ROME 7
7
Naoyhapoipume Ngaoleppu
1Jeiheinaolan, taowe numan ngaokeng shingpalan phei ngaonang she, hangjingne hangshin kahta üyin ngohlakei, hüshinne ngaokenge I tangme wanglam lamnang she numan-e yeshing a? 2#1 Kor 7.39.Leppu ja me netanpa ngohpu sheko ja yoi netanpa üyin me ngohwante ngaokenge netanpa phangte shinyange ngohnang, hüpoi netanpa lima-a, netanpa ngaokeng mepu yha lanteki. 3Tüokhei, netanpa üyin ngohwante yhawe ülao netan tangte taima-a, yha phwngngamnyu she nyiklak. Hüyangpoi netan lima-a, yha ngaokenge shinyange yeje, hüyange yha ülao japhei toitaima-a phwngngampu ne yeje.
4 #
Rom 6.2,11; Gal 2.19; Kol 1.22. Tüokhei Ü-jeihei naolan, teman Kahwangte ülick phalak jingne, numan lipu mepu yange yepupa jing, hüke lipu mepu yepupa phei ja ne menglak jingne, numan-o lipu Khrista püm kaiye ngaokeng jingne li ne tam. 5#Rom 6.13,21; 8.8; Jas 1.15.Aope teman iymei me muh ngoh, ngaokeng kaiye peipu ünu yejaoyeshapuwe teman püm ümük ja me lipupa jingne ülick licktam ne toiling. 6Hüyangpoi hangheyin me teman shayange ngoh, tüopa ngaokeng mepu sha-a teman lanpu tüo: Tüokhei teman nyanpu ngaokeng ülangpa me yeje, hüpoi üyin üla Yaha me shaoshan nang.
Ünu Phei Pongpu
7 #
Rom 3.20; 5.20; Woi 20.17; Hin 5.21. Hümma-a teman-e hanghe ilak? Ngaokenga ünu a? Hüke aope-o yeje! Tüoyangpoi, ngaokeng yenang shihma-a taowe ünuwa hanghe yeshinghah shepu. Hangjingne, “Nange tahwau,” she ngaokenge ye-i-shihma-a taowe waupu yeshinghah shepu. 8#1 Kor 15.56.Hüyangpoi ünuwe ngaokeng yeinetam-e ngaolak ülam tüowe, waupu ülam khongküm üte hengne wang, hangjingne ngaokeng mepu yanne ünuwa lipu ngohnang. 9Hüyange tao hipak ja me ngaokeng mepu yanne üyin me ngoh, hüpoi ngaokeng peiwante ünuwa üyin ne ye; hüyange tao li; 10#Lev 18.5; Rom 10.5.hüyange ngaokeng hanghepawe tao üyin lamnyu me woilak ne ngoh, hatüowe tao lipu lamnyute woi. 11Hangjingne ünuwe ngaokeng kaiye ngaolak ülam tüowe, tao lowe tam, hüyange ngaokeng kaiye tao toitam. 12#1 Tim 1.8.Tüokhei ngaokenga üjao hüyange phapu ngaokengo üjao, üting hüyange shemeipupa.
13Hümma-a hanghe shemeipupa hatüowe tao lipu ngaitampu a? Hüke aope-o yeje! Hüpoi ünuwa ünu üja she hüolak jingne, hüyange ünuwa meiyangpu ünu she ngetamlak jingne hanghepa meipupa ngoh; hatüo kaiye ünuwe üte lipu ngaitam.
Wanglam Ni Phei Pongpu
14 #
1 Kor 3.1. Ngaokenga yaha she teman-e shingnang; hüpoi tao, ünupa rhane yüotampu hangko kahta. 15#Gal 5.17.Hangjingne taowe hanghe lingnang hatüo taowe yeshing, hangjingne taowe hanghe lingne mongnang hatüo yeling; hüpoi taowe hanghe nu hatüo taowe lingnang. 16Hüpoi taowe hanghe lingne yemong hatüo taowe lingma-a, ngaokenga meinang she taowe jannang. 17Tüokhei shaaji hatüowa taowe yeling, hüpoi üme ngohpu ünuwe hatüowa lingnang. 18Hangjingne üme, hüke ü-meime hanghe ümei-o yenang she taowe shing; hangjingne monglak jingne üme ngohnang, hüpoi hanghepa ümei tüopa linglak üme yenang. 19Hangjingne taowe hanghe ümei linglak jingne mongnang hatüo yeling, hüpoi hanghe ümeng taowe yelinghah shepu hatüo taowe lingnang. 20Hüyangpoi taowe hanghe yemong hatüo lingma-a, hatüowa taowe yeje, hüpoi üme ngohpu ünuwe lingnang.
21Tüokhei tao, aowe ümei linglak jingne mongnang, ü-phei ümengpa omme ngohnang she tüopa ngaokeng taowe ngenang. 22#Tüo 1.2.Hangjingne ü-mong ümongpa me taowe Kahwang ngaokeng me mongmei, 23#Gal 5.17.hüpoi ülao ngaokeng ja ü-püm mük me taowe ngenang. Hatüowe ü-ken heimong ngaokeng phei tüi-e hoknang; hüyange hatüowe üpüm mükja me ngohpu ünu ngaokeng phangme tao phowe angpa ja kih-e yahpei. 24#Rom 6.6; Kol 2.11.O, tao hangke shangshih mongmengpu kahta! Hatüo lipu püm mepu aowe tao yinlak? 25Teman Youngwanpa Jesu Khrista kaiye taowe Kahwang min yongnang! Tüokhei taowe ü-nying nyingke ü-kenmonge Kahwang ngaokeng ütingme shaoshan nang, hüpoi ü-iy meiye ünu ngaokeng shaoshan nang.
Currently Selected:
ROME 7: KONYBSI
Highlight
Share
Compare
Copy
Want to have your highlights saved across all your devices? Sign up or sign in
Konyak Naga Bible - ÜJAO LAITEP
Copyright © 2011 by The Bible Society of India
Used by permission. All rights reserved worldwide.
