Ifyacitilwe 13

1Lomba eko ŵali kuAntioke mwikelesya ilyali uko, aŵakusimika neŵasambisi Banaba naSimyoni uwailicilwe ati niNiga, naLuco uwakuKulene, naManaeni uwalelelwe pamo naElode impemba, naSaulu. 2Peŋka ili ŵalukupyunjila ŵaSikulu, nekulukukane'fyakulya, lomba Umupasi Uswetelele walilaŵile kuli ŵo ati: Banaba naSaulu mulekane naŵo pakuti pali neŵo, ŵakacite'milimo iyo iyi naŵasalulwila. 3Popele apo, pakusilo'kulikanyo'kulya, nekutembela, nekuŵatintila-po iminwe yaŵo, ŵaliŵatumine.

4Fyopele'fyo ŵo, aŵatuminwe kuMupasi Uswetelele, ŵaliile kuSelukea; pakufumo'ko ŵaliile mubwato kuKupilo. 5Peŋka, ili ŵali kuSalami, ŵalitulisye Isiwi lyaŵaLesa mumasunagoge aŵaJuda. Kaŵili ŵali naYoane umuntu waŵo. 6Popele, pakupita pansumbu yonse, nekufika kuPafo, ŵalisanjile umuntu umbi uwabwaŋga, uwakusimika uwakutumpaika, umuJuda, isina lyakwe niBayesu; 7uyo wali nemwikalicisi Sajo Paulu, umuntu wakalaŋgo. Uyo aliitile Banaba naSaulu, nekufwayo'kumfwa Isiwi lyaŵaLesa. 8Sombi Eluma, uyo uwabwaŋga (pakuti isina lyakwe elyelyo pakwaluka), aliŵacicile, alukufwayo'kumulu fya umwikalicisi kukucetekela. 9Sombi Saulu, uwailicilwe limbi ati niPaulu, aliiswile Umupasi Uswetelele, nekumutontomeka, 10nekulaŵila ati: Wewiswile ifyakutumpaika newuŋgwa ŵonse, wemwana wamusensesi, wemupate wafiluŋgeme fyonse, tokacileko'kusendeka insila syaŵaSikulu isiluŋgeme? 11Pano ŵona, ukuŵoko kwaŵaSikulu kuli pali weŵo; ulukuŵa nimpofu, teti uŵone-po akasuŵa impindi imbi! Impindi iyo yopele paliponene pali ye kamfwa nemfinsi; naye alukwenda-enda ili afwaya aŵakumuku lika-ko. 12Naye umwikalicisi, pakuŵone'fyo ifyacitilwe, walicetekele, pakuti walukukaŋkamana paŵusambisi bwaŵaSikulu.

13Peŋka Paulu neŵaŵyakwe ŵaliimine mubwato ukufuma kuPafo, nekufika kuPaga mucalo caPamfulya; sombi Yoane alilekene naŵo nekubwelela kuJelusalemi. 14Sombi ŵo, pakupitilila kuPaga, ŵalificile kuAntioke uwakuPisilya; naŵo ŵaliinjile mwisunagoge pakasuŵa kasabata, nekwikala. 15Popele, pakusilo'kupenda'mafunde nefyaŵakusimika, impemba syamwisunagoge syalitumine amasiwi kuli ŵo ati: Mweŵakwasu, kani muli nemasiwi akufunda aŵantu, kamulaŵila!

16Peŋka Paulu aliimakene, nekucilika kukuŵoko nekulaŵila ati:

Mweŵantu ŵaŵaIsilaeli, namweŵo mwemulukutonda ŵaLesa, umfweni! 17ŴaLesa ŵaŵantu aŵa aŵaIsilaeli ŵalisalulwile ŵawisifwe, nekuŵacindika aŵantu, ili ŵaikele mucalo caIjipiti; popele kucitala ŵaliŵatanjilile ukuŵafumya-mo mulya. 18Popele apo imyaka koti makumi ane ŵalukwalelesa amekalilo aŵo akatesye mumpaŋga, 19Peŋka pakusilo'konala imikoka yaŵantu isanu naiŵili mucalo caKanani, ŵaliŵapyanicile icalo caŵo imyaka koti myanda ine nemakumi asanu. 20Panuma yafintu ifyo, ŵaliŵapele neŵakusololola ukufika nakuli Samweli uwakusimika. 21Pantanjile ŵalilombele imfumu; naŵo ŵaLesa ŵaliŵapele Saulu, umwana wakwe Cisi, umuntu wamukoka wakwe Benjamini, imyaka amakumi ane. 22Peŋka, pakumufumya uyo, ŵalimupyanicile-po Dafidi ati aŵe nimfumu yaŵo; ifyakwe naye ŵalisimicile nekulaŵila ati: Naŵona Dafidi, umwana wakwe Jese, umuntu uli koti mutima wanji, ukacito'kufwaya kwanji konse. 23Peŵumba lyaŵakamufyalwa ŵamuntu uyo, ŵaLesa ŵaliletele kuŵaIsilaeli aŵakupulusya, ŵaYesu, koti kulaya kwaŵo; 24pakweŵa'ti Yoane alitanjile ukutulisya ukuŵatisya ukwakwaluluka kuŵantu ŵonse aŵaIsilaeli, lomba tawaŋgesa ŵa Yesu. 25Popele Yoane, pakupalamina ukusila kwalwendo lwakwe, alilaŵile ati: Mbamulukweŵa ati ninenani? Nsili niwoyo. Sombi ŵoneni, ulukwisa panuma panji umbi, iŋkwawilo isyamumakasa akwe nsielelwe neŵo ukusikakulula.

26Mweŵakwasu, mweŵana ŵacikoto cakwe Ablaamu, namweŵo, peŵumba lyenu, mwemulukutonda ŵaLesa, kuli fweŵo isiwi lyakupulusya uku eko lyatumwa. 27Pakuti aŵo aŵalukwikala kuJelusalemi, nempemba syaŵo, pakuti taŵaŵesiŵile, neli kwisiŵa'masiwi aŵakusimika, ayo alukupendwa utusuŵa twasabata tonse, ŵaliapelenye pamo pakuŵasinina. 28Kaŵili, naŋgawa ati taŵabwene-po umulandu wakuŵepaila-po, ŵalikombetele Pilati ati ŵepaiwe. 29Peŋka, pakusilo'kupelanya pamo fyonse ifyalembelwe ifyakuli ŵo, ŵaliŵapatwile pamuti, nekuwawika mucilende, 30Sombi ŵaLcsa ŵaliŵaŵusisye pakati kaŵafwile. 31Popele ŵalibwenwe insiku isinji kuli ŵaŵo aŵafumine naŵo kuGalili, nekuya kuJelusalemi: aŵo ŵopele nimboni syaŵo kuŵantu Wukumo. 32Nafweŵo tulukumuleteleni ifyeŵo ifiweme, ifyakulaya uko ukwalailwe ŵawisifwe, 33ati ŵaLesa ŵaliŵacitile koti nifyopele' fyo aŵana ŵesu, pakuŵaŵusya ŵaYesu; koti nifyopele'fyo kaŵili ifyalembelwe mwisamo lyaŵuaŵili, ati: Uli mwana wanji; lelo nakufyala. 34Nakaŵili ifyakuŵaŵusya kwapaŵafwile, aŵakuŵulo'kubwelela liŵili mukuŵola, ŵalilaŵile ifyakuŵe'fi ati: Ŋkamupeleni ifiswetelele ifyacine, ifyakuli Dafidi. 35Pakuti mwisamo limbi alilaŵile ati: Tamukasumina ati umuntu wenu uswetelele aŵono'kuŵola. 36Pakuti Dafidi, pakusilo'kucito'kufwaya kwaŵaLesa mucitentekwa cakwe, aliile mutulo nekuŵikwa pamo naŵawisi, nekuŵono'kuŵola. 37Sombi aŵo aŵa ŵaŵusisye ŵaLesa, taŵabwene-po ukuŵola. 38Pakuti pali fyefyo, mweŵakwasu, isiŵeni ati muŵantu aŵa, ukulekelela kwafyakuŵifya kulitulicile, 39nakaŵili pakuti pali ŵo aŵantu ŵonse ulukucetekela aliluŋgeme kufintu fyonse, kuli fyefyo ifi tamwaisiŵile ukuluŋgama mumafunde akwe Mose. 40Pakuti pali fyefyo cenjeleni, fiiŋgesakwisa kuli mweŵo, ifyo ifyalaŵilwe kuŵakusimika, ati:

41Ŵoneni mweŵakupufya, mukaŋkamane musimine,

Pakuti ndukucito'mulimo pansiku syenu,

Umulimo utamukalukucetekela neli panini,

Naŋgawa ati umbi akamutulileni.

42Popele, pakufuma-mo, ŵaliŵakombetele ati mukatuŵule amasiwi aya pakasuŵa kasabata akamailo. 43Peŋka, pakutoŵoloka aŵantu aŵamwisunagoge, aŵaJuda aŵenji neŵaalucile ŵaJuda aŵatekenye ŵalilondele Paulu naBanaba; naŵo, pakwambala naŵo, ŵaliŵakosesye amasiwi ati mulukwikala muluse lwaŵaLesa.

44Ŋgamuluŋgu wamailo pakasuŵa kasabata, ŵaliŵuŋgene koti niŵo ŵonse aŵamumusi mukumfwa Isiwi lyaŵaLesa. 45Sombi aŵaJuda, pakuŵona amaŵumba, ŵaliŵele necikani, nekulukuleŋgulula ifintu ifyo ifi alaŵile Paulu, nekulukucoŵola. 46Peŋka Paulu naBanaba ŵalilaŵilisye nemitima ikosele ati: Kwalielelwe ati lsiwi lyaŵaLesa litaŋge ukulaŵilwa kuli mweŵo. Sombi, pakuti mulukulisukata, nekulisinina mweŵene ati tatwelelwe umweo uwamuyayaya, ŵoneni, tulukwalulucila kuŵenafyalo. 47Pakuti ŵaSikulu ŵalituŵulile ati:

Nakuŵika weŵo koti ninyale iyakuŵenafyalo,

Ati uŵe wakuŵapulusya aŵo aŵamufyalo ifipelele-ko lukoso.

48Nawo aŵenafyalo, pakumfwe'fyo, ŵalukutemwa nekulicindika lsiwi lyaŵaLesa. Popele ŵonse aŵo aŵasalulwilwe kumweo uwamuyayaya ŵalicetekele. 49Peŋka isiwi lyaŵaSikulu lyalipalaŋganisi we monse mumitala iyo. 50Sombi aŵaJuda ŵalisuŋgwilile aŵanakasi aŵatekenye aŵacindeme, neŵakulu aŵamumusi, nekuŵusya ifyakuŵapensya Paulu naBanaba, nekuŵatamfya ukuŵacisya imipaka yaŵo. 51Sombi ŵo ŵaliŵakuntile nekuŋgu lyamumakasa aŵo, nekufika kulkonya. Naŵo aŵasambile ŵaliiswile ukutemwa neMupasi Uswetelele.

Currently Selected:

Ifyacitilwe 13: AAL59

Highlight

Copy