ROME 3
3
Kahwangpa Meimapu
1Hümma-a Jehudilan ne mengpu me hanghe ünyei ngohnang shi? Yejema-a shokhüppu küw hanghe ne menglak? 2#Tüo 147.19; Rom 9.4.Ülam lilime yeonge? Üwangne, imante Kahwange ülangpa nyanpu pha.
3Hangjingne ütam-e üting yelakma-a, hangke? Iman üting yelakpu kaiye Kahwang monghümpu jajang japune menge tamlak a? 4#Tüo 51.4.Hüke aope-o yeje: Kahta lili ngaoleih me ngoh yapoi, Kahwang-a ngaoting me minngoh yah. Nyanne ngohpuke:
“Nange aope ngaolakei nanga tinge ngohnang she hüolak yang;
Hüyange nang aope ngaophün jingme peilakeih nange oklak yang.”
5 #
Rom 5.9; 6.19; 1 Kor 9.8; Gal 3.15. Hüyangpoi teman yejaopuwe Kahwang ütingpa minyonge ngaoma-a teman-e hanghe ilak? Kahwange ünupate shangne tamma-a, I yejaope ngohlak a? (Taowe kahta wanglam me ngaonang) 6Hüke aope-o yeje! Hüke nangma-a, Kahwange hangke kahtoknyu ngao phünlak?
7Hüyangpoi ü-tahleih ngao kaiye ngaotingpa Kahwang Ite müktishiwa phama-a, taowe hangne üne-o ünupa ja ke ngao phünnangpu shi? 8#Rom 6.1,15.Hüyange, “Ümei ngailak jingne ümeng linghah, she hüma-a hangne hüke ye-ipu?” Hatüo ngao toman-e inang she ütam-e ngaonang, hüyange phoiwümpu ngao inang. Iman-e lingpuke, imante yaolene tamlak.
Kahta Ao-o Khakshupu Yenang
9 #
Rom 1.18-32; 2.1-29; 11.32; 3.23. Hümma-a hanghe? Yinhulan yafün phei teman Jehudilan yafün shemeipu a? Yeje, hanghe me-o yeje! Hangjingne Jehudilan hei Yinhulan moini ünu phangme ngohnang she taowe üshong memuh yeine tamyangki. 10#Tüo 14.1-3; 53.1-3.Nyanne ngohpuke:
“Ao-o khakshupu yenang, yenang, ja nehoi yenang;
11shinge okpu ao-o yenang,
Kahwang yampu ao-o yenang.
12Üshei ünyong yete tai, iman jamme ünyong yete tai;
ümei lingpu ao-o yenang, ja nehoi yenang!”
13 #
Tüo 5.9; 140.3. “Iman üng mangjong eppuke,
iman-e iman yee lowe tamne jon.”
“Iman jupen me pu üliükai (soihüng) ngohnang.”
14 #
Tüo 10.7. “Iman ju phoiwümpu hei ükhah maa ngohnang.”
15 #
Isa 59.7-8. “Iman ya iy ngailak jingne mam,
16iman jongelamme mengpu hei shangshih toitai ngohnang;
17hüyange iman-e chingmei lamnyu yeshing.”
18 #
Tüo 36.1. “Iman mükshaome Kahwangte nyampu yenang.”
19 #
Rom 2.12. Ngaokenge hanghe i, tüolan-a ngaokeng phangme ngohpalante inang she; hüke ju lili büanglak jingne hüyange kahtoknyu me ngohpu üshei Kahwang ngao phünpume peilak she teman-e shingnang. 20#Tüo 143.2; Lam 13.39; Gal 2.16; 3.11; Rom 7.7.Tüokhei ngaokeng jonpuwe kahtanyuha ao-o I sheshao me meiye yeling, hangjingne ngaokeng kaiye ünu shingpu pei.
Ütinglakpuwe Tingtamnang
21 #
Rom 1.17; Phi 3.9; 2 Pet 1.1. Hüpoi sha-a Kahwang khakshupu ja ngaokeng ye-ompe ütahte ngaiteki, ngaokeng hüyange hipalanne tüojingne saki phayapoi, 22#Rom 4.5; 9.30; 10.12; Gal 2.16.Kahwang khakshupupa-a Jesu Khrista kaiye mengpalan üshei jingne ngohnang. 23#Rom 3.9.Hangjingne üsheiye ünu omyangki hüyange Kahwang müktishiwa yeyüo ok. 24#Rom 4.16; 5.9; Eph 2.8; Tit 3.7; Eph 1.7; Kol 1.14; Heb 9.15.Hüyangpoi Khrista Jesu me hanghepa yinyetampu ngohnang, hatüo kaiye I shüpsheye iman jajangjawe tingetam. 25Aowe I iy kaiye ütinglak, I yahlak jingne Kahwange dopu ja ne pha, hatüowa Kahwang khakshupu hüolak jingne, hangjingne Kahwange I nün okpu kaiye lintepu hipak me jonpu ünu winyangki. 26#1 Jn 2.2; Kol 1.20.Hüke, sha-apu hipak me Kahwange I khakshupu hüolak jingne, hüyange I nying nyingke Üjao me ngohlak jingne, hüyange aoyinne Jesute ütinglak Kahwang phei tinge tampu kahta ja ne Iye lingetam.
27Hüma-a yongelüopa ümme ngohnang? Tüo yenangpe taiteki. Hangkihpu ngaokenge? Ngaokeng toishao hei? Yeje, hüyangpoi ütinglakpu ngaokenge. 28#Lam 13.39; Rom 5.1; Eph 2.9.Hangjingne ngaokeng toi ye-ompe kahta ja ütinglakpuwe tingetam nang she teman-e shing. 29#Rom 9.24; Lam 10.34-35.Yejema-a Kahwang-a Jehudilan Kahwang hei a? I yinhulan Kahwangne-o yeje pu a? Jenang, yinhulan Kahwangne-o. 30#Rom 4.11-12,16.Hangjingne Kahwang ja ne hei menge, iman ütinglakpu phei phinne shokhüppulan tingetamlak, hüyange shoyekhüppulan iman ütinglakpu jingne tingetamlak. 31#Rom 8.4; Mt 5.17.Hümma-a ütinglakpuwe teman-e ngaokenga jajang japune mengtampu a? Yeje, teman-e ngaokeng mongne tamnang.
Currently Selected:
ROME 3: KONYBSI
Highlight
Share
Compare
Copy
Want to have your highlights saved across all your devices? Sign up or sign in
Konyak Naga Bible - ÜJAO LAITEP
Copyright © 2011 by The Bible Society of India
Used by permission. All rights reserved worldwide.
