MARK 16
16
Jesu Yange Yepu
(Mt 28.1-8; Lk 24.1-12; Jn 20.1-10)
1 #
Mt 28.1-8; Lk 24.1-10; Jn 20.1-2. #Lk 23.56; Jn 19.39.Aope Sabbath lin, Mary Magdalene, Jeams ünyu Mary, hüyange Salome lanne Jesu pümte wenne pholak jingne üpi meipu minnga shak. 2Hat me üwangpa nap, shomme wanghe ongpu phei jamshe, iman mangjong te wen. 3Hüyange lamme iman hüke teingao, “Teman jingne mangkoksate küppu long aowe wintam phalak?” 4(Hatüo meiyange khaopu longne ngoh) Tüophei me iman-e leiwante longa nowe epyange nge. 5Tüophei me iman mangkoksa te ong. Naoshe ja nye üheng inyange yak jah yeme shotyange iman-e nge hüyange iman yashan. 6Iye i, “Numan yatah shan, numan-e Nazareth mepu Jesu, ao tangpem me tak tüopa yamnang. Hüpoi I tüome yenang: I yange yeteki! Leihu, iman-e tüome I muyangki. 7#Mk 14.28; Jn 21.1-23; Mt 28.7.Hüpoi sha-a taitüoh hüyange Peter omme I pinlante tüopa ngaolan phatüoh. ‘Numan shaote I Galilee te tainang; tüome Iye numante hangke i, hüke ngelak.’ ” 8Tüophei me iman yu hüyange mangjong mepu phet, hangjingne nyampu hei yashanpu iman me ngoh. Hüyange ao te-o iman-e hango ye i, hangjingne iman nyam.
(Üwang yeme nyanpu ülangpa sakilan me Mark 16.9-20 yenang).
Mary Magdalene Tangte Jesu Ngai
(Mt 28.9-10; Jn 20.11-18)
9Sha-a Jesu lipu mepu yange yephei me, hat me üwangpa nap, I Mary Magdalene tangte üwangne ngai, ao mepu laa nyit ngoiye Iye jange tei. 10Yha tai hüyange yha phei jampalan aoyin shappe ngoh imante i; 11hüyange aope Jesu yange yeteki, hüyange yhawe ngeyangki she yha mepu iman-e jai, yhate iman-e ütingyelak.
Pinlan Ni Tangte Jesu
(Lk 24.13-35)
12Tüophei me Jesuwe pinlan ni chingyete taiye ngohwante nyoingoh ülaone ngaiye hüo. 13Iman leihye-e hüyange ülao lante i, hüpoi tüote iman üting yelak.
Jesuwe Pinlante Nyingtampu
(Mt 28.16-20; Lk 24.36-49; Jn 20.19-23; Lam 1.6-8)
14Üküm ne iman hah ngohwante pinlan penme ja tangte Jesu ngai, Iye imante tee, hangjingne iman me ütinglakpu yenang hüyange I ngeyangki she ipalante üting yelakpe üngei ne mengpu jingne! 15Hüyange Iye imante i; “Kahtoknyu üshei te taitüoh hüyange kahtanyuha üshei te pungao ümei nyüotüoh. 16Aoyinne ütinglak hüyange bapti yinlak, hüyangpoi aoyinne üting yelak lakei iman winlak. 17Ütinglakpalante tüopa yepinlakpa (kahnyingwüngha üngan wong) phalak. Iman-e ü-min me laa janglak; iman-e ngao üla ngaolak; 18Iman yak me pu jonyapoi yejema-a, lilak soihüng yingyapoi, imante hangko yesheilak; iman-e dakpalante yakke jonlak, hüyange iman meilak.”
Jesu Wangte Ün
(Lk 24.50-53; Lam 1.9-11)
19Iman phei Youngwanpa Jesuwe ngaoyang phei me, I wangte woi ün hüyange Kahwang yak jah yeme shot. 20Pinlan tai hüyange kenphe me konnyüo, hüyange Youngwanpawe iman phei toiling hüyange imante kahnyingwüngha wong phapu kaiye iman-e nyüopu üting she hüo. Amen.
Lai Ülang Ütamme Hüke Lakpu Ngenang
(9 Shekolan Peter hüyange I shümpalan tangte tai hüyange imante ngaopulan üshei ünunglange imante i; Tüophei me, Jesuwe I muh yoi pinlan kaiye, wanghe ongjing mepu nyipjing ngoiye lowe angpu hüyange jinte ngohpu yemahyemee yinyepu ngaolan-a shonne tei.)
Currently Selected:
MARK 16: KONYBSI
Highlight
Share
Copy
Want to have your highlights saved across all your devices? Sign up or sign in
Konyak Naga Bible - ÜJAO LAITEP
Copyright © 2011 by The Bible Society of India
Used by permission. All rights reserved worldwide.
