Ifyacitilwe 11
11
1Kansi intanjisi newana-ŵaŋkasi aŵali mucalo caŵena-Juda ŵaliumfwile ati neŵenafyalo ŵalipokele lsiwi lyaŵaLesa. 2Popele, ili aficile Petilo kuJelusalemi, aŵo aŵali ŵakopwelwe ŵalipicisye nakwe icikaka, 3ati: Weŵo waliinjile muŵantu aŵakuŵulo'kukopolwa, nekulukulya naŵo! 4Sombi Petilo alitaticile ukuŵaŵulisisya nemasiwi akupendulula ati: 5Nali kumusi wajopa, nalukutembela; peŋka nalilesucile nekuŵona ukuŵoneka: icintu cimbi cilukuseluka, koti ninsalu ikulu, ilukutulwa kwiulu mumikoŋko ine; popele calificile nakuli neŵo. 6Lomba, pakucitontomeka, nalialakenye nekuŵona inama syapansi pano isyenda kumolu ane nefilwani nefiloŋgolo nefyuni fyamwiulu. 7Kaŵili naliumfwile isiwi lilukulaŵila kuli neŵo ati! Ima, Petilo, wipaye, ulye! 8Sombi neŵo ati: Koku mweŵaSikulu, pakuti ifintu ifinaŋgwa ifiŵipile tafiŋgenjila mukanwa kanji neli limo. 9Sombi lya liasucile liŵili isiŵi ilyakufuma kwiulu ati: Ifyo ifi ŵaswesya ŵaLesa, tekufieŵa weŵo ati finaŋgwa! 10Kaŵili ifyo fyalicitilwe litatu; popele fyonse fyalisunsilwe kwiulu. 11Kusaŋga impindi iyo yopele nikuŵantu ŵatatu ŵaliimakene pesonde pananda iyi twali-mo fweŵo, aŵatuminwe kuli neŵo ukufuma kuKaisalia. 12Popele Umupasi walimbulile ati: Koya naŵo; tekusalulula. Nakaŵili aŵaŵakwasu ŵosanu naumo naliile naŵo; popele twaliinjile muŋanda yamuntu uyo. 13Naye alituŵulile ati alibwene iŋkalamba iliimakene muŋanda yakwe, nekulaŵila ati: Tuma aŵantu ku Iopa, mukuleta Simoni, uwilicilwe ati niPetilo; 14akalaŵila amasiwi kuli weŵo, akukupulusya weŵo newamuŋanda yoŵe ŵonse. 15Peŋka ili nataticile ukulaŵila, Umupasi Uswetelele waliponene pali ŵo, koti nifyopele'fyo napali fweŵo pakutaŋga, 16Eli nalaŋgulucile ilyo-siwi lyaŵaSikulu ili ŵalaŵile ati: Yoane icine alukuŵatisya mumenda; sombi mweŵo mukaŵatisiwa muMupasi Uswetelele. 17Lomba kani ŵaLesa ŵaliŵapele impese, koti nifyopele'fyo ifi ŵapele fweŵo, ili twacetekele muli ŵaSikulu Yesu Klistu, mbaneŵo ninenani niŋgacicila-po ŵaLesa?
18Naŵo, ili ŵaumfwile'fyo-fintu, ŵaliikele celele, nekulukuŵalemya ŵaLesa, nekulaŵila ati: Kansi neŵenafyalo naŵo, ŵaLesa ŵaliŵapele ukwalulucila kuMweo.
19Popele apo aŵo awapalaŋgene ponse ponse pakuti pakuŵapensya uko ukwataticile pali Stefano, ŵalificile ili ŵenda nakuPoinike naKupilo naAntioke, nekulukulaŵila lsiwi kuŵaJuda ŵeŋka. 20Sombi peŵumba lyaŵo epo ŵali ŵambi aŵakuKupilo naKulene; aŵo ŵopele, pakufika kuAntioke, ŵalukulaŵila nakuŵaEla, ukulukutulisya ŵaSikulu Yesu. 21Popele ukuŵoko kwaŵaSikulu kwali naŵo; lomba aŵenji aŵacetekele ŵalialucile kuli ŵaSikulu. 22Peŋka impupo syaŵo syalificile mumatwi aŵekelesya ilyali kujelusalemi; naŵo ŵalitumine Banaba ati afike kuAntioke. 23Naye, ili aficile, nekuŵona uluse lwaŵaLesa, alisaŋgalele; nekuŵacenjesya ŵonse, ati mulukuŵakoŵamina ŵaSikulu nemitima ikosele. 24Pakuti ye muntu uweme uwiswile Umupasi Uswetelele nekucetekela; naŵo aŵantu aŵenji ŵalisaŋkanine kuli ŵaSikulu.
25Popele apo Banaba aliile kuTaso mukumufwaya-fwaya Saulu; 26pakumuŵona, alimuletele kuAntioke. Paliŵele ati umwaka umo wonse ŵaliŵuŋgene pamo neŵekelesya, nekulukuŵasambisya aŵantu aŵenji; kaŵili kuAntioke aŵasambile ŵalitanjile ukwilikwa ati ŵena-Klistu.
27Lomba insiku isyo ŵalifumine kuJelusalemi aŵakusimika, nekufika kuAntioke. 28Eli waimakene umbi, isina lyakwe niAgabo, nekusimika neMupasi ati insala iyakuti ikesa pacalo conse icapansi; iyo yaliisile pansiku syakwe Klodyo. 29Popele aŵasambile ŵonse koti makosa aŵo ŵati ŵakatume ifyakuŵofwa-ko awana-ŵaŋkasi aŵaikele mucalo caŵena-Juda. 30Ifyo ŵalificitile icine, nekufituma kuŵakulu muminwe yaŵaBanaba naSaulu.
Currently Selected:
Ifyacitilwe 11: AAL59
Highlight
Share
Copy
Want to have your highlights saved across all your devices? Sign up or sign in
Lamba Bible Version © United Bible Societies, 1959.
