ROME 2
2
Kahwangpawe Khakshuwe Ngaophünpu
1 #
Rom 14.22. Tüokhei, nang, ngaophünpa nang, ao ne jelakei jeyapoi, nange janlak yenang. Hangjingne eiha ngao phünwante nange nang nying nyingke ünu omnang, hangjingne nang ngaophünpa, nange tüoyin jakihmuh jonnang. 2Hüyange tüolan jonpalan phei tüi-e Kahwange ngaotingpa phei ngao phünnang she toman-e shing. 3Hüyange O kahta, nang aowe tüolan jonpalan ngao phünnang, hüyange nange hükemuh jonnang, hüyange Kahwang ngao phünpu mepu yin oklak she teih nang kü a? 4#Eph 1.7; 2.7; Phi 4.19; Kol 1.27.Yejema-a Kahwang meipu kaiye nang mong lüplak yete woinang she yeshingpe, nange Kahwang meipu hüyange tükke okpu hüyange nün-okpu toinyu iye yeteihpu a?
5Hüyangpoi nang mongjang wanpu hüyange yelüppu mongjang shange, Kahwange aope I üjaopa ngaophünpu hüyange mongshih ngaipu ütahte ngailak, tüopa nyih jingne yoi jingne nange mongshih ngaipu yoyah. 6#Mt 16.27; 1 Kor 3.8; 2 Kor 5.10; Ütah 22.12.Kahwange kahta lilite yoi toishao shange leihphalak. 7Aoyinne nün-okpu phei meiye lingpu me müktishiwa, minyongpu hüyange yemahlakpa yamnang, imante jintepu üyin Iye phalak. 8Hüpoi taishopalan, hüyange aoyinne ngaotingpa te ngao yejai, hüyangpoi yejaopupate ngaojai, imante Iye mongshih ngaipu phalak. 9Ümeng lingpu kahta lilite, hüke üwangne Jehudilan tangte hüyange Greeklan tangte-o Iye shaoshi yateng hüyange shaoshi pongpu shonlak. 10Hüyangpoi ümei lingpu kahta üsheite, hüke üwangne Jehudilante hüyange Greeklan te-o yoi müktishiwa hüyange minyongpu hüyange chingmei phakülak. 11#Hin 10.17; 2 Put 19.7; Gal 2.6; Eph 6.9; Kol 3.25; 1 Pet 1.17.Hangjingne Kahwange kahta sheta yelei.
12 #
Rom 3.19; 1 Kor 9.21. Hangjingne hangshinne ngaokeng yenangpe ünu omyangki iman ngaokeng yenangpe mahne tamlak, hüyange hangshinne ngaokeng phang me ünu omyangki iman ngaokenge ngao phünlak. 13#Jas 1.22-23,25.Hangjingne Kahwang sheshao me ngaokeng jaipalan khakshupu ne yeje, hüyangpoi aoyinne ngaokeng jonnang, iman tingtamnang. 14Hangjingne aope ngaokeng yenangpu Yinhulanne nyoingoh wanglamme ngaokeng toishaolan jonnang, iman ngaokeng yenangyapoi iman jingne ngaokeng ne tüopa mengnang; 15hangjingne iman-e ngaokeng toi-a iman mongjang me nyanne ngohpu hüonang, iman kenmonge tüopa phei saki phanang, hüyange iman juteih jawe ja te teisheng nang yejema-a ümeng teiwinnang. 16#Kon 12.14; Rom 16.25; 1 Kor 4.5.Aope Kahwange taowe nyüopu pungao ümei kih Jesu Khrista kaiye kahtalan mongjang me lowe teipu juteih ngao phünlakei, tüonyih me ngaokeng jonne ngohpalan tingetamlak.
Jehudilan Hüyange Ngaokhüm
17Hüyangpoi nange Jehudilan min yahküma-a, hüyange Ngaokhüm te monghümma-a, hüyange Kahwang te yongelüoma-a, 18#Phi 1.10.hüyange Iye mongpu nange shingma-a, hüyange nange hanghe ngaolan shemeipupa tüolan yahlak jingne shingma-a, hangjingne nanga Ngaokhüm me ngohlak jingne nyüoyangpu khei, 19hüyange nanga mükpompa jingne woipa she shingma-a, hüyange wangnyak me ngohpalan jingne wangngai, 20#Rom 6.17; 2 Tim 1.13.hüyange üngapa tinge ye-e tampupa, hüyange nahalan konnyüopa, hüyange nange Ngaokhüm me shingpu hüyange ngaoting tüowe, 21#Mt 23.3-4.hüwante nang aowe eihate nyüonang, nange nang nying nyingke yenyüo a? Nange kahta ja te konnyüo yange, nange kuhnang kü a? 22Nange kahta jate phwngngampu yejonlak iyange, nange phwngngampu jonnangkü a? Nange moungte nu ma-a, nang khümjing me ngohpu toinan kuhleih-e yahnangkü a? 23Nang aowe Ngaokhüm me yongelüo, nange ngaokeng menge Kahwangte ye-i-yeshe nangkü a? 24#Isa 52.5.Hangjingne nyanne ngohpu ke, “Numan jingne muh Yinhulan yo me Kahwang min phoiwüm nang.”
25 #
Jer 9.25. Nange ngaokeng jonma-a, shokhüp pume ütingme küw ngohnang, hüyangpoi nange ngaokeng mengpa ja ne mengma-a, nang shokhüppuwa yekhüppu ne menglak 26#1 Kor 7.19; Lam 10.35.Tüokhei, shoyekhüppu kahta jawe ngaokeng me ngohpu jonma-a, I shoyekhüp puwa shokhüppu ne ye-ilak a? 27#Mt 12.41.Hüyange nang aowe nyanpu ngaokeng hüyange shokhüp yangpu ngoh, nang ngaokeng mengpa ja ne mengma-a, hüyange wanglam me yekhüp pupawe ngaokeng jonpu ne mengma-a, Iye nanga ngao yephünlak a? 28#Mt 3.9; Jn 8.39; Rom 9.6-7; Gal 6.15.Hangjingne ao ütok me Jehudilanne meng, I Jehudi ne yeje; yejema-a meime shokhüp puwa khüppune yeje. 29#2 Kor 3.6; Phi 3.3; Kol 2.11; 1 Pet 3.4.Hüyangpoi ao ümongpa me Jehudi ne meng, I Jehudilan; hüyange shokhüppu nyanpu ngaokeng me yeje, hüpoi mongjang me hüyange yaha me ngohnang. Hüyange tüopa kahta minyongpuwa kahta mepu yeje, hüpoi Kahwang mepu ngohnang.
Currently Selected:
ROME 2: KONYBSI
Highlight
Share
Compare
Copy
Want to have your highlights saved across all your devices? Sign up or sign in
Konyak Naga Bible - ÜJAO LAITEP
Copyright © 2011 by The Bible Society of India
Used by permission. All rights reserved worldwide.
