ROME 8
8
Yaha Me Üyin
1 #
Rom 5.16. Tüokhei sha-a Khrista Jesu me aoyin ngohnang iman jingne ümeng phapu yenang. 2#1 Kor 15.45; Rom 6.14,18.Hangjingne Khrista Jesu me üyin Yaha ngaokenge tao ünu hüyange lipu ngaokeng mepu lanne tam. 3#Lam 13.39; Heb 7.18; 10.1-2; Phi 2.7; Heb 2.14.Mei wong yenangpuwe ngaokenge hango yeling ok. Tüokhei Kahwange yoi Ha ünu mei lepume hüyange ünu jingne dopu ja leye shonne, Iye meime ünu yeine tam. 4#Rom 3.31; Gal 5.16,25.Hüyange ngaokenge mongpu teman me ngaitamlak jingne, aoyinne teman kahtoknyu wanglam-e mongpuke yewoipe yaha mongpute woi, tüolan jingne Iye tüopa ling.
5 #
Gal 5.19-25. Hangjingne aoyinne mei pheite woinang iman-e meijeng teihnang, hüpoi aoyinne Yaha pheite woinang iman-e Yaha jeng teihnang; 6#Rom 6.21; 8.13,27; Gal 6.8.Hangjingne meijeng teihpuwa lilakpa ngohnang, hüpoi Yaha jeng teihpuwa üyin hüyange chingmei. 7Hangjingne meijeng teihpuwa Kahwang phei wepa ngohnang; hangjingne hatüowa Kahwang ngaokeng phangme yenang, ütingme I yengoh oklak; 8#Rom 7.5.hüyange aoyin meime ngohnang, iman-e Kahwang mongmei ne yetam oklak.
9 #
1 Kor 3.16; 6.19; 2 Kor 6.16; 2 Tim 1.14. Hüpoi Kahwang Yaha numan me ngohma-a, numan mei me, yeje hüpoi Yaha me ngohnang. Hüpoi ao me Khrista Yaha yenang, Iya I jingne yeje. 10#Gal 2.20; Eph 3.17.Hüpoi numan me Khrista ngohma-a, ünu jingne püm-a ümang ngohnang; hüpoi khakshupupawe numan Yaha-a üyin me ngohnang. 11#Jn 5.21.Aowe Jesu lipu mepu yange yene tam I Yaha me ngohma-a, Jesu Khrista lipu mepu yange yetampupawe numan me ngohpu I yaha kaiye numan lilak pümte-o üyin phakülak.
12Tüokhei, jeiheinaolan, teman pheeisea shümlakpalan, hüyangpoi meiye mongpuke ngohlak jingne, meite yeje; 13#Rom 8.6; Kol 3.5.hangjingne numan mei mongpuke ngohma-a, numan lilak; hüpoi Yahawe püm wanglamlan toine tamma-a, numan üyin ngohlak. 14#Gal 5.18.Hangjingne hangshin Kahwang yaha kaiye woinang, iman Kahwang hayimlan ngohnang. 15#Rom 9.4; Gal 4.5-7; Mk 14.36.Hangjingne numan-e üne-o nyamtamlak rha yaha yatuhshao yeyah; hüpoi numan-e Kahwang yoi üha, hangheye teman-e “Abba! Opa!” she nyik, tüopa yaha numan-e yah. 16#Lam 5.32.Teman Kahwang hayim she Yahawe yoi nying nyingke teman yaha phei saki phanang; 17#Gal 3.29; 4.7; 2 Kor 1.5,7; 2 Tim 2.12; 1 Pet 4.13.hüyange teman hayim ne mengma-a, hümma-a teman mothleipalan; hüke I phei teman müktishiwa tamlak jingne teman-e I phei shangma-a, teman Kahwang mothleipalan hüyange Khrista phei mothleipalan ngohnang.
Ngoikülak Müktishiwa
18 #
2 Kor 4.17; Kol 3.4; 1 Pet 5.1. Sha-apu hipak me teman shangpuwa, hanghepa müktishiwapu temante ütahte ngaitamlak ne ngoh, tüopa phei phünlak yewang she taowe teihnang. 19#1 Pet 1.7,13; 1 Jn 3.2.Hangjingne linge ngaipu shemin lamphe toishao üsheiye Kahwang ühalan ütahte ngaipu yeonge yoonge tannang. 20#Kon 1.2.Hangjingne lingengaipu toishao üshei yoi mongpuwe yengai, hüpoi aowe lingengaipu toishao üshei jajang japune mengtam, Iye tüopa ling. Hüpoi hatüo me monghümpu ngoh; 21#Lam 3.21; Rom 6.21; 2 Pet 3.13; Ütah 21.1.hangjingne lingpu toilan üshei mahlakpa shapu mepu lanpu ngeye Kahwang halan müktishiwa tangte woilak.
22 #
Jer 12.4,11. Hangjingne lingengaipu toilan üshei wong me jamshe sha-a ngoiye pongnang hüyange toinan nang she teman-e shingnang; 23#2 Kor 1.22; 5.2,4; Gal 5.5.hüyange tüolan shaha yeje, hüpoi teman-o, aoyinne Yaha üwangpa ülick ngoh, teman Kahwang yoijing hayimlanke menglak, hüke teman püm yinlak jingne tanne teman-e yoi nying nyingke toinan nang. 24#2 Kor 5.7; Heb 11.1.Hangjingne teman tüopa monghümpu me yin. Hüpoi ngepu monghümpuwa monghümpu yeje, hangne! Hanghe ngenang tüo jingne aowe monghüm nangshi? 25Hüpoi teman-e hanghepa üne-o mannge tüopa jingne monghüm ma-a, teman-e tüojingne nün okpu phei tannang.
26Hüyange hüke muh Yahawe teman ye-ok yeshangpu püonang, hangjingne teman-e hangke yoplak wongpong hatüo yeshing. Hüyangpoi Yahawe yoi nying nyingke teman jingne ye-i-okpu khahkopuwe tongne tamnang; 27#Tüo 139.1-2; Lk 16.15; Ütah 2.23; Rom 8.6,34.hüyange aowe kahta mongjang te yamnang Iye Yaha mong shingnang; hangjingne yahawe Kahwange mongpuke üjaolan jingne tonge tamnang.
Okpulan Phei Nehoi Shetahpu
28Kahwangte kenpalan aoyin Iye mongpuke kem-e ngohnang iman shongme toi üshei jam-e ümei jingne teiling nang she teman-e shing. 29#Rom 9.23; 11.2; 1 Pet 1.2,20; Eph 1.5,11.Hangjingne jeiheinao maapu yo me Kahwang Üha üwangne puhpu ne menglak jingne, Kahwange aoyin üshong memuh shing, iman I ha leye menge tamlak jingne Iye üne-o iman nying yangki. 30Hüyange aoyin Iye nyingyangki, Iye iman nyik; hüyange aoyin Iye nyik, Iye üne-o iman tingetam; hüyange aoyin Iye tingetam, Iye üne-o iman müktishiwa ne tam.
31 #
Tüo 118.6. Hümma-a tüolan jeng teman-e hanghe ilak? Kahwang teman jingne ngohma-a, teman phei tokteipu ao ngohlak? 32#Jn 3.16; Rom 4.25; 5.8.Aowe yoi Ha yetükpe teman üshei jingne I phünne pha, Iye temante I phei üne-o üshei ja jang jawe yephalak a? 33#Lk 18.7; Isa 50.8-9.Aowe Kahwange leyangpulan te ümeng phapu oklak? Kahwange tingne tamyang phei! 34#Rom 8.27.Aowe ümeng phapu? Khrista Jesu ao li, eihyang, hüpoi lipu mepu yange ye, hüyange ao Kahwang yakjah yeme shotte ngohnang, Iye teman jingne yoppe tongnang! 35Khrista yayeng mepu teman aowe yantamlak shi? Shangepongpu, yejema-a shangnetampu, yejema-a seanyao yenglepu, yejema-a pümkeng, yejema-a wengtuh, hei yanglow tüolanne oknang kü a?
36 #
Tüo 44.22. Nyanne ngohpu ke: “Nang jingne toman nyihlao hipak li pongnang; toilakpa nyeehake tomante toitei.”
37 #
1 Kor 15.57. Yeje, tüoyin üshei me aowe temante ken I kaiye teman-a okpalan phei nehoi shetahpu. 38Hangjingne lipuwe jeyah, üyin jeyah, wangdang shongmokpalanne jeyah, wanglam lampalanne jeyah, sha-a ngohpu toinan ne jeyah, ngoilakne ngohpalanne jeyah, ünganwonge jeyah, 39ütangme ngohpune jeyah, ümong me ngohpu ne jeyah, ülao lingengaipu toine jeyah, teman Youngwanpa Khrista Jesu me ngohpu Kahwang kenpu mepu teman yantamlak ye-oklak, she taowe ütingme ütinglak nang.
Currently Selected:
ROME 8: KONYBSI
Highlight
Share
Compare
Copy
Want to have your highlights saved across all your devices? Sign up or sign in
Konyak Naga Bible - ÜJAO LAITEP
Copyright © 2011 by The Bible Society of India
Used by permission. All rights reserved worldwide.
