüo 22.1.Lümpaji hipak me Jesuwe ngao üyong phei ngao, “Eloi, Eloi, Lama Sabachthani? Leppu-Ü-Kahwang, Ü-Kahwang, hangne nange ü-tüohpuweih?” 35Tüome ngohpu kahta ütamme I ngao jai hüyange i, “Jaihu, Iye Elijah te nyiknangki!” 36#Tüo 69.21.Iman yo me ja shekwan me üshi yinglak nyütyange lengju me shayange phet, hüyange Jesu ju ngoiye shunge inyange i, “Hüng angtüoh! Tangpem mepu I yah yelak jingne Elijah peiyashe ne leihah!” 37Hüyange yeonge yonge üngwün yange Jesu lüomah.

38 # Heb 10.19-20. Khümjing me shongpu jhotnye ütang mepu yashong ngoiye ni ne hit. 39#Mk 1.11; 9.7.Hüyange kengphet woipa, ao tangpem phei tinge yonge ngoh, Jesu hangke üngwün hüyange li nge; Iye i, “Hatüo kahta ütingme Kahwang üha yang!” 40#Jn 19.25.Tüome sheko ütamja üjai me leiye ngoh. Iman-a Mary Magdalene, Jeams naolipa hei Joseph ünyu Mary hüyange Salome. 41#Lk 8.1-3.Aope Jesu Galilee me ngoh iman I pheite woi hüyange Ite jampong. Ülao sheko lan-o maawe, I phei Jerusalem te peipu, iman phei omme ngoh.

Jesu Mangmupu

(Mt 27.57-61; Lk 23.50-56; Jn 19.38-42)

42 # Mt 27.57-61; Lk 23.50-56; Jn 19.38-42; Lam 13.29. #Hin 21.22-23.Hatüowa Sabbath shao me tümtapu nyih ne ngoh, hüyange aope ün ngoi, 43Arimathealan Joseph peingoi. I-o ngao ipalan yo me üjengpa ja ne hüyange Kahwang ahngching peilak te leipu yo me ja ne ngoh; hüyange tüonyih-a mo tümpu nyih ne ngoh; tüokhei mongyong puphei Pilate tangte Joseph wen hüyange Ite Jesu mang yu. 44Jesu shaaji liteki she jaiye Pilate yashan. Iye gho ja woipa te nyik hüyange tong Jesu li phei me hipak lintekü a! 45Gho ja woipa mepu ngao jaiphei me, Pilate-e Josephte Iye mang teipu oklak she i. 46Joseph-e nye ükhai ja yahpei, mang yahyei, nye-me yout hüyange long watte lingpu mangkoksa me ang. Tüophei me Iye longkhao üyong jawe mangsate küp. 47Mary Magdalene hei Joseph ünyu Mary lanne leiye ngoh, hüyange Jesu mang ümeken me mu nge.

Currently Selected:

MARK 15: KONYBSI

Highlight

Copy