Ifyacitilwe 12
12
1Lomba impindi iyo Elode imfumu yaliŵekete ŵambi aŵekelesya mukuŵapensya. 2Kaŵili yaliipeye Jakobo umukwaŵo Yoane kumpoko. 3Nayo, pakuŵona ati ifyo filukutemwesya aŵaJuda, yalitaticile ukumwikata naPetilo. Isyo-nsiku esyafimpwampwa ifyakuwulo'musuŋga, 4Popele, pakumwikata, yalimuŵicile mwikati, nekumuposa kumaŵumba ane aŵasilikani, onse ayo ŵane ŵane, mukumulama; ati pakusila Umuciluko ŋkamufumye ukumuleta kuŵantu.
5Pakuti pali fyefyo Petilo alilaminwe mwikati; sombi ikelesya lyalukumutembelela kuli ŵaLesa nemuŋkonsya, 6Peŋka, pakupalamina impindi yakumufumya kuli Elode, uŵusiku uŵo ŵopele Petilo alilele pakati kaŵasilikani ŵaŵili, ukacilwe neminyololo iŵili; nakaŵili ŵakalama kumulyaŋgo ŵalukulama ikati. 7Kusaŋga lomba nikuŋkalamba yaŵaSikulu iliimakene pali ye, nekutuŵa nako kwalitufisye mucipinda; popele yalimupamine Petilo pambafu, nekumuŵusya, nekulaŵila ati: Ima bwaŋgu, Peŋka iminyololo yakwe yaliponene-ko kumaŵoko akwe. 8Nayo iŋkalamba yalilaŵile kuli ye ati: Fwala, ukake neŋkwawilo syoŵe! Naye walicitile'fyo. Nayo yalilaŵile kuli ye ati: Ulifimbe necakufwala coŵe, undonde! 9Naye alifumine nekwilonda; taesiŵile ati fyacine ifyo ifyacitilwe kuŋkalamba; sombi alilaŋgulucile ati ndukuŵona icakuŵoneka lukoso. 10Naŵo, ili ŵapitile pali ŵakalama awakutaŋga, napaŵaŵuŵaŵili, ŵalificile kuciiŵi icacela icapelele kumusi; ico caliŵesucile icine; naŵo ŵalifumine nekupita pamuseŵo umo; popele iŋkalamba yalipulilile ukulekana nakwe. 11Peŋka Petilo, ili asinsimucile, alilaŵile ati: Wukumo ndiisi icine ati ŵaSikulu ŵatuma iŋkalamba yaŵo, nekumpulusya neŵo muminwe yakwe Elode, namukucetekela konse kwaŵantu aŵaJuda. 12Popele apo, pakwalakanya, alificile kunanda yakwe Maliya, ŵanyina Yoane uwailicilwe ati niMako, iyawuŋgene-mo aŵantu aŵenji aŵalukutembela. 13Popele, pakukoŋkonsya ye kuciŵi icakwiliŋga, moye umbi aliile mukwasuka, isina lyakwe niLoda. 14Lomba, ili aisiŵile isiwi lyakwe Petilo, taeswile-ko iciŵi pakuti pakusemba, sombi aliŵutucile mukati nekuŵaŵula ati Petilo aliimakene kumulyaŋgo. 15Sombi aŵo ŵalimwasucile ati: Wafunta weŵo! Sombi naye walilaŵilisye liŵili liŵili ati fyacine. Naŵo ati: Niŋkalamba yakwe! 16Sombi Petilo acikoŋkonsya; popele ŵo, pakwisula-po, ŵalimubwene nekukaŋkamana. 17Sombi naye waliŵacilicile kukuŵoko ati ŵekale celele, nekuŵaŵula ifyo ifi ŵacitile ŵaSikulu ukumufumya kwikati. Kaŵili alilaŵile ati: Mukamuŵule Jakobo neŵakwasu ifi-fintu. Naye alifumine nekuya kumbi.
18Popele, pakuco'ŵusiku, aŵasilikani ŵalisakamucile ati Petilo waya-pi? 19Popele Elode, ili amufwaile, nekuŵulo'kumuŵona, aliŵepusisye aŵakulama, nekuŵula ŵambi ati ŋgaŵaŵepaye. Naye alifumine kucalo caŵena-Juda, nekuya kuKaisalia, nekulukwikalo'ko.
20Lomba Elode alukuŵafitilwa aŵakuTulo naSidono; naŵo ŵaliisile kuli ye nemutima umo; peŋka, pakumwalula Bilasito, icilolo camfumu, ciŵusa caŵo, ŵalilombele uŵutende, pakuti icalo caŵo calukuteŵetwa kucalo camfumu. 21Popele apo pakasuŵa kambi akaansicilwe, Elode alifwite ifyakufwala ifyaŵufumu, nekwikala peteŵe lyaŵufumu, nekulukulaŵila icakulaŵila kuŵantu. 22Kumfwa aŵantu ŵaliŵilicisye ati: Isiwi ili lyakwe lesa, talili lyamuntu! 23lmpindi iyo yopele iŋkalamba yaŵaSikulu yalimupamine, pakuti taalemesye ŵaLesa; naye alilicilwe kumatila nekufwa.
24Sombi isiwi lyaŵaLesa lyalikulile nekufula.
25Naŵo ŵaBanaba naSaulu ŵalifumine kuJelusalemi ukubwela, ili ŵakonsesye imilimo yaŵo, nekupinta naYoane uwailicilwe ati niMako.
Currently Selected:
Ifyacitilwe 12: AAL59
Highlight
Share
Copy
Want to have your highlights saved across all your devices? Sign up or sign in
Lamba Bible Version © United Bible Societies, 1959.
